Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai das ma sidea hu Derbe ampa Listra. Ijai adong ma sada susian, na margoran si Timoteus, anak ni sada boru Jahudi na porsaya, tapi halak Gorik do anggo bapani.
2 Dear do baritani isaksihon hasoman na i Listra ampa Ikonium.
3 Jadi ipangindo uhur ni si Paulus ma ia hasomanni laho. Iboan ma ia anjaha isunat, halani halak Jahudi na ijai ai, ai ganup do mambotoh halak Gorik do bapani.
4 Tapi sanggah na isiari sidea huta-huta ai, iondoskon ma bani sidea aturan sidalankonon ai, na dob tinotapkon ni apostel ampa pangintuai-pangintuai ai i Jerusalem.
5 Gabe lambin toguhni ma haporsayaon ni kuria ai, anjaha lambin tambah do bilangan ni sidea ganup ari.
6 Tapi ibolus sidea ma nagori Prigia ampa Galatia, halani ilanglangi Tonduy Na Pansing sidea mangkatahon Hata in i Asia.
7 Jadi dob das sidea hampit Nagori Misia, iuji sidea ma laho hu Bitinia, tapi lang ilopas Tonduy ni Jesus sidea.
8 Gabe ilopusi sidea ma Misia, anjaha tuad ma hu Troas.
9 Jadi taridah ma bani si Paulus sada panonggoran borngin-borngin. Jongjong ma sada halak Makedonia mangelek-eleksi, nini, “Mandipar ma ham hu Makedonia, urupi ham ma hanami!”
10 Jadi dob ididah panonggoran ai, mintor iuhurhon hanami ma laho hu Makedonia, ai itimbangi hanami, Naibata do na mandilo hanami, laho mangambilankon Ambilan Na Madear bani sidea.
11 Dob ai marparau ma hanami hun Troas torus hu Samotrake, anjaha sadari patarni ai hu Neapolis.
12 Hunjai hu Pilippi, ai ma huta pamatang ni Makedonia anjaha jajahan ni Rom. I huta ai ma hanami soh piga-piga ari.
13 Sanggah ari Sabat luar ma hanami hu darat ni huta ai, hubani sada bah; hu partonggoan na niarapkon ni uhurnami, anjaha hundul-hundul ma hanami ijai marsahap-sahap pakon naboru na martumpu ijai.
14 Jadi adong ma sada naboru, na margoran si Lidia, partiga-tiga hiou sigerger, hun huta Tiatira, sisombah Naibata. Ibuka Naibata ma uhurni gabe iparimbagaskon ma na hinatahon ni si Paulus.
15 Ase dob tardidi ia rap pakon parrumahni, iojur ma hanami, nini, “Anggo na tongon do ahu porsaya bani Tuhan in, ninuhur nasiam, roh ma nasiam tondok hu rumahku.” Igogohkon do mangojur-ojur hanami.
16 Jadi masa ma, sanggah laho hanami hu partonggoan, pajumpah ma hanami pakon sada jabolon naboru sipartondung; buei do untung ni tuanni humbani partondungonni ai.
17 Ipaihut-ihut ma si Paulus ampa hanami lanjar mardilo-dilo: “Juakjuak ni Naibata Sitimbulan in do halak on, na patugahkon dalan haluahon bani nasiam!”
18 Sonai ma ibahen ganup ari. Tapi sogam do uhur ni si Paulus mangidah ai, marhusor ma ia, marsahap bani tonduy ai, nini ma, “Huparentahkon ma bam marhitei goran ni Jesus Kristus, luar ma ho hun bani.” Jadi luar ma ia bani na satongkin ai.
19 Tapi dob ididah tuanni ai, na so adong be pansarian siaraphonon hun bani, itangkap sidea ma si Paulus ampa si Silas anjaha isarad ma hu tiga hu lobei ni pamarentah.
20 Anjaha dob iboan sidea ia hubani panguhum ai, nini sidea ma, “Halak Jahudi do halak on, na manggeori hutanta on.
21 Ibaritahon sidea do adat, na so bulih jaloon barang horjahononnami, ai halak Rom do hanami.”
22 Halak na mabuei ai pe marurup do manlawan sidea, gabe ihatahon panguhum ai ma rintakon hiou ni sidea, ase ilonsingi.
23 Dob dokah sidea hona lonsingan, idabuh ma sidea hubagas tutupan, anjaha iparentahkon ma bani sijaga tutupan, ase pangkei sidea ijaga.
24 Domu hubani parentah, na jinaloni ai, ipamasuk ma sidea hu tutupan parbagas, anjaha poltik ma ibayangkon nahei ni sidea.
25 Tapi marayak tongah borngin, martonggo ma si Paulus ampa si Silas mamuji Naibata ipatangi-tangi na tartutup ai.
26 Tapi sompong ma masa lalou bolon, pala dugur onjolan ni tutupan ai, gabe mintor mangkabuha ma haganup labah, tanggal ma age gari ni sidea haganupan.
27 Jadi tarpuho ma sijaga tutupan ai, anjaha dob ididah domma buha ganup labah ni tutupan ai, isintak ma podangni laho mamunuh dirini, ai iagan domma maporus ganup na tartutup ai.
28 Tapi ipagogoh si Paulus ma sorani mandilohon: “Ulang bahen ham hasedaon bamu, ai ijon do hanami haganup!”
29 Jadi ipindo ma suluh, marlintun ma ia hubagas, anjaha manrogop ma ia hitir-hitir i lobei ni si Paulus ampa si Silas.
30 Iarahkon ma sidea hu darat, nini ma, “Aha ma sibahenonku, nasiam tuannami, ase maluah ahu?”
31 Jadi nini sidea ma, “Haporsayai ma Tuhan Jesus, ase maluah ham pakon parrumahmu!”
32 Anjaha ihatahon sidea ma hata ni Tuhan in bani pakon bani haganup parrumahni.
33 Anjaha bani panorang ai, bornginni ai, iarahkon ma sidea anjaha iburihi ma ugah ni sidea; dob ai mintor tardidi ma ia ampa haganup sidea na satangga.
34 Iboan ma sidea hu rumahni, anjaha ipatorsa ma sipanganon bani sidea. Jadi malas ma uhurni ampa haganup sidea na sarumah, halani na dob porsaya ai sidea bani Naibata.
35 Jadi dob siang ari, isuruh panguhum ai ma upas na mangkatahon, “Paluah ma halak in!”
36 Jadi ipadas sijaga tutupan ai ma hata ai bani si Paulus, nini ma, “Domma isuruh panguhum ai na mangkatahon, ase paluahon nasiam. Ai pe hu darat ma nasiam, anjaha laho ma ibagas damei!”
37 Tapi nini si Paulus ma bani sidea, “Halak Rom do hanami, hape ilonsingi do hanami i lobei ni halak na mabuei, seng palobei ipareksa, dob ai idabuh hu tutupan. Mintor sonai ma marponop-ponop sidea, sihol paluahkon hanami? Lang sonai, maningon sidea do roh padarat hanami!”
38 Jadi ipatugah upas ai ma hata ai bani panguhum ai, gabe mabiar ma sidea dob ibogei halak Rom do hape sidea.
39 Jadi roh ma sidea, mangelek ma sidea bani apostel ai. Dob iarahkon hu darat, iojur ma sidea, ase itadingkon huta ai.
40 Ase dob mandarat sidea hun tutupan ai, laho ma sidea hu rumah ni si Lidia. Jadi dob ididah anjaha iapohi sanina-sanina ai, laho ma sidea.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA