Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ba mbanua Niha Keriso ba Gandriokhia, so ndra sama'ele'õ ba ira guru, ya'ia Mbaranaba, Simeoni nifotõi Niha Saitõ, Lukio banua Girene, Menahe ni'ebua'õ si fao Razo Herode me iraono ira, ba Saulo.
2 Me lafosumange Lowalangi ba me lalau fuasõ, muhede khõra Geheha Lowalangi, imane, "Mifili khõgu Mbaranaba ba Saulo, ena'õ lahalõ halõw̃õ si no Uhonogõi khõra."
3 Me no aefa lalau fuasõ ba mangandrõ, lafazaw̃a dangara yaw̃a Mbaranaba ba Saulo ba lafatenge ira ma'adarua.
4 Bõrõ me nifatenge Geheha Lowalangi ira, numalõ ba Zeleukia Mbaranaba ba Saulo. Moloyo ira ba da'õ numalõ ba Zifirusi.
5 Me larugi Zalami, laturiaigõ Daroma Li Lowalangi ba nahia wangandrõ niha Yahudi. Itolo ira Yohane Mareko ba wofanõra.
6 Latõrõ hulo andrõ irugi Wafo. Falukha ira ba da'õ niha Yahudi sotõi Bari Yesu. Sebua elemu ia sangai tõi sama'ele'õ.
7 Seregio Faulo, gubernur ba hulo da'õ no awõ zebua elemu andrõ. No satuatua ba sonekhe gubernur andrõ. Ikaoni Mbaranaba ba Saulo me omasi ia ifondrondrongo Daroma Li Lowalangi.
8 Ba hiza ilaw̃a ndra Baranaba ba Saulo niha sebua elemu sotõi Elimasi andrõ, bõrõ me Elimasi (da'õ dõinia ba li Yunani) andrõ zangalui lala ena'õ bõi mamati gubernur khõ Yesu.
9 Ba Saulo -- nifotõi gõi Faulo -- no Ifatõrõ ia Eheha Lowalangi, irege itõngõ niha sebua elemu andrõ,
10 ba imane, "He si falimo, ono Gafõkha! Udu zi sõkhi fefu ndra'ugõ. Hana wa lõ õbato wamakiko ohitõ dõdõ Lowalangi ba wangorifi niha?
11 Faigi iada'e, Ihuku ndra'ugõ So'aya! Tobali lõ õ'ila niha, irege tebai õ'ila haga luo ba zi sabata." I'anema'õ so lawuo saitõ nirasoi Gelimasi sondruhõ hõrõnia, irege ibayaisi wowaõwaõ wangalui niha sololohe tangania.
12 Me i'ila gubernur zalua andrõ, faduhu dõdõnia khõ Yesu; bõrõ me ahõlihõli dõdõnia wamahaõ sanandrõsa khõ Zo'aya andrõ.
13 Moloyo Waulo ba ira awõnia numalõ ba Warega ba ba Wamefilia. Irõi ira Yohane Mareko ba da'õ, mangawuli ia ba Yeruzalema.
14 Latohugõ wofanõra moroi ba Warega numalõ ba Gandriokhia ba Wisidia. Me irugi luo Sabato dumadao ira bakha ba gosali.
15 Me no aefa mubaso Mbuku Moze awõ Mbuku ndra Sama'ele'õ, la'o'ou ira sondrõnia'õ gosali wanofu khõ ndra Faulo ba ira awõnia lamane, "He ira talifusõ, na so niw̃a'õmi famarou dõdõ ba niha sato andre, mifa'ema khõra."
16 Muzizio Waulo, ibe'e dandra tangania, ba imane, "He ya'ami ira talifusõgu soi Gizera'eli ba ira talifusõ tanõ bõ'õ ba da'e sangata'ufi Lowalangi! Mifondrondrongo niw̃a'õgu:
17 No Ifili ndra tuada Lowalangi soi Gizera'eli, ba Ibali'õ ira soi sebua me so na ira ba Miserai tobali si fatewu. Ba si fao kuaso sebua I'ohe ira Lowalangi mõi baero moroi ba danõ Miserai andrõ.
18 No Ibologõ dõdõ-Nia ba gamuatara ba danõ si mate õfa wulu fakhe wa'ara.
19 Ifufu fitu soi ba danõ Gana'ana ba wombagimbagi tanõ andrõ ba soi Gizera'eli ena'õ tobali khõra danõ andrõ.
20 Alua fefu da'õ ba zi õfa ngaotu a lima wulu fakhe wa'ara. Me no aefa wombagimbagi tanõ Gana'ana andrõ, Ibe'e khõra zanguhuku Lowalangi. Samueli zanguhuku safuria.
21 Ba aefa da'õ la'andrõ tebe'e khõra samõsa Razo. Ibe'e khõra Lowalangi Zaulo, ono Gisi moroi ba mado Mbeniami, tobali Razo khõra õfa wulu fakhe wa'ara.
22 Me no aefa Iheta ia Lowalangi moroi ba dadaomania, Ibali'õ Razo khõra Dawido. Ba da'e niw̃a'õ Lowalangi khõ Dawido, 'No Usõndra Dawido ono Giza'i sangomusoi'õ tõdõ-Gu. Ya'ia zamalua ni'era'era-Gu.'
23 Moroi ba nga'õtõ Dawido andrõ no Ihõnagõ Lowalangi zi tobali Razo Sangorifi ba soi Gizera'eli, si mane si no Ifabu'u. Ba Ya'ia Yesu andrõ Razo Sangorifi.
24 Fatua lõ Ibõrõtaigõ halõw̃õ-Nia Yesu, no ifarongogõ Yohane ba niha Gizera'eli ena'õ lafalalini gera'erara, larõi horõ ba lafabayagõ'õ ira idanõ.
25 Ba gafuriata halõw̃õ, imane Yohane ba niha, 'Haniha molo'õ era'erami ndra'odo andre? Tenga nibalobaloimi andrõ ndra'odo. Mitõngõni, tohare dania furigu; fe'amõi wamokai bõbõ mbadagahenia na'i no tebai ndra'odo.'
26 Nga'õtõ Gaberahamo ami ira talifusõ, ba fefu ndra talifusõ tanõ bõ'õ ba da'e sangata'ufi Lowalangi! No Ifa'ohe'õ khõda duria wangorifi andrõ Lowalangi;
27 ba hiza lõ aboto ba dõdõ niha sowanua ba Yeruzalema awõ ndra salaw̃ara wa no Ya'ia Zangorifi andrõ. Lõ aboto ba dõdõra wamahaõ ndra sama'ele'õ nibaso ero luo Sabato, irege lahuku Yesu. Ba hiza ba wolaura si manõ alua zi no tefa'ele'õ khõ ndra sama'ele'õ.
28 Hew̃a'ae lõ nisõndrara hadia ia khõ-Nia si tobali bõrõ wa tehuku Ia huku famunu, ba hiza la'andrõ khõ Wilato wamunu Ya'ia.
29 Ba me no awai lafalua fefu zi no tesura ba Mbuku Ni'amoni'õ, labe'e tou mboto-Nia moroi yaw̃a ba rõfa, ba labe'e Ia bakha ba lewatõ.
30 Ba hiza I'orifi Ia mangawuli Lowalangi moroi ba wa'amate.
31 Mato ha'uga ngaluo wa'ara tohare Ia ba wangoroma'õ Ya'ia ba niha si mõi awõ-Nia moroi ba Galilea numalõ ba Yeruzalema. Iada'e tobali ira samaduhu'õ khõ-Nia ba soi Gizera'eli.
32 Tobali, mafa'ema khõmi iada'e Duria Somuso Dõdõ andrõ: Hadia zi no Ifabu'u Lowalangi khõ ndra tuada,
33 no Ifalua khõda, me I'orifi Yesu mangawuli moroi ba wa'amate. Ba zinunõ si dua no musura, 'Onogu Ndra'ugõ, ma'õkhõ andre tobali Ama-U Ndra'odo.'
34 No I'orifi mangawuli Ia Lowalangi moroi ba wa'amate. Lõ irasoi sa'ae wa'amate ba lewatõ. Sanandrõsa ba da'õ no Imane Lowalangi, 'Ube'e khõmi wawu'usa li Ni'amoni'õ, si lõ tola lõ'õ mufatõrõgõigõ, si no Ufabu'u khõ Dawido.'
35 Si manõ gõi ba ayati bõ'õ imane, 'Lõ Õtehe obou Genoni-Mõ si lõ farõi andrõ bakha ba lewatõ.'
36 No mate Dawido ba no lako'o ia si fao ira tuada, me no ilau zi no Iw̃a'õ khõnia Lowalangi wangohalõw̃õgõi. No ahori tekiko fefu mboto Dawido.
37 Ba Yesu andrõ, ni'orifi Lowalangi mangawuli lõ si tekiko.
38 Bõrõ da'õ ya'ami ira talifusõ, lõ tola lõ aboto ba dõdõmi wa teturiaigõ khõmi duria wangefa horõ khõ Yesu andre; lõ tola lõ aboto ba dõdõmi, wa si faduhu tõdõ khõ-Nia, te'efa'õ ba ngawalõ horõ si tebai te'efa'õ ba goroisa Lowalangi nifa'ema khõ Moze.
39 (13:38)
40 Da'õ mbõrõ wa lõ tola lõ mitõngõni, ena'õ bõi alua khõmi zi mane niw̃a'õ ndra sama'ele'õ andre,
41 'Mihaogõ wanõngõni, ya'ami niha somasi mango'aya! Ahõli dõdõmi ba mate ami! Bõrõ me ba ginõtõ andre Ulau hadia ia zi tebai mifaduhusi tõdõ, hew̃a'ae so zangombakha khõmi.'"
42 Me larõi gosali andrõ ira Faulo ba Baranaba, la'andrõ niha si so ba gosali andrõ ena'õ lafuli ira ba luo Sabato ganete da'õ, ba wangombakha nasa ngawalõ hadia ia andrõ.
43 Me mõi baero niha moroi ba gosali, la'o'õ Waulo ba Baranaba niha Yahudi sato awõ soi bõ'õ si no mõi ba agama niha Yahudi. La'amenesi niha sato andrõ ira sinenge ena'õ lõ mamalõ ira ba wa'ebua dõdõ Lowalangi andrõ.
44 Ba luo Sabato ganete da'õ, arakhagõ fefu niha ba mbanua la'ondrasi ba wamondrondrongo Taroma Li Lowalangi.
45 Me la'ila niha Yahudi niha sato andrõ, afõkhõ sibai dõdõra. La'o'aya Waulo ba lafadaõ fefu niw̃a'õnia.
46 Ba itugu barani Waulo ba Baranaba, lõ aiw̃õ ira wahuhuosa. Lamane, "Lõ tola lõ tefa'ema khõmi Daroma Li Lowalangi. Ba hiza bõrõ me lõ omasi ami wanema, no mihonogõi samõsa wa tenga sinangea ami wanema fa'auri sindruhundruhu andrõ. Ba hiza marõi ami iada'e ba mõi ndra'aga ba soi bõ'õ.
47 Bõrõ da'e goroisa Zo'aya khõma; imane So'aya, 'No Uhonogõi ami tobali haga ba soi bõ'õ si tenga niha Yahudi, ena'õ mi'ohe wangorifi ba zi sagõrõ ulidanõ.'"
48 Ba me larongo soi bõ'õ si tenga niha Yahudi da'õ, ba omuso sibai dõdõra, ba lasunosuno Daroma Li Lowalangi. Niha nihonogõi Lowalangi wanõndra fa'auri sindruhu, faduhu dõdõra.
49 Teboloso Daroma Li Zo'aya gofu heza ba zi sagõrõ banua andrõ.
50 Ba lafawe'e ira niha Yahudi ndra salaw̃a ba mbanua andrõ awõ ndra alawe nga'õtõ zalaw̃a sangata'ufi Lowalangi. Lafatumbu'õ wa'udusa khõ ndra Faulo ba Baranaba, ba lafofanõ zi darua andrõ moroi ba mbanua da'õ.
51 La'anotogõ gawugawu ba gahera ira sinenge andrõ fõna niha sato si tobali famangelama, ba numalõ ira ba Nikoniu.
52 Omuso sibai dõdõ zolo'õ khõ Yesu ba Gandriokhia ba Ifatõrõ ira Eheha Lowalangi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA