Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Den ba'tu pira-pira nabi sola guru jamaa jio kota Antiokhia: Barnabas, Simeon to disanga too tomalotong, Lukius to-Kirene, Menahem to dipelobohhi sola Raja Herodes Antipas tonna peapa, na Saulus.

² Ia tonna massambajang na puasa too, nakuanni Roh Allataala, "Pileii to Barnabas sola Saulus, anna jamai to jaman mangka kupattantuanni."

³ Ia tonna mangka puasa sola massambajang, napassambajanganni to Barnabas sola Saulus, namane' ssuai sola dua male.

⁴ Pangpatujun-Na Roh Allataala namale Barnabas sola Saulus lako kota Seleukia, na mangkappala' jio mai male lako pulau Siprus.

⁵ Ia tonna ratu lako kota Salamis jio pulau Siprus, mpangpeissenanni kadan-Na Puang Allataala lan bola passambajangan to-Yahudi. Den todai Yahya Markus to nasolan mbalii.

⁶ Naguririkki ngasan joo pulau ratu lako kota Pafos. Den mesa' to-Yahudi nasitammuan jio disanga Baryesua, macca massando na ssanga too kalena nabi. (Lan basa Yunani disanga Elimas.)

⁷ Sikabudai melo to gubernur jio disanga Sergius Paulus, mesa' tomacca. Madoangngi ssa'ding kadan-Na Puang Allataala. Iamo joo nasuai to Barnabas sola Saulus ratu.

⁸ Apa ia joo sando mpengkulle-kullei hhalangngii to Barnabas sola Saulus, nakua danggi' namatappa' lako Puang Isa joo gubernur.

⁹ Apa ia to Saulus to disanga too Paulus nakuasai Roh Allataala nakaje'jekki.

¹⁰ Nakuanni, "Ee bati'na Ballisi'! Ewalinnako sininna kameloan! Topangnguraga la'da'ko! Te'daraka mulantorroi hhalangngi akkatta-Na Puang Allataala mpasalama' tolino?

¹¹ La mukita to napabalaranko Puang! La buta bang unamoko tee too, ba'tu pirang alloko to tanglapakita." Ta'pa memmapattangmi pengkitanna, sanga susi to kumua den apa malotong ssapu' matanna na sumaka'-maka' bangmira ntuntun tau la ssolanni.

¹² Memmatappa'i joo gubernur tonna mangka ngkitai joo, sanga jangngah tarruhhi ssa'dingngi joo pangngajaran-Na Puang.

¹³ Mangkappala'mi Paulus sola to solana jio mai kota Pafos lako kota Perga jio tana Pamfilia. Ntuumo jio nanii messarak Yahya Markus napole lako kota Yerusalem.

¹⁴ Apa ia to Paulus sola Barnabas mpatarruhhi kalingkanna jio mai kota Perga lako kota Antiokhia jio tana Pisidia, na ia tonna Allo Katorroan mentamai bola passambajangan to-Yahudi nasicadokkoan lan.

¹⁵ Ia tonna mangkamo dibaca sura'na Nabi Musa sola sura' nabi laen, massuami to kapala bola passambajangan ngkuan tau namekutana lako Paulus sola solana. Nakuanni, "Ee todipusile'to! Tulungkan mipaui ke denni kada pangpangngajah lako tee mai tau."

¹⁶ Ke'dehmi Paulus nampupangngimba limanna nta'tan tau nakua, "Ee kamu' padangku' to-Israel na kamu' to ssompa todamo Puang Allataala, pesa'dingngii!

¹⁷ Ia to Puang Allataala, to nasompa bangsa Israel, mangka mpilei tojolota', na pupemmatonggoi tee bangsa tonna mentoratupa jio tana Mesir, namane' mpasunni jio mai, mpake kuasa kamala'biran-Na.

¹⁸ Patang pulo taunna jio padang pallawangan nanii ssabbarasanni Puang Allataala to panggaukanna.

¹⁹ Ia tonna mangka ssabu'i pitu bangsa jio tana Kanaan, natawa-tawanni joo tana napumanahhi.

²⁰ Den agi-agi pata ratuh limang pulo taun masainna joo. Ia tonna mangkamo ditawa-tawa joo tana Kanaan, nabenmi Puang Allataala ba'tu pira-pira pangbicara to ntoe too parenta. Nabi Samuelmo to pangbicara tampakkana.

²¹ Mangkai joo naben omi Puang Allataala to Saul menjaji rajana situru' pangpeta'danna, namangparenta patang pulo taun masainna. Ia joo Saul anakkana Kis, bati'na Benyamin.

²² Ia tonna pasoro'i Puang Allataala to Saul menjaji raja, naangka'i to Daud menjaji raja ssullei. Nakua Puang Allataala mpaui to Daud, 'Kuampa'mi to tolampugauk pakkaeloran-Ku', to la mpemasannangngi penawang-Ku', iamo tee Daud anakkana Isai.'

²³ Pole jio mai bati'na Raja Daud nanii Puang Allataala mpasadiai to Raja Mangpasalama' lako bangsa Israel, iamo joo Puang Isa, susi to pura napau jolo.

²⁴ Ia tonna te'dapa napamulai jaman-Na Puang Isa, nasuami Nabi Yahya to to-Israel kumua namengkatoba' jio mai dosana na dijio'.

²⁵ Na ia tonna la katampakannamo Nabi Yahya mangjama, nakua mangkada, 'Ia tee aku' tangngiana' to raja mitajan, apa den ia to la ratu ke mangkamo', na moi mbukai sapatun-Na tangsipato' toona'.'

²⁶ Ee todipusile'to, la kamu' to bati'na Nabi Ibrahim, la kamu' to ssompa todamo Puang Allataala! Mangkamo kamu' naparatuan Puang Allataala to Kareba Kasalamatan.

²⁷ Ia to to-Yerusalem sola pekaamberanna cia'i ntarimai to Puang Isa. Te'da napahangngi to pangngajahna nabi to tuli dibacanni ke Allo Katorroan oi, iamo joo napangpebunoanni. Apa ia toomora joo kanabunoanna, anna jaji apa to pura napau nabi tonna anu'.

²⁸ Moi nate'da naampa'i to sipato'na la dinii mbunoi, apa napeta'dai lako Pilatus anna dibuno.

²⁹ Na ia tonna mangkamo napugauk sininna to diuki' jolomo to jiona Ia lan Sura' Allataala, napupellaomi to batang rabukku-Na jao mai kaju sitamben, namane' mpeliangngi.

³⁰ Apa napatuo pole'i Puang Allataala jio mai kamatean.

³¹ Masaipa nanii mpangpekitan kalena lako to tomangka nasolan jio mai tana Galilea lako kota Yerusalem. Ia ngasanmo to mpangpeissenanni tee too lako bangsa Israel kumua Raja Mangpasalama' to Puang Isa.

³² Na ia tee kami' kipauanmo kamu' to Kareba Kasalamatan, kumua ia to apa pura nabasse Puang Allataala lako tojolota',

³³ mangkamo napugauk Puang Allataala lako kita', tonna patuoi to Puang Isa jio mai kamatean. Susi to napau jolomo lan Pangpujian mangpenduan, 'Ikomo Anak-Ku'. Mammula tee too Aku'mo ambe'mu.'

³⁴ Mangkamo napatuo pole' Puang Allataala jio mai kamatean, na te'damo nalamate pole'. Napamanassamo Puang joo lan tee kada nakua, 'La kuben kamu' barakka', to mangka kupasanan Raja Daud kumua nang la jajinna ia.'

³⁵ Susi toomi to apa dipau lan Pangpujian laen nakua, 'Te'da taeloran batang kaleku' la buruk lan lamunan, sanga Aku'mo kaunan-Ta' to mangka tapilei.'

³⁶ Ia tee kada te'da nadipatuju lako Raja Daud. Matemi tee Raja Daud tonna mangkamo mpugaukki to nasuanni Puang Allataala. Ia tonna matemo dilamunni sola tojolona, anna buruk toomo to batang rabukkuna.

³⁷ Apa ia to Puang Isa napatuo pole'mi Puang Allataala jio mai kamatean, na te'da Ia nasusi Raja Daud.

³⁸ Ee todipusile'to! Parallu miissen kumua nadampangan kamu' Puang Allataala, nasaba' apa to napugauk Puang Isa. Ia to atoranna Nabi Musa te'da nakullei mpupenjaji tomelo kamu',

³⁹ apa ia to tomatappa' lako Puang Isa direken tomelo.

⁴⁰ Iamo joo la mangpesa'ding melo kamu', danggi' najaji lako kalemi to apa dipau lan sura'na nabi nakua,

⁴¹ 'Ee kamu', to tangkasiri' Puang Allataala! Mangpesa'ding melo kamu'! La jangngah kamu' ammisabu', sanga ia tee wattu den apa kupugauk to la te'danna milangkatappa'ii, moi naden tau mpamanassan kamu'.'"

⁴² Ia tonna messunmo Paulus sola Barnabas lan mai bola passambajangan, napeta'dai tau jio naratu ke Allo Katorroan pole'i la mpangpangngajaran pole'i joo.

⁴³ Mangkanna massambajang, buda to-Yahudi na tau laen to mangngagama to-Yahudi todamo menturu' lako Paulus sola Barnabas. Naajahhi sola dua napangngingaranni kumua nada'tan rrannuan pangkamoja'-Na Puang Allataala.

⁴⁴ Ia tonna Allo Katorroan pole'mo, sangratuan ngasanni to tau lan joo kota mpesa'dingngi kadan-Na Puang Allataala.

⁴⁵ Ia tonna kitai to-Yahudi to tobuda, masere atimi nacapa'i to Paulus, napasala tooi sininna to napaunna.

⁴⁶ Apa kannori sabarani-raninna Paulus sola Barnabas ntarrusanni kada nakua, "Na kamu'mo to-Yahudi jolo' dipauan to kadan-Na Puang Allataala. Apa te'da mitarimai, mipattantu kamu' kumua te'da misipato' ntarima katuoan melo te'da cappa'na. Iamo joo kimale lako bangsa laen.

⁴⁷ Sanga susi ia tee to nasuankan Puang Allataala kumua, 'Pura kupattantumo kamu' menjaji arrang lako bangsa tangngia to-Yahudi dikua ammiparatui to kasalamatan lako lili'na lino.'"

⁴⁸ Ia tonna sa'dingngi bangsa tangngia to-Yahudi joo, masannang ngasan na mpakala'bih kadan-Na Puang. Na memmatappa' lako Puang Isa sininna to tonapattantumo Puang Allataala la nnampa' katuoan melo te'da cappa'na.

⁴⁹ Dipangpeissenanmi to kadan-Na Puang lan lili'na joo tondok.

⁵⁰ Apa naarakkii to-Yahudi to tomapangka' lan joo kotana sola baine to dipekapuangngi to ssompa toda Puang Allataala, nasessai to Paulus sola Barnabas, namane' nnula'ii sola dua lan mai joo tondok.

⁵¹ Apa mpentambakanni ajena Paulus sola Barnabas. Mangkai joo malemi lako kota Ikonium.

⁵² Masannang to tomatappa' jio kota Antiokhia, nakuasaii Roh Allataala.

Kisah Para Rasul

Video Kisah Para Rasul 13

Ikuti Kami:

KONTAK | PARTISIPASI | DONASI