Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Paulus nerusko lapahni mik Derbe, kak raduni mik Listra. Di dudi wat sai jelma sai nutuk Isa gelarni Timotius. Emakni ulun Yahudi, sai radu percaya jama Isa; kidang bakni ulun Yunani.

² Di hantara ulun-ulun percaya sai tinggal di Listra rik Ikonium, Timotius tekenal sebagai jelma sai betik.

³ Paulus mirak in Timotius nutuk jama ia; ulihni seno ia nyunat Timotius. Ia ngelakuko seno, mani ulun-ulun Yahudi di daerah-daerah seno sunyinni pandai bahwa bakni Timotius jelma Yunani.

⁴ Di unggal kota sai tian ratongi, tian nyampaiko jama ulun-ulun sai percaya keputusan-keputusan sai radu ditantuko ulih rasul-rasul rik jelma-jelma sai mimpin di Yerusalem. Tian ngeni petuah puari-puari sai radu percaya ano in nuruti atoran-atoran ano.

⁵ Maka jemaah-jemaah udi betambah kuat imanni, rik unggal rani makin betambah lamon jumlahni.

⁶ Ruh Allah mak ngirimko Paulus rik Silas nyebarko cawani Allah di provinsi Asia. Jadi lapahni tian dilanjutko mik daerah Frigia rik Galatia.

⁷ Waktu sampai di perbatasan Misia, tian nyuba kuruk mik provinsi Bitinia, kidang Ruh Isa ngelarang tian mik dudi.

⁸ Jadi tian ngeliu Misia rik langsung mik Troas.

⁹ Bingini, di Troas, Paulus ngeliak suatu pengliakan. Delom pengliakan ano ia ngeliak sai jelma Makedonia cecok di hadap sambil ngilu nihan jama ia in ia mik di Makedonia untuk nulung tian.

¹⁰ Radu jak Paulus mansa pengliakan udi, sekam langsung besiap-siap untuk mik di Makedonia. Mani jama keyakinan sekam narik kesimpulan bahwa Allah ngayun sekam ngabarko Kabar Betik udi jama ulun-ulun di dudi.

¹¹ Sekam ninggalko Troas rik belayar langsung mik Samotrake, rik jemohni mik Neapolis.

¹² Jak udi sekam mik Filipi, suatu kota di distrik mula-mula Makedonia. Filipi yakdo jajahan kerajaan Roma. Di dudi sekam tinggal pira-pira rani.

¹³ Waktu rani Sabat sekam mik di pingger way di luah rangok gerbang kota, mani sekam ngerasa di dudi wat rang sembahyang untuk jelma Yahudi. Raduni sekam mejong rik ngicik-ngicik jama bebai-bebai sai bekumpul di rang udi.

¹⁴ Sai jelma jak tian yakdo jelma sai bedagang kain ungu, gelarni Lidia asal jak Tiatira. Ia mengasihi Allah, maka Tuhan ngegerakko hatini in ia nerima api sai Paulus ajarko jama ia.

¹⁵ Lidia rik seisi lambanni dibaptis. Radu dibaptis ia ngundang sekam. Ia cawa, "Kik Puari-puari ngerasa nyak temon-temon radu percaya jama Isa, ijado numpang di lambanku." Raduni ia ngedesak in sekam nurut kiluanni.

¹⁶ Pada suatu rani waktu sekam sedang mik di rang bedua, sekam betungga jama sai bebai; ia jelma sai ngebantu. Bebai udi dikuasai ulih ruh jahat sai dapok ngeramalko kejadian-kejadian sai haga ratong. Jama ngeramalko nasib jelma, bebai udi ngeni untung sai balak jama majikan-majikanni.

¹⁷ Bebai udi terus gaoh nutuk Paulus rik sekam sambil mekik-mekik, "Jelma-jelma inji jelma sai ngebantu Allah Sai Mahatinggi! Tian ratong untuk ngeni pandai jama Puari-puari injuk repa carani keti dapok selamat!"

¹⁸ Pira rani sakani bebai udi terus-menerus mekik. Paulus lebon kesabaranni, sehingga ia ngerilong raduni cawa jama ruh udi, "Atas gelar Isa Almasih kuperintahko niku luah jak bebai inji!" Waktu seno juga ruh udi ninggalko bebai udi.

¹⁹ Waktu majikan-majikanni udi sadar bahwa kesempatan tian untuk mansa duit radu lebon, tian nangkok Paulus rik Silas, raduni nyiret tian rua mik lapangan ngehadap sai bewajib.

²⁰ Tian ngehadapko Paulus rik Silas jama pejabat-pejabat pemerintah Roma, kak raduni cawa, "Jelma-jelma inji ulun Yahudi. Tian ngacau di kota ram.

²¹ Tian nganjurko ulun ngelakuko adat kebiasaan sai betentangan jama hukum-hukum ram, ulun-ulun Roma. Ram mak dapok nerima atau nutuk adat kebiasaan udi!"

²² Jelma lamon pun nutuk nyerang Paulus rik Silas; rik pejabat-pejabat pemerintah nyabikko kawai jak badan kerua rasul udi raduni ngayun jelma ngelecut tian rua.

²³ Radu jak tian hibat dilecut, tian dikurukko mik delom bui. Kepala bui dikayun ngejaga ketat tian.

²⁴ Ulihni perintah udi, kepala bui udi nahan tian di kamar bui sai paling delom, rik ngikok cukut tian jama balok.

²⁵ Kira-kira tengah bingi Paulus rik Silas sedang bedua rik nyanyiko puji-pujian jama Allah. Jelma-jelma tahanan sai bareh pun sedang ngedengiko tian nyanyi.

²⁶ Tiba-tiba tejadi kukuk sai hibat nihan, sampai lantai bui udi pun nutuk beguncang. Seluruh rangok bui tebukak rik rantai-rantai sai ngikok sunyinni tahanan pun lepas.

²⁷ Kepala bui udi tekanjat minjak. Waktu ia ngeliak rangok-rangok bui tebukak, ia ngehunus pedangni untuk bunuh diri mani ia nyangko ulun-ulun tahanan radu tegar sunyinni.

²⁸ Kidang Paulus mekik sekeras-kerasni, "Dang bunuh diri! Sekam seluruh masih wat di dija!"

²⁹ Kepala bui ano ngilu lampu raduni tegar mik delom, rik jama gegoran ia tesungkor di hadapan Paulus rik Silas.

³⁰ Kak raduni ia ngusung tian luah rik cawa, "Bapak-bapak, api harus kulakuko in nyak diselamatko?"

³¹ Paulus rik Silas ngejawab, "Percayado jama Tuhan Isa! Niku haga selamat -- niku rik seluruh jelma sai di lambanmu!"

³² Raduni Paulus rik Silas nerangko cawa Tuhan jama kepala bui udi rik jama seluruh jelma sai wat di lambanni.

³³ Waktu tengah bingi ano juga, kepala bui ano ngusung tian raduni ngecahko katan-katan tian. Maka ia rik seluruh jelma sai di lambanni langsung dibaptis.

³⁴ Kak raduni ia ngusung Paulus rik Silas mik lambanni rik ngehidangko kanikan jama tian. Ia rik sunyinni keluargani senang nihan mani tian tano percaya jama Allah.

³⁵ Jemoh pagini, pejabat-pejabat pemerintah Roma ngutus pelisi mik bui untuk nyampaiko perintah in Paulus rik Silas dilepasko.

³⁶ Kepala bui udi ngeni pandai hal ano jama Paulus. Ia cawa, "Bapak-bapak, pejabat-pejabat pemerintah radu ngeni perintah untuk ngelepasko Bapak-bapak. Tano Bapak-bapak ngasi mulang. Selamat jalan!"

³⁷ Kidang Paulus cawa jama petugas-petugas pelisi udi, "Sekam warga negara Roma. Tanpa diadili, sekam radu dilecut di hadapan umum rik dikurukko mik delom bui. Rik tano tian ngayun sekam mik hema-hema? Sekam mak haga! Kayun pejabat-pejabat pemerintah udi ratong tenggalan mik dija ngelepasko sekam."

³⁸ Petugas-petugas pelisi udi ngelaporko hal udi jama pejabat-pejabat pemerintah Roma. Waktu pejabat-pejabat udi ngedengi bahwa Paulus rik Silas warga negara Roma, tian jadi rabai.

³⁹ Raduni tian mik ngilu maaf jama Paulus rik Silas, kak raduni ngantakko tian rua luah jak bui, rik ngilu in tian mik jak kota udi.

⁴⁰ Paulus rik Silas ninggalko bui udi raduni mik di lamban Lidia. Radu jak betungga jama jelma-jelma percaya di dudi, rik ngeni durongan jama tian, Paulus rik Silas berangkat.

Kisah Para Rasul

Video Kisah Para Rasul 16

Ikuti Kami:

KONTAK | PARTISIPASI | DONASI