Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nai hataholi salanik Antiokia la dalek, hapu nabi-nabi ma mese-mese nala, fo nde Barnabas, Simon, fo ala foin na'de Ta'e Nggeok, Lukius neme Kirene mai, Menahem, fo lakaboboin sama-sama no Mane Herode sa, ma Saulus.

² Lelek ala hule-haladoi neu Lamatua ka, ma ala puasa, boema Manetualain Dula Dale na nafa'das nae, "Hele ma Barnabas no Saulus da'di Au hataholing, fo daenga duas tao-no'i tatao-nono'ik fo Au aketu basan soaneu duas so."

³ Ala puasa ma ala hule-haladoi basa boema, ala lalaa lima nala neu Barnabas no Saulus, boema ladenu duas leona.

⁴ Hu ka nde Manetualain Dula Dale na nadedenu na, de Barnabas no Saulus leu leo Seleukia leu. Duas sa'e ofak leme ndia leo pulu Sipru sa leu.

⁵ Lelek ala losa Salamis boema, ala tui-benga Manetualain dede'a-kokolan nai uma mamaso Yahudi la. Yohanis Markus tulu-fali duas nai leleo-lala'o nala dalek.

⁶ Ala la'ok lafeo pulu ndia, losa Pafos. Ala losa naa boema, duas latongo lo hataholi Yahudi esa na'de Bar Yesus. Hataholi ndia mana suangi mangalauk. Nafa'da aon nae, ndia nabi boe.

⁷ Pulu ndia gobelno la na'de Sergius Paulus, tia-lai malolen tou mana suangik ndia. Gobelnol ndia hataholi malelaina ma manatee tenok. Nalo Barnabas no Saulus nana ana hii namanene Manetualain dede'a-kokolan.

⁸ Tehu Elimas fo tou mana suangik ndia, ana la'ban Barnabas no Saulus, nana Elimas (fo na'de Yunani na nde ndia) ana sanga enok fo boso nalosak gobelnol ndia namahele Yesus.

⁹ Tehu Saulus, fo loken soona lae, Paulus boe, Manetualain Dula Dale na koasa nan, de nalosa nanganalo tou mana suangik ndia,

¹⁰ boema nafa'dan nae, "Hei hataholi mana tipudaik ma nanasoo-supa ko nei! O musu mo basa hata malole lala'ena. Tao le'e de o ta hahae tao malutu Manetualain dale tutu'un soaneu Ana soi-tefa hataholi daebafa ka fa?

¹¹ Besak ia meten te, neukose Lamatua ka huku-doki o! Neukose o da'di pokek, fo o ta mita le'do mata na, nai faik de'ubee dale na." No hatemetak ndia boe, Elimas name'da makamamasu nggeo ka potiketu mata na de nalosa ana la'ok nafangganggao sanga hataholi fo ana helan.

¹² Lelek fo gobelno la nita manda'dik ndia boema namahele Yesus. Nana ana dodoo doak nanoli-nafa'dak la'eneu Lamatuak Yesus.

¹³ Paulus no nonoo nala sa'e ofak leme Pafos leo Perga, fo nai Pamfilia. Ala losa ndia boema, Yohanis Markus la'oelas de ana fali leo Yerusalem neu.

¹⁴ Leme Perga mai de lakandoo leo Antiokia fo nai Pisidia, de fai Saba ta losa boema, leu leo uma mamasok leu.

¹⁵ Ala lees basa Musa Susula na, ma Nabi la Susula na boema, uma mamasok ndia mauli-malanga nala ladenu hataholi neu nafa'da Paulus no nonoo nala nae, "Metema tolanoo kala nau tao matetea-mahehele ma kokoe-nanasi hataholi ia la soona, manduku-malosa kana leona."

¹⁶ Boema Paulus fo'a napadeik de ana fe ta'du ninik lima na fo ala bedenge. Basa boema nae, Tolano-tolanoo Israel ngala ma basa hataholi kamahehelek manai ia la lemin! "So'ba mamanene su'dik au dei.

¹⁷ Leoina Israe la Manetualai na hele basa ita bei ba'ikai nala, fo Ana tao leoina ia da'dineu leoina matuaina nai lelek ala bei leo leme Masir, da'dileo hataholi manamai. Basa boema, no Manetualain koasa matuaina na de Ana kaluahenis leme Masir mai.

¹⁸ Ana ta haelai namanasa ha'da-tatao nala, nai lelek fo leme mo maloa teuk hahulu dale na.

¹⁹ Ana tao nakalulutuk leoina hitu neme nusa Kanaa na, de Ana baba'e nusak ndia neu leoina Israe la, fo daenga nusak ndia ana da'di sila pusakan.

²⁰ Basa sila la ala da'di teuk natun ha limahulu. Manetualain ba'e basa nusa Kanaa na boema, Ana fes mana maketu-mala'di. Mana maketu-mala'di mate'e ka nde Samuel.

²¹ Basa boema loke fe sila manek esa. De Manetualain fes Saul fo Kis ana na, fo neme leo Benyami na mai, de ana da'di sila manen teuk hahulu dale na.

²² Manetualain kekoheo kana neme kandela nangatutuu na mai boema, Manetualain so'u fes Dauk da'di sila manen. Ma hu ka nde dede'ak ia de Manetualain kokolak la'eneu Dauk nae, 'Au bubuluk basa Dauk fo Isai anan ndia, nandaa no Au dale nga. Ndia nde hataholi fo neukose ana tao-no'i Au hihii-nanau nga.'

²³ Neme Dauk tititi-nonosin ndia mai, de Manetualain sadia fe leoina Israe la Mane Mana Soi-Tefak esa, sama leo Ana helu basa ka. Fo Yesus ndia nde Mane Mana Soi-Tefak ndia.

²⁴ Yesus beita ho'u ue-le'din fa te, Yohanis nalo neu hataholi Israe la fo ala tukatei-saledale leme sala-singo nala mai fo salanis.

²⁵ Ma nai lelek fo Yohanis sanga nakababasak ue-le'din boema, nafa'da hataholi la nae, 'Tunga emi hahapu ma, see au ia? Au ta nde Hataholi fo emi mahani talu-talu ka fa. Mafandedelek, te basa au fai nga soona, neukose Hataholi ndia Ana mai, fo leomae o'duheni ta'bu ei na boeo, au ta andaa fa.'

²⁶ Tolano-tolanoong fo Abraham tititi-nonosin, ma basa tolano-tolanoo fe'ek manai ia fo mana mamahele Manetualai na lemin! Manetualain haitua fe ita halak fo manini maso'dak ndia so;

²⁷ nana hataholi fo mana leo nai Yerusale mala lo sila mauli-malanga nala ta lame'da fa te, se'kona Hataholi ndia nde mana soi-tefa. Ala ta lalelak nabi la nanolin fo nanalees tunga-tunga fai Saba ta fa, de nalosa ala huku Yesus. Tehu se'ko na no tatao-nono'i leondia ka de ala tao la hata fo nabi la lafa'da ela ka, ana da'di.

²⁸ Leomae ala ta hapu salan faanak boen, fo nandaa hukunisa fan, tehu loke Pilatus fo ala taolisan.

²⁹ Ala tao letetu basa hata fo nanasulak nai Susula Malalaok dale la'e neun, boema lakona la popola na neme ai nggangek lain mai de latoin.

³⁰ Tehu Manetualain tao naso'da fali kana neme mamate sa mai.

³¹ Basa boema, tunga-tunga faik Ana mai fo natu'du aoina na neu hataholi fo ala la'ok lon neme Galilea leo Yerusalem leu. Hataholi sila nde besak ia, ala da'di sakasii soaneun, ba'eneu leoina Israe la.

³² Da'di besak ia, ami manduku-malosak Hala Malole ndia neu emi: Hata fo Manetualain helu basan neu ita bei ba'ikai nala,

³³ ndia Ana tao-no'i basan soaneu ita, ninik Ana tao naso'da falik Yesus neme mamate sa mai so. Nana nai Mazmur kadua dalek, nanasulak nae, 'O nde Au ana nga, nai faik ia dale na, Au da'di O Amam so.'

³⁴ Manetualain tao naso'da fali kana neme mamate sa mai so. Besak ia, neukose Ana ta la'ola'di mamate sa nai bolo mamates dale so'on. La'eneu dede'ak ndia de Manetualain nafa'da nae, 'Neukose Au fe O hehelu-balataa malalao-malalafuk, fo tao leo bee o nanatao natetuk, fo Au helu basan neu Dauk so.'

³⁵ Leondiak boe, nai lalane fe'e kala dalek, nananafa'dak nae, 'Neukose, O ta po'ilotak O Atam mana lilinekam ndia, Ana pulu-po'o nai bolo mamates dale fa.'

³⁶ Dauk tao nakababasak hata fo Manetualain fen tao-no'in, boema maten de latoi lakabubuan no bei ba'ikai nala so boe. Popola na, noeheni la'iesa kana so boe.

³⁷ Tehu Yesus fo Manetualain tao naso'da fali kana neme mamate sa mai ndia, popola na ta noeheni fan.

³⁸ Hu ndia de, tolanoo kala muse bubuluk te tunga Yesus ia, de halak la'eneu sala-singok nanafe do'o do ampo na, nanatui-bengak neu emi; emi muse bubuluk, te hataholi fo namahele nana, nanasoi po'ik neme basa sala-singok fo ta bisa nanalosehenik tunga Manetualain paletan fo Musa nanduku-nalosa kana fa.

³⁹ (13:38)

⁴⁰ Hu ndia de emi muse manea matalolole, fo boso nalosak hata fo nabi la lafa'dak ia, ana tu'da la'e emi. Nabi la lafa'da lae leo ia,

⁴¹ 'Manea matalolole, hei emi fo hataholi mana hii ka'da makamumulu-makamamae kala lemin! Neukose emi dodoo doa kana, fo mateheni mala! Nana nai le'dofai besak ia, Au bei tao hata esa, fo neukose emi ta mamahele fan, leomae hapu hataholi nafa'da mangaleledon neu emi boe.'"

⁴² Lelek fo Paulus no Barnabas la'oela uma mamasok ndia, boema hataholi manai uma mamasok ndia dalek lokes fo fai Sabat mana mai ka soona, ala fali seluk fo lafa'da mangalele'do seluk lakandoo dede'ak sila la.

⁴³ Hataholi sila la kalua leme uma mamasok dale mai boema, hataholi Yahudi la lo leoina fe'ek fo mana masok agama Yahudi a ala tunga Paulus no Barnabas. Boema Lamatua ka hataholi nadedenun kaduak sila la lanoli-lafa'das, fo daenga lamahena lakandoo neu ka'da Manetualain susue-lalain.

⁴⁴ Neu fai Sabat mana mai ka boema, hii-hii nae basa hataholi manai kota ndia dalek lala'ena, ala mai lamanene Lamatua ka dede'a-kokolan.

⁴⁵ Lelek fo hataholi Yahudi la lita hataholi makadotok sila la boema, dale nala he'di lanseli. Lakamumulu-lakamamaek Paulus, ma ala la'ban ana kokolak dede'a kala.

⁴⁶ Tehu Paulus no Barnabas boetai lapani seluk, de ala kokolak no le'do-le'dok lae, "Memak Manetualain dede'a-kokolan muse nanananduku-nalosak nakahuluk neu emi. Tehu, hu ka nde emi ta nau sipo kana fa de emi nde maketu aom mae, emi ta mandaa sipo so'da matetu ka, ma mana ketu basa ta ka fa. Hu ndia de ami meu lo leoina fe'e kala meu.

⁴⁷ Nana Lamatua ka fe ami paleta nde ia. Lamatua ka nae, 'Au hele basa emi, da'di mangale'dok ba'eneu leoina ta Yahudi la, fo ela emi mini maso'dak fe hataholi daebafa ka lala'ena.'"

⁴⁸ Nai lelek leoina fe'ek fo hataholi ta Yahudi la lamanene dede'ak ndia, boema lamahoko lanseli, de ala koa-kio Manetualain dede'a-kokolan. Ma hataholi fo Manetualain hele basa kala lamahele ala hapu so'da matetu ka, ma mana ketu basa ta ka.

⁴⁹ Boema la'eneu Lamatua ka dede'a-kokolan soona, ana mulai nakapepela leo basa nusak ndia dalek lala'ena.

⁵⁰ Tehu hataholi Yahudi la dudungu-papau hataholi matua-madema manai kota ndia, hataholi matua-madema fo mana bii neu Manetualai na ina nala. Ala tao musu lo Paulus no Barnabas, de ala usiheni duas leme nusak ndia mai.

⁵¹ Boema hataholi nadedenu kaduak sila la, ala sasapuheni daesopuk manai duas ei dale nala nai hataholi sila la matan, fo ana da'di neu nasanene'dak esa, boema duas la'o leo Ikonium leu.

⁵² Hataholi mana tunga Lamatuak manai Antiokia la, lamahoko lanseli, ma Manetualain Dula Dale na koasa nalas.

Kisah Para Rasul

Video Kisah Para Rasul 13

Ikuti Kami:

KONTAK | PARTISIPASI | DONASI