Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bang sidang déi' Antiokia inan tuda'-tuda' nabi idi guru, ieh ineh Barnabas, Simion luk titen Mitem, Lukius lun Kiréni, Menahem luk isa' rat isuut pad-pad dengan Raca' Herodés Antipas, idi Saul.
2 Idi laba' ideh sembayang inan Tuhan idi mawa', idi kebala Roh Meligan, "Uen ngatad kuanKu Barnabas idi Saul, pad didueh miak nganau' kekamen luk icukKu nedidueh."
3 Kareb ideh pangeh mawa' idi nesembayang, idi ideh nengerareng ticu'deh luun Saul idi Barnabas, idi ideh nengecuk nedidueh nalan.
4 Roh Meligan nengecuk Barnabas idi Saul amé' Salukia, idi rat déi' didueh nenalan maya' kapal iné' pulau Siprus.
5 Kareb didueh nacing déi' Salamis, idi didueh nemada' bala Allah bang amung-amung ruma' sembayang lun Yahudi. Yahya Markus pana' iné' maya' nedidueh idi nengedengan nedidueh.
6 Ideh nenalan aput-aput pulau ineh pad macing Papos, idi ideh nepapu' aceh lun mangun, ieh ineh seburur nabi lun Yahudi luk mebalih, ngadanneh Bar Yésus.
7 Ieh ineh lun rurum Sergius Paulus selemulun luk mileh, lun rayeh bawang ineh. Idi ieh iné' nawar ni Barnabas idi Saul amé' matun neneh sikal ninger bala Allah.
8 Iamo' Elimas, lun mangun ineh (ngaceku kudeng ineh teh ilung ngadanneh) sikal metueh rat nedeh ngaceku sikal ngelubed lun rayeh ineh ratnan anuneh.
9 Iamo' Saul luk titen Paulus teh, mepanu' ku Roh Meligan. Idi ieh nenutong neneh,
10 idi keburi'neh, "O iko luk mepanu' ku amung-amung balih idi luk dat, anak Iblis, bunu' amung-amung luk matu'! Megéi' iko ngekilu' dalan Tuhan luk mesiri!
11 Siruh, nekini ticu' Tuhan macing namu, pad iko mebuser, idi na nier mateh aco tuda'-tuda' aco kinioneh." Idi kareb ineh teh inan rabun luk mitem macing nan matehneh pad ieh libung-libung nakap lemulun luk miak nguyut neneh.
12 Idi kareb lun rayeh ineh nenier luk kudeng ineh idi ieh manu peh, idi mawa tutu ratnan bada' Tuhan ineh.
13 Idi Paulus idi lun denganneh pana' nenalan maya' kapal rat Papos macing Perga déi' tana' Pampilia. Idi Yahya Markus nepatad rat nedeh idi nelemubed iné' Yerusalim.
14 Iamo' ideh nenalan rat Perga iné' Antiokia déi' tana' Pisidia, idi ideh nesemuet bang ruma' sembayang kareb Aco luk inan Mudeng, idi netudo.
15 Kareb ideh pangeh nemaca' surat Ukum Musa idi surat nabi-nabi, idi lun rayeh-rayeh ruma' sembayang ineh nengecuk lemulun amé' matun rasul-rasul ineh, keburi'deh, "O kinanak-kinanakku, kudeng inan rat arang muyuh luk sikal mala aceh bala luk miak ngubuk pupu ineh, do' mala nekini."
16 Paulus netuped, idi nengayep nedeh, idi nepebala: "O muyuh lun Israil, idi muyuh luk matot inan Allah, ninger muyuh.
17 Allah lun pupu Israil ineh pangeh nemili' tepun tau idi nengerayeh pupu ineh kareb ideh tudo déi' bawang Masir, idi nengeruat nedeh rat déi' dengan laludNeh luk rayeh.
18 Idi ruked apat ngepulu' lak Ieh mulai niat nedeh déi' su luk ali-ali.
19 Ieh nengusag tudu' pupu déi' bawang Kanaan, idi Ieh nemabpat tana'deh kuan pupuNeh sebuleng mangun ku bawangdeh,
20 apat ngeratu limeh ngepulu' lak kinioneh. "Pangeh ineh Ieh nemaré nedeh tuda'-tuda' lun luk mutut besara', pad macing kareb Nabi Semuil.
21 Kareb ideh nemutuh raca', idi Allah nemaré kuandeh Saul Kis, ieh ineh selemulun ratnan pupu Beniamin, mangun ku raca'deh apat ngepulu' lak kinioneh.
22 Kareb Ieh pangeh nenala' neneh, idi Ieh nengikit Daud mangun ku raca'deh. Idi kebalaNeh ratnan Daud, 'Daud Isai ineh, selemulun luk petulu dengan pian niatKu. Ieh sikal nganau' amung luk pianKu.'
23 Idi ratnan inul Daud ini, Allah pangeh nemaré kuan lun pupu Israil seburur Lun Nengulun, ieh ineh Yésus, maya' jani'Neh.
24 Idi atun ratnan acingNeh Yahya pangeh nemada' ratnan rereb idi uren kuan amung-amung lun pupu Israil.
25 Kareb uned Yahya mangeh kekamenneh, idi kebalaneh, 'Muyuh ngerawé idéké ui ini. Ui ini baken Luk uen muyuh nganét. Nier tau luk mangun muci! Inan Selemulun luk macing muci rat negku ini, idi ui na mayu ngelengu kasut ratnan kukudNeh.'
26 "O kinanak-kinanakku, luk inul Ibrahim, idi amung-amung pupu baken luk idi ieni luk sembayang nan Allah; kuan tau bala ulun ini pangeh nacing.
27 Ngaceku lemulun luk tudo déi' Yerusalim idi lun rayeh-rayehdeh na miti Yésus ineh Lun Nengulun, ideh na kali' ilung bala nabi-nabi luk bica'deh anid Aco luk inan Mudeng, idi ideh nengacing bala nabi-nabi kareb ideh nengukum Yésus.
28 Idi sagan pana' na punneh ideh nengaté Neneh, iamo' ideh nemutuh Pilatus, pad Ieh miak pitayen.
29 Kareb ideh pangeh nengacing amung-amung bala luk inayud ratnan Yésus, idi ideh nengalap Neneh rat luun kayuh salib ineh, idi nenipa Neneh bang tanem.
30 Iamo' Allah nenui Neneh rat arang lun naté.
31 Idi tuda'-tuda' aco kinioneh Ieh nesilagan kuan lemulun luk nemaya' Neneh rat Galilia idi numak déi' Yerusalim, idi nekini lemulun ineh mangun ku lun nekali' Neneh kuan pupu Israil.
32 Idi kai ini nguit Bala luk Do' kuan muyuh, ieh ineh pejani' luk biré Allah kuan tepun tau,
33 maya' kudeng luk pijani' Allah kuan mupun tau, kareb Ieh nenui Yésus. Idi kudeng ineh teh luk inayud bang Nani Ubur luk kedueh, 'Iko ini AnakKu, idi bang aco sini Ui pangeh nenganak Namu.'
34 Idi ini luk bila Allah ratnan ieh nenui Neneh rat arang lun naté, pad Ieh na lemubed amé' inan luk melu, 'Ui sikal maré kuanMu peruan luk matu idi luk meligan, luk pijani'Ku ni Daud.'
35 Ineh punneh Ieh pebala teh bang ayat Nani Ubur luk baken, 'Na Iko maré DemulunMu luk lutep ruen melu'.'
36 Daud nenganau' luk pian Allah bang karebneh. Idi ieh naté idi tinanem iring tepunneh, idi ieh melu peh.
37 Iamo' Ieh luk tinui Allah ineh na Ieh melu peh.
38 Do' muyuh kali', O kinanak-kinanakku, idi ngaceku Yésus, dalan ngalap do' ratnan sala' bida' kuan muyuh,
39 idi ngaceku Ieh, idé'-idé' luk manu, ieh miak puatin ratnan amung-amung sala' luk na miak uen Ukum Musa ngiu'.
40 Ngaceku ineh matar do'-do', pad luk inayud bang surat nabi-nabi na macing nemuyuh,
41 'Siruh, muyuh luk situnga! Do' muyuh mawa idi maté! Ngaceku kekamen luk ruenKu bang kareb muyuh ini, luk na muyuh sikal manu, sagan pana' uen ngelio kuan muyuh.'"
42 Kareb Paulus idi Barnabas neremuat rat bang ruma' sembayang, idi lemulun nemutuh nedidueh mada' bala ineh kareb Aco luk inan Mudeng baruh.
43 Kareb ideh pangeh netebubpun, idi mula' lun Yahudi, idi lun pupu baken luk maya' sembayang lun Yahudi, nemaya' ni Paulus idi Barnabas. Idi didueh nemada' idi nengubuk nedeh, pad ideh lutep bang katu Allah.
44 Kareb Aco luk inan Mudeng baruh ineh, idi amung-amung lun bang bawang ineh netebubpun neninger bala Allah.
45 Iamo' kareb lun Yahudi nenier lun mula' ineh, idi ideh mét niat, idi ideh nengilang bala Paulus idi nenguyo neneh.
46 Iamo' Paulus idi Barnabas meluun mekuu' mada', kebala didueh, "Setuneh bala Allah ineh na miak na belén atun kuan muyuh, iamo' ngaceku muyuh pangeh nengarung balaNeh idi ngerawé burur muyuh na mayu ngalap ulun luk meruked, idi kai necan nemuyuh idi amé' nelun pupu baken.
47 Ngaceku kudeng ineh Tuhan nengecuk nekai, kebalaNeh, 'Ui nganau' Namu ku aceh acang kuan lun pupu baken, pad ngacing dalan ulun kuan amung uang tana' ini.'"
48 Kareb lun pupu baken neninger bala ini, ideh mawang niat idi nengerayeh bala Allah; idi lemulun luk pinili' ngalap ulun luk meruked ineh manu peh.
49 Idi bala Allah nepiar aput bawang ineh.
50 Iamo' lun Yahudi nengubuk lun rayeh-rayeh bawang idi decur-decur luk lun do' rat nelun pupu baken luk sembayang inan Allah. Idi ideh nengacing aceh susa' kuan Paulus idi Barnabas, idi nemasut nedidueh rat bang bawangdeh ineh.
51 Iamo' rasul-rasul ineh nengegkar abuh ratnan kukuddeh mangun ku tanu' kuan lemulun ineh, idi ideh iné' déi' Ikonium.
52 Idi anak-anak sekola' déi' Antiokia ineh pana' mepanu' ku awang idi Roh Meligan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA