Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Adong do i Antiokia, bani kuria na ijai ai, nabi ampa guru, ai ma si Barnabas ampa si Simon, na ginoran si Niger, si Lucius na hun Kirene, si Manahen hasoman magodang ni raja Herodes ampa si Saulus.
2 Jadi sanggah martonggo anjaha marpuasa sidea bani Tuhan in, nini Tonduy Na Pansing ma, “Papulig hanima ma bangku si Barnabas ampa si Saulus hubani horja siondoskonon-Ku bani sidea.”
3 Jadi marpuasa ma sidea anjaha martonggo, itampeihon ma tanganni bani sidea, laho paingkatkon.
4 Sidea pe, dob isuruh Tonduy Na Pansing, tuad ma hu Seloikia; hunjai markapal ma sidea hu Pulou Kiprus.
5 Das honsi sidea hu Salamis, iambilankon sidea ma hata ni Naibata bani rumah-rumah parguruan ni Jahudi; si Johannes do pangurupi bani sidea.
6 Dob ibontas sidea ganup pulou ai das hu Papos, jumpah sidea ma sada halak Jahudi, parsibalik mata anjaha nabi sipahulah-hulah, na margoran Bar-Jesus.
7 Tondok do ia bani panggomgomi Sergius-Paulus, sada halak na pantas maruhur. Idilo ma si Barnabas ampa si Saulus, sihol do bogeionni hata ni Naibata.
8 Ia si Elimas, parsibalik mata ai (ai do arti ni goranni ai), ilawan do sidea, laho manlanglangi panrajai ai, ase ulang porsaya.
9 Gabe inolnol si Saulus, na margoran homa si Paulus, na ginokan ni Tonduy Na Pansing ai ma ia,
10 nini ma, “Ho, na gok akal-akal ampa hajahaton, anak ni sibolis, imbang ni sagala hapintoron! Seng maronti ope ho, papeolhon dalan ni Tuhan na pintor in?
11 Ai pe, tonggor ma, mangonai ma bam tangan ni Tuhan in! Ai pe pitung ma ho, seng be idahonmu mata ni ari.” Jadi mintor rambon anjaha golap ma ididah, dadap-dadap mando ia mangindahi na mambobaisi.
12 Jadi porsaya ma panrajai ai, dob ididah na masa ai, anjaha longang do uhurni bani podah ni Tuhan in.
13 Jadi marparau ma si Paulus ampa hasomanni hun Papos, gabe das ma sidea hu Perge, na i Pampilia. Tapi itadingkon si Johannes do sidea, mulak ma ia hu Jerusalem.
14 Itoruskon sidea do mardalan hun Perge, gabe das ma sidea hu Antiokia, na i Pisidia. Bani ari Sabat, laho ma sidea hu rumah parguruan lanjar hundul ma.
15 Dob salpu ibasa titah ampa surat ni nabi-nabi, isuruh sintua ni parguruan ai ma mangkatahon bani sidea, “Nasiam sanina, anggo adong hata sihatahonon nasiam bani na mabuei on, hatahon nasiam ma!”
16 Jadi jongjong ma si Paulus, ihilaphon ma tanganni anjaha nini ma, “Nasiam halak Israel ampa nasiam na mangkabiari Naibata, tangar nasiam ma!
17 Naibata ni bangsa Israel do mamilih ompungta, anjaha ipatimbul do bangsanta sanggah manginsolat i tanoh Masir, anjaha ipadarat do sidea hunjai marhitei tangan na pinagostong.
18 Ianju-anju do sidea hira-hira ompat puluh tahun i halimisan.
19 Dob iboiskon pitu bangsa i tanoh Kanaan, ibere Naibata ma tanoh ni sidea ai bahen parbagianan ni sidea, ai ma hira-hira ompat ratus lima puluh tahun dokahni.
20 Dob ai, ibere ma bani sidea panguhum das bani si Samuel, nabi ai.
21 Dob ai mangindo raja ma sidea, gabe ibere Naibata ma bani sidea si Saul, anak ni si Kis, marga Benyamin, dokahni ompat puluh tahun.
22 Jadi dob ipaturun ia, ipabangkit Naibata ma si Daud gabe raja bani sidea, isaksihon do pasalsi, nini, ʻDomma jumpah Ahu si Daud, anak ni si Jesse, harosuh ni uhur-Hu, sipadas sura-surang-Ku.ʼ
23 Hun bani ginomparni do iparoh Naibata bani Israel Sipaluah in, in ma Jesus, na pinarbagah-bagah in.
24 Paima roh Ia, iambilankon si Johannes do pandidion hamubahon ni uhur bani haganup halak Israel.
25 Anjaha laho marujung horja ni si Johannes, nini do, ʻIse do ahu ninuhur nasiam? Sedo ahu Ia, niarapkon nasiam ai. I pudingku do Ia roh, hurang talup do ahu mananggali sipatu-Ni.ʼ
26 Nasiam sanina, ginompar ni si Abraham, na mangkabiari Naibata! Hu banta do itongos hata haluahon on.
27 Ia pangisi ni Jerusalem ampa kopala-kopala ni sidea, halani seng itanda sidea Ia anjaha iarusi hata ni nabi, na binasa ganup ari Sabat, gabe iuhumi sidea ma Ia, laho pasaudkon ai.
28 Age pe seng dong jumpah sidea halani, ase marutang hosah Ia, ipindo sidea do humbani si Latus ase ibunuh Ia.
29 Ase dob ipasaud sidea haganup na tarsurat pasal-Si, ipasusur sidea ma Ia humbani hayu ai, anjaha ipatibal ibagas tanoman.
30 Tapi ipapuho Naibata do Ia humbani na matei.
31 Hun dokah do ipataridahkon diri-Ni hubani halak, hasoman-Ni tangkog hun Galilea hu Jerusalem, ai ma sonari, na manaksihon bani bangsa in.
32 Ambilan Na Madear on do iboan hanami bani nasiam, ai ma: Domma ipasaud Naibata bagah-bagah-Ni na bani ompungta, hu banta, ginompar ni sidea, marhitei na ipapuho Jesus,
33 songon na tarsurat bani Psalm dua, ʻAnak-Ku do Ho, sadari on do Ho Hutubuhkon.ʼ
34 Anjaha, paboa na maningon puho do Ia humbani na matei, anjaha na so mulak be Ia hu hamarsikon, sonon do ihatahon, ʻBerehonon-Ku do Bam pasu-pasu na mapansing ampa na totap, na bani si Daud ai.ʼ
35 Anjaha bani Psalm na legan ihatahon do, ʻSeng paturuton-Mu Na Pansing-Mu mangidah hamarsikon.ʼ
36 Ia si Daud, dob ipasaud rosuh ni Naibata bani goluhni, matei do ia, anjaha itanom hu lambung ni ompungni, gabe ididah do hamarsikon.
37 Tapi anggo na pinapuho ni Naibata, seng ididah hamarsikon.
38 Ase nasiam sanina, botoh nasiam ma, na ambilankon do bani nasiam hasasapan ni dousa marhiteihon-Si,
39 anjaha marhiteihon-Si ipintori do sagala na porsaya humbani haganup, na so boi pintor nasiam marhitei titah ni si Musa.
40 Ase, jaga nasiam ma, ase ulang mangonai bani nasiam, na hinatahon ni nabi-nabi,
41 ʻTonggor ma, nasiam sipanrehei, longang ma anjaha magou; ai hubahen do sada horja bani panorang nasiam, sada horja na so hinaporsayaan nasiam, age pe adong na mambaritahon bani nasiam!ʼ”
42 Sanggah na luar ai sidea, ipindo halak ai ma, ase ihatahon use hata ai bani sidea bani ari Sabat na mangihut hujai.
43 Dob salpu partumpuan ai, buei ma humbani halak Jahudi ampa parguru na daulat mangihutkon si Paulus ampa si Barnabas, gabe iambilani anjaha iojur ma sidea, ase totap sidea marianan ibagas idop ni uhur ni Naibata.
44 Anjaha bani ari Sabat na mangihut hujai, martumpu ma hira haganup pangisi ni huta ai, laho mambogei hata ni Tuhan in.
45 Tapi dob ididah Jahudi buei ni jolma ai, marsimburu ma sidea, iimbang anjaha irehei sidea ma ambilan ni si Paulus.
46 Dob ai nini si Paulus ampa si Barnabas ma ibagas hinsah ni uhur, “Patut namin bani nasiam parlobei ambilankononkon hata ni Naibata; tapi halani itulak nasiam do in, anjaha lang talup nasiam ninuhur nasiam parrupei bani hagoluhan sisadokah ni dokahni, jadi hubani halak sipajuh begu-begu ma hanami laho.
47 Ai sonon do itonahkon Tuhan in bennami, ʻHupajongjong do ho gabe panondang bani halak parbegu, ase iboan ho haluahon ronsi ujung ni tanoh on!ʼ
48 Mambogei ai marmalas ni uhur ma parbegu, anjaha ipuji sidea ma hata ni Tuhan in, gabe porsaya ma na dob tinontuhon hinan hu hagoluhan sisadokah ni dokahni.”
49 Gabe rarat ma hata ni Tuhan in hu sab tanoh on.
50 Tapi ipajobu-jobu halak Jahudi ma puang-puang na sangap anjaha na daulat, sonai na sangap-sangap ni huta ai, gabe ibahen sidea ma pangayak-ayakon dompak si Paulus ampa si Barnabas, lanjar iusir ma sidea hun nagori ai.
51 Jadi ipaspaskon sidea ma orbuk na longkot bani nahei ni sidea, lanjar laho ma sidea hu Ikonium.
52 Ia susian ai gok do bani malas ni uhur ampa Tonduy Na Pansing.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA