Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Paulus nacing déi' Derbi idi Listra. Idi inan seburur lun manu déi', ngadanneh Timotius, anak seburur decur lun Yahudi luk manu, iamo' tamanneh lun Grika.
2 Idi Timotius ineh inubur amung-amung kinanak luk déi' Listra idi Ikonium ineh.
3 Paulus sikal nguit Timotius maya' neneh, idi ieh nenunat neneh, ngaceku lun Yahudi luk tudo su ineh nekali' tamanneh ineh lun Grika.
4 Kareb ideh nalan nelemaba bawang ineh, idi ideh nengelio kuan lun manu ineh ratnan ukum-ukum luk pangeh pinutut rasul-rasul idi lun rayeh-rayeh déi' Yerusalim. Idi ideh nengecuk nedeh maya'.
5 Kudeng ineh teh sidang-sidang ineh rinaben anudeh, idi anid-anid aco ideh iuk amé' mula'.
6 Idi ideh nenalan lemaba bawang Prigia idi Galatia, ngaceku bibpeng Roh Meligan aleg mada' bala Allah déi' Asia.
7 Kareb ideh nacing lakan Misia, idi ideh sikal nutun semuet déi' Bitinia, iamo' Roh Yésus na nima' nedeh.
8 Idi ideh nelemaba Misia idi netemurun iné' Troas.
9 Idi malem ineh Paulus nenier aceh luk sinierneh; ieh ineh inan seburur lun Makedonia netuped nenawar neneh, keburi'neh, "Amé' tungé' Makedonia idi ngedengan nekai!"
10 Kareb Paulus pangeh nekali' ineh, idi kai petacu nipa idi iné' Makedonia, ngaceku bang terawé kai Allah nenawar nekai amé' mada' Bala luk Do' kuandeh.
11 Kai nenalan maya' kapal rat Troas, idi kai petacu iné' Samotraki; idi kenebpa nacing déi' Niapolis.
12 Rat déi' kai iné' pa dayeh macing Pilipi, ieh ineh aceh bawang bang Babpat Aceh déi' Makedonia, luk bang imet Rum. Idi kai tudo tuda'-tuda' aco kinioneh bang bawang ineh.
13 Kareb Aco luk inan Mudeng, kai neremuat rat bang bawang ineh iné' tangeb abpa', su luk inan kai nengerawé lun Yahudi miak sembayang. Idi kai netudo idi nepegayam dengan decur-decur luk nepamung su ineh.
14 Idi inan aceh decur ngadanneh Lidia, seburur rat Tiatira luk masui kibung luk sia' merirem. Ieh sembayang inan Allah, idi Tuhan nengukab niatneh pad ieh nengerawé amung-amung bala luk bila Paulus ineh.
15 Ieh pangeh rireb dengan amung uang tetek ruma'neh. Idi ieh nemutuh nekai, keburi'neh, "Kudeng muyuh ngerawé ui ini manu inan Tuhan, amé' muyuh tudo bang ruma'ku." Idi ieh mesaad nenawar nekai.
16 Bang seaco kareb kai nalan amé' su luk inan sembayang, idi inan seburur decur luk sinuet ada' luk mileh mangun nepapu' nekai. Idi ieh nengalap mula' usin kuan tuan-tuanneh ngaceku bangunneh ineh.
17 Ieh nemaya' puet Paulus idi kai teh, idi nengitang, keburi'neh, "Lemulun ini demulun Allah luk Meluun Dita' luk mada' dalan ulun kuan muyuh."
18 Idi tuda'-tuda' aco kinioneh ieh nenganau' kudeng ineh, pad Paulus museh idi nelumi neneh idi nepebala nan ada' ineh, "Dengan ngadan Yésus Keristus ui ngecuk namu remuat rat bang burur decur ini." Idi ada' ineh petacu neremuat.
19 Kareb tuan-tuanneh nekali' luk inandeh merapet ngalap usin pangeh netutu', idi ideh nengakem ni Paulus idi Silas idi nengeruid nedidueh amé' luun natad pa kiung lun rayeh-rayeh.
20 Ideh nenguit nedidueh amé' matun lun tareh imet Rum, keburi'deh, "Lemulun ini lun Yahudi luk ngagau bawang tau ini.
21 Didueh mada' adat luk na miak lapen idi bén tau lun Rum ini."
22 Idi lun mula' pana' meria' nengadu' nedidueh; idi lun rayeh-rayeh nengerarak ayung didueh idi nengecuk mebal nedidueh.
23 Kareb ideh pangeh bibal, idi ideh nenuet nedidueh bang tutup, idi nengecuk lun matar tutup ineh nginita nedidueh do'-do'.
24 Kareb lun matar tutup ineh nekali' bala ini, idi ieh nenuet nedidueh bang takep tutup luk medalem tu-tu, idi kukud didueh pipang.
25 Kareb malé tangal dacem, Paulus idi Silas pana' nesembayang idi menani ngubur Allah, idi amung-amung lemulun luk tinutup ineh pana' neninger tang didueh.
26 Denak-denak inan aceh ruyuh tana' luk rayeh, pad apin tutup ineh meguyu'; idi petacu amung-amung tanga' ineh mukab idi kalingdeh netaka peh.
27 Idi lun matar tutup ineh nekulat, idi kareb ieh nenier tanga' tutup ineh pangeh mukab, idi ieh nengangat pelapetneh sikal peripaté, ngaceku bang terawéneh lemulun luk bang tutup ini pangeh neburo.
28 Idi Paulus nengitang, keburi'neh, "Aleg peripaté ngaceku amung-amung kai idi tungé'."
29 Idi lun matar tutup ineh nemutuh lapung idi nupun semuet idi dengan megegker niat netekeradung pa kiung Paulus idi Silas teh.
30 Pangeh ineh ieh nenguit nedidueh neremuat, idi nepebala, "O lun dueh, anunké luk miak ruenku pad ui ngalap ulun?"
31 Idi kebala didueh, "Manu inan Tuhan Yésus, pad iko ngalap ulun dengan amung uang tetek ruma'mu."
32 Idi didueh nemada' bala Tuhan kuanneh idi kuan amung uang tetek ruma'neh.
33 Kareb malem ineh teh ieh nenguit nedidueh idi nemaru' urat didueh, idi petacu ieh rireb dengan amung uang tetek ruma'neh.
34 Ieh nenguit nedidueh umak bang ruma'neh, idi ieh nemaré akan kuan didueh. Idi ieh dengan amung uang tetek ruma'neh mawang niat ngaceku ieh pangeh manu inan Allah.
35 Pekak uka-uka idi lun tareh imet Rum nengecuk nelun pulis nated bala pad didueh puatin.
36 Idi kebala lun matar tutup ni Paulus, "Lun tareh imet Rum pangeh nengecuk muit nemedueh. Ngaceku ineh medueh miak nalan dengan do'."
37 Iamo' keburi' Paulus nelun pulis, "Kai ini pangeh bibal pa kiung lun mula' dengan na pinutut lun luk mutut besara', sagan pana' kai lun Rum. Idi ideh nenuet nekai bang tutup. Idi nekini lemulun ineh sikal ngeruat nekai dengan lulem! Na tu miak! Do' nima lun tareh imet Rum sebuleng macing nguit nekai remuat."
38 Idi bala ineh bida' lun pulis kuan lun tareh imet Rum. Idi ideh matot kareb ideh neninger didueh ineh lun Rum.
39 Idi ideh iné' mutuh do' nedidueh. Idi ideh nenguit nedidueh remuat idi nengecuk nedidueh buro rat bang bawang ineh.
40 Paulus idi Silas neremuat rat bang tutup ineh idi iné' ruma' Lidia. Kareb didueh nepapu' dengan kinanak-kinanak ineh, idi didueh nengubuk nedeh, idi didueh pana' nenalan peh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA