Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Di delom jemaah di Antiokhia wat nabi-nabi rik guru-guru, yakdo Barnabas, Simeon sai dijuluki Si Halom, Lukius jak Kirene, Menahem sai dibalakko jama-jama Raja Herodes, rik Saulus.

² Waktu tian sedang beibadah jama Tuhan rik bepuasa, Ruh Allah cawa jama tian, "Pilihdo Barnabas rik Saulus khusus untuk-Ku, in tian ngeguaiko guai sai radu Kutantuko untuk tian."

³ Radu jak bepuasa rik bedua tian ngepikko culuk di atas Barnabas rik Saulus raduni ngutus tian rua.

⁴ Mani diutus ulih Ruh Allah, Barnabas rik Saulus berangkat mik Seleukia. Jak udi tian belayar mik pulau Siprus.

⁵ Waktu sampai di Salamis, tian ngabarko cawa Allah di lamban-lamban ibadah Yahudi. Yohanes Markus ngebantu tian delom lapahni tian.

⁶ Sunyin pulau udi tian jelajahi sampai di Pafos. Di dudi tian betungga jama sai jelma Yahudi, gelarni Bar Isa. Ia tukang sihir sai ngaku diri nabi.

⁷ Sergius Paulus, gubernur pulau udi yakdo kantik redik tukang sihir udi. Gubernur udi jelma sai cerdas rik bijaksana. Ia ngurau Barnabas rik Saulus mani ia mirak ngedengi cawani Allah.

⁸ Kidang Barnabas rik Saulus ditentang ulih Elimas ahli sihir udi, mani Elimas (udido gelarni delom bahasa Yunani) berusaha in gubernur udi dang sampai percaya jama Isa.

⁹ Kidang Saulus -- sai digelar Paulus -- dikuasai ulih Ruh Allah, sehingga ia ngeliak tukang sihir udi,

¹⁰ raduni cawa, "Hai, jelma sai nipu ulung, anak jahanam! Niku musuh seluruh sai betik. Mengapi niku mak haga taru nyadangko rencana Allah untuk nyelamatko manusia?

¹¹ Tano liak, Tuhan haga ngehukum niku! Niku haga jadi buta, sampai niku mak dapok ngeliak cahaya matarani lagi sementara waktu." Waktu seno juga Elimas ngerasa wat kabut sai halom nyalok matani, sehingga ia lapah ngeraba-raba rik nyepok jelma untuk nuntun ia.

¹² Waktu gubernur udi ngeliak api sai radu tejadi, ia percaya jama Isa; mani ia kagum nihan tentang ajaran-ajaran Tuhan.

¹³ Jak Pafos, Paulus rik kantik-kantikni belayar mik Perga di Pamfilia. Di dudi Yohanes Markus ninggalko tian, raduni muloh mik Yerusalem.

¹⁴ Jak Perga, tian nerusko lapahni mik Antiokhia di Pisidia, kak raduni waktu rani Sabat tian mik mejong delom lamban ibadah.

¹⁵ Radu jak Buku Musa rik Buku Nabi-nabi dibacako, jelma-jelma sai mimpin lamban ibadah ano ngayun ulun betanya jama Paulus rik kantik-kantikni, "Puari-puari, kik Puari ngedok suatu petuah untuk ulun-ulun inji, silako nyampaiko petuah ano."

¹⁶ Paulus pun cecok, raduni ngeni isyarat jama culukni, raduni cawa, "Puari-puariku jelma Israel rik sunyinni puari-puari sai barehni di dija sai taat jama Allah! Cuba dengiko nyak:

¹⁷ Allah bangsa Israel radu milih nenek muyang ram, rik ngejadiko bangsa inji bangsa sai balak sewaktu tian tinggal di Mesir sebagai jelma asing. Kak raduni jama kuasa sai balak Allah ngusung tian luah jak Mesir.

¹⁸ Ia besabar tehadap tingkah laku tian di padang gurun epak puluh tahun sakani.

¹⁹ Pitu bangsa Ia musnahko di negeri Kanaan untuk ngebagi-bagiko negeri ano jama bangsa Israel in negeri ano jadi kedau tian.

²⁰ Sunyinni seno belangsung 450 tahun sakani. Radu jak pembagian negeri Kanaan ano, Allah ngeniko jama tian hakim-hakim. Hakim paling akher iado Nabi Samuel.

²¹ Kak raduni tian ngilu sai raja. Allah ngeniko jama tian Saul anak Kis jak suku bangsa Benyamin untuk jadi raja tian selama epak puluh tahun.

²² Radu jak Allah ngegiserko ia jak kedudukanni, Allah ngangkat muneh Daud jadi raja tian. Rik injido sai diucakko Allah tentang Daud, 'Nyak radu ngehalu Daud anak Isai udi sai jelma sai nyenangko hati-Ku. Iado jelma sai haga ngelaksanako kehaga-Ku!'

²³ Jak keturunan Daud udido Allah nyediako bagi bangsa Israel sai Raja Penyelamat, injuk sai radu dijanjiko-Ni. Rik Isa udido Raja Penyelamat udi.

²⁴ Semakkung Isa mulai ngejalanko tugas-Ni, Yohanes radu nyeruko jama ulun-ulun Israel, in tian betubat jak dusa tian rik dibaptis.

²⁵ Rik ngejelang akher guaini, Yohanes cawa jama ulun-ulun, 'Sapa nyak inji nurut pendapat keti? Nyak lain Jelma sai keti tunggu-tunggu. Ingok, Jelma udi haga ratong radu jak nyak; untuk ngebukak sepatu-Ni pun nyak mak layak!'

²⁶ Puari-puari keturunan Abraham, rik seluruh Puari-puari sai bareh di dija sai taat jama Allah! Allah radu ngirim jama ram kabar keselamatan ano;

²⁷ mani jelma-jelma sai tinggal di Yerusalem rik jelma-jelma sai mimpin tian mak sadar bahwa Iado penyelamat ano. Tian mak ngerti ajaran nabi-nabi sai dibacako unggal rani Sabat, sehingga tian ngehukum Isa. Kidang justru ngelakuko sai injuk reno tian penyebab bahwa api sai dinubuatko ulih nabi-nabi udi tejadi.

²⁸ Walaupun tian mak ngehalu sai hal pun jama Ia sai patut dihukum jama hukuman mati, kidang tian ngilu jama Pilatus in Ia dibunuh.

²⁹ Rik radu jak tian selesai ngelaksanako sunyinni sai radu tetulis delom Alkitab tentang Ia, tian ngeregahko mayat-Ni jak kayu salib, raduni ngepikko Ia delom kubor.

³⁰ Kidang Allah ngehurikko Ia luot jak kematian.

³¹ Kak raduni berani-rani sakani Ia ratong ngeliakko diri jama ulun-ulun sai radu ratong jama Ia jak Galilea mik Yerusalem. Tian udido sai tano jadi saksi-saksi untuk Ia jama bangsa Israel.

³² Jadi, tano inji sekam nyampaiko Kabar Betik seno jama niku: Api sai Allah radu janjiko jama nenek muyang ram,

³³ seno radu Ia laksanako jama ram jama ngehurikko Isa luot jak kematian. Mani di delom Alkitab Mazmur sai kerua wat tetulis, 'Nikudo Anak-Ku, di rani inji Nyak radu jadi Bapa-Mu.'

³⁴ Allah radu ngehurikko Ia luot jak kematian. Tano Ia mak lagi ngalami kematian delom kubor. Tentang hal ano Allah cawa, 'Nyak haga ngeniko jama Niku janji suci sai pasti haga ditepati, sai radu Kujanjiko jama Daud.'

³⁵ Injuk reno juga di delom ayat bareh diucakko, 'Niku mak haga naganko Jelma Sai Ngebantu Niku sai setia udi mebusuk di delom kubor.'

³⁶ Daud radu mati rik dikuborko juga jejama jama nenek muyangni, radu jak ia ngelakuko api sai Allah kayun ia lakuko. Mayat Daud pun radu hancor bela sunyinni.

³⁷ Kidang Isa, sai Allah hurikko luot jak kematian, Isa mak hancor bela.

³⁸ Ulihni seno Puari-puari, harus keti pandai bahwa liwat Isa inji kabar tentang pengampunan dusa dikabarko jama niku; keti harus pandai bahwa unggal jelma sai percaya jama Ia, dibebasko jak sunyin dusa sai mak dapok dihapusko liwat perintah-perintah Allah sai disampaiko ulih Musa.

³⁹ (13:38)

⁴⁰ Reno sebabni keti harus memperhatiko betik-betik, dang sampai tejadi jama keti api sai nabi-nabi cawako inji,

⁴¹ 'Perhatiko betik-betik, hai niku jelma-jelma sai gering ngehina! Niku haga hiran, raduni mati! Mani pada zaman inji Nyak sedang ngelakuko sai hal sai niku tenggalan mak percaya, walaupun wat jelma nerangkoni jama niku.'"

⁴² Waktu Paulus rik Barnabas ninggalko lamban ibadah udi, jelma-jelma di lamban ibadah udi ngilu tian muloh luot waktu rani Sabat berikutni, untuk nerangko lebih lanjut tentang hal-hal seno.

⁴³ Radu jak jelma-jelma luah jak lamban ibadah udi, Paulus rik Barnabas ditutuk ulih lamon ulun Yahudi rik jelma bangsa bareh sai radu kuruk agama Yahudi. Maka rasul-rasul udi nasihatko tian in tian terus besandar jama rahmat Allah.

⁴⁴ Waktu rani Sabat berikutni, hamper sunyinni jelma di kota ano ratong ngedengi cawa Tuhan.

⁴⁵ Waktu jelma-jelma Yahudi ngeliak ulun lamon udi, tian sesera nihan. Tian ngehina Paulus rik nantang seluruh sai dicawakoni.

⁴⁶ Kidang jama lebih bani lagi Paulus rik Barnabas cawa terus terang. Tian cawa, "Cawa Allah sangun harus disampaiko jama keti mena. Kidang ulihni keti mak haga nerimani, keti radu nantuko tenggalan bahwa keti mak patut nerima hurik sejati rik kekal. Rik tano sekam ninggalko keti rik mik jama bangsa bareh.

⁴⁷ Mani injido perintah Tuhan jama sekam; Tuhan cawa, 'Nyak radu nantuko niku jadi suatu terang untuk jelma-jelma bangsa bareh sai lain Yahudi, in niku ngeratongko keselamatan jama seluruh dunia.'"

⁴⁸ Waktu jelma-jelma bangsa bareh sai lain Yahudi ngedengi ano, tian senang nihan, raduni muji-muji cawa Tuhan. Rik jelma-jelma sai radu ditantuko ulih Allah untuk mansa hurik sejati rik kekal, jelma-jelma udi percaya.

⁴⁹ Cawa Tuhan pun tesebar mik dipa-dipa di seluruh daerah udi.

⁵⁰ Kidang tukoh-tukoh kota ano rik bebai-bebai jak golongan jelma pejabat sai rabai jama Allah, dihasut ulih ulun-ulun Yahudi. Tian nimbulko permusuhan tehadap Paulus rik Barnabas, rik nguser tian rua jak daerah ano.

⁵¹ Maka rasul-rasul udi ngibasko harbuk cukut tian di hadap jelma-jelma udi sebagai peringatan, raduni mik di Ikonium.

⁵² Jelma-jelma sai nutuk di Antiokhia riang nihan rik dikuasai Ruh Allah.

Kisah Para Rasul

Video Kisah Para Rasul 13

Ikuti Kami:

KONTAK | PARTISIPASI | DONASI