Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Paulus ngelanjutang kelampanne ojok Derbe beterus ojok Listra. Lẽq derike araq sopoq dengan pengiring Deside Isa aranne Timotius. Inaqne dengan Yahudi saq sampun percaye lẽq Deside Isa; laguq bapaqne dengan Yunani.

² Lẽq antare dengan-dengan percaye saq ndot lẽq Listra dait lẽq Ikonium, Timotius tekenal jari dengan saq solẽh.

³ Paulus kayun adẽq Timotius milu kance ie; keranaq nike Paulus nyunat Timotius. Ie ngelaksaneang hal nike, sẽngaq dengan-dengan Yahudi lẽq daẽrah derike nike selapuqne nenaoq bahwe bapaqne Timotius dengan Yunani.

⁴ Lẽq sebilang kote saq ie pade datengin, ie pade nyampẽang tipaq dengan-dengan percaye keputusan-keputusan saq sampun tetentuang siq rasul-rasul dait pemimpin-pemimpin lẽq Yerusalem. Ie pade nasẽhatin semeton-semeton saq sampun percaye nike adẽqne taat lẽq aturan nike.

⁵ Make jemaah-jemaah nike sayan teguq imanne, dait sebilang jelo sayan luwẽq jumlahne.

⁶ Roh Suci nẽnten ngijinang Paulus dait Silas nyebarang Manik Allah lẽq wilayah Asia. Jari ie pade ngelanjutang kelampanne ojok daẽrah Prigia dait Galatia.

⁷ Sewaktu dateng lẽq perbatesan Misia, ie pade cobaq tame ojok daẽrah Bitinia, laguq Roh Deside Isa balaq ie ojok derike.

⁸ Jari ie pade liwatin Misia dait langsung tipaq Troas.

⁹ Kelemne, lẽq Troas, Paulus mauq sopoq penyerioqan. Dalem penyerioqanne nike Paulus serioq sopoq dengan Makedonia nganjeng lẽq julune dait ie tunas gati adẽq Paulus lumbar ojok Makedonia jari tulung ie pade.

¹⁰ Sesampun Paulus mauq penyerioqan nike, tiang pade langsung berejap gen lalo ojok Makedonia. Sẽngaq siq yakin tiang pade bait kesimpulan bahwe Allah manikang tiang pade ngabarang Kabar Solah nike tipaq dengan-dengan lẽq derike.

¹¹ Tiang pade bilin Troas dait belayar langsung ojok Samotrake, dait jemaqne ojok Neapolis.

¹² Lẽman derike tiang pade ojok Pilipi, kote saq utame lẽq bagian Makedonia. Pilipi niki kote perantoan dengan Roma. Lẽq derike tiang pade ndot cume pire jelo.

¹³ Lẽq jelo Sabat tiang pade lumbar ojok sedi kokoq lẽq luah jebak belẽq kote, sẽngaq tiang pade paran lẽq derike araq taoq ibadah dengan Yahudi. Terus tiang pade tokol dait ngeraos-ngeraos kance dengan-dengan nine saq bekumpul lẽq taoq nike.

¹⁴ Sopoq dengan lẽq antare ie pade bedagang lakar lempok lomaq, aranne Lidia, asalne lẽman Tiatira. Ie ngasihin Allah, make Tuhan bukaq angenne adẽq ie nerimaq napi saq Paulus ajahang tipaq ie.

¹⁵ Lidia dait selapuq dengan saq araq lẽq balẽne tebaptis. Sesampun tebaptis ie pesilaq tiang pade, ie bebase, "Lamun side pade merase bahwe tiang tetu-tetu sampun percaye lẽq Deside Isa, silaq mererepan lẽq balẽn tiang." Terus ie tunas gati adẽq tiang pade turut kemẽlẽqne.

¹⁶ Lẽq sopoq jelo sewaktu tiang pade lumbar ojok taoq bedo'e, tiang pade bedait kance sopoq pelayan nine. Pelayan nine nike tekuasein siq roh jahat saq bau ngeramalang peristiwe-peristiwe saq gen dateng. Siq care ngeramalang nasib dengan, ie ngebẽng keuntungan saq belẽq umaq majikan-majikanne.

¹⁷ Pelayan nine nike terus doang turut Paulus dait tiang pade sambil bekuih-kuih, "Dengan-dengan niki hambe-hambe Allah Saq Maheagung! Ie pade rauh gen nyampẽang tipaq semeton senamian berembẽ entane side pade bau selamet!"

¹⁸ Pire jelo ngonẽqne dengan nine nike terus doang bekuih maraq nike, Paulus telang kesabaranne, sehingge ie ngẽngat terus bebase lẽq roh nike, "Siq pesẽngan Deside Isa tiang prẽntahang side sugul lẽman dengan nine niki!" Waktu nike ẽndah roh nike sugul lẽman dengan nine nike.

¹⁹ Sewaktu majikan-majikanne sadar bahwe kesempatan ie pade jari mauq kẽpẽng sampun telang, ie pade bau Paulus dait Silas, terus ngoros deduaqne ojok lapangan ngadep penguase

²⁰ Ie pade jauq Paulus dait Silas ojok pejabat-pejabat kote nike, terus bebase, "Dengan-dengan niki dengan Yahudi. Ie pade ngorayang lẽq kotente.

²¹ Ie pade nganjurang dengan ngelaksaneang adat kebiasean saq betentangan kance hukum-hukumte, dengan-dengan Roma. Ite ndẽq bau terimaq atao turut adat kebiasean nike!"

²² Dengan luwẽq ẽndah milu nyerang Paulus dait Silas; dait pejabat-pejabat kote ngantuq kelambi lẽman awak kedue rasul nike, terus suruq dengan mecut rasul-rasul nike.

²³ Sesampun ie pade tepecut keras-keras, ie pade tetamaq ojok dalem bui. Kepale bui teprẽntahang jagaq ie pade pacu-pacu.

²⁴ Lantaran prẽntah nike, kepale bui nike tahen ie pade lẽq kamar bui saq paling dalem, dait naẽn ie pade tebelakbak.

²⁵ Kire-kire lẽq tengaq kelem, Paulus dait Silas kenyeke bedo'e dait nyanyiang lagu pujian tipaq Allah. Dengan-dengan saq tebui lainne ẽndah kenyeke dengahang ie pade benyanyi.

²⁶ Selung-selung araq lindur saq belẽq gati jangke dasar bangunan bui nike ẽndah milu inggur. Selapuq lawang bui kebukaq dait rantẽ-rantẽ saq tekadu taliq selapuq dengan tahenan bui ẽndah jari lepas.

²⁷ Kepale bui nike tinjot dait ures. Waktu ie serioq lawang-lawang bui kebukaq, ie serẽt klẽwangne gen matẽq diriqne, sẽngaq ie paran dengan-dengan tahenan bui sampun pelai selapuqne.

²⁸ Laguq Paulus bekuih keras-keras, "Ndaq matẽq diriqde! Tiang pade masih araq lẽq deriki!"

²⁹ Kepale bui nike tunas dilah terus pelai ojok dalem, dait siq ngijikne ie nyungkur lẽq julu Paulus dait Silas.

³⁰ Beterus ie jauq rasul-rasul nike sugul, dait bebase, "Bapaq-bapaq, napi saq harus tiang laksaneang adẽq tiang teselametang?"

³¹ Paulus dait Silas bejawab, "Percaye lẽq Junjungan Saq Mulie Deside Isa Almasih! Make side gen selamet -- side dait selapuq dengan saq araq lẽq balẽnde!"

³² Terus Paulus dait Silas jelasang manik Tuhan tipaq kepale bui nike dait tipaq selapuq dengan saq araq lẽq balẽne.

³³ Lẽq tengaq kelem nike ẽndah, kepale bui nike jauq ie pade beterus persiq bakat-bakat ie pade. Make ie dait selapuq dengan lẽq balẽne langsung tebaptis.

³⁴ Beterus ie jauq Paulus dait Silas ojok balẽne, dait ngaturin ie pade medaran. Ie dait selapuq keluargene seneng gati, sẽngaq mangkin ie pade percaye tipaq Allah.

³⁵ Jemaq kelẽmaqne, pejabat-pejabat kote nike ngutus petugas ojok bui jari nyampẽang prẽntah adẽq Paulus dait Silas telepas.

³⁶ Kepale bui nike nyampẽang hal nike lẽq Paulus, ie bebase, "Bapaq-bapaq, pejabat-pejabat kote niki sampun nyugulang prẽntah jari bẽbasang side pade. Mangkin Bapaq-bapaq kanggo ulẽq. Silaq lumbar dalem damẽ!"

³⁷ Laguq Paulus bebase lẽq petugas nike, "Tiang pade warge negare Roma. Ndẽqman teadilin tiang pade sampun tepecut lẽq julu dengan luwẽq dait tetamaq ojok dalem bui. Dait mangkin ie pade suruq tiang pade lalo tedoq-tedoq? Tiang pade ndẽq mẽlẽ! Suruq pejabat-pejabat kote nike dateng ojok deriki jari bẽbasang tiang pade."

³⁸ Petugas-petugas nike ngelaporang hal nike tipaq pejabat-pejabat kote nike. Waktu ie pade dengah bahwe Paulus dait Silas warge negare Roma, ie pade jari takut.

³⁹ Terus ie pade lumbar tunas maap lẽq Paulus dait Silas, beterus ngatong deduaqne sugul lẽman bui, dait tunas adẽq ie pade bilin kote nike.

⁴⁰ Paulus dait Silas bilin bui nike terus lumbar ojok balẽ Lidia. Sesampun bedait kance dengan-dengan percaye saq araq lẽq derike, dait ngebẽng semanget lẽq ie pade, Paulus dait Silas berangkat.

Kisah Para Rasul

Video Kisah Para Rasul 16

Ikuti Kami:

KONTAK | PARTISIPASI | DONASI