Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kalak Parisi megi berita maka teremen jelma si idat ras iperidiken Jesus asangken iperidiken Johanes.
2 (Si tuhuna labo sekalak jelma pe iperidiken Jesus, tapi ajar-AjarNa nge mperidikenca.)
3 Kenca ibegi Jesus kai si icakapken kalak, ItadingkenNa daerah Judea, mulih Ia ku daerah Galilea.
4 I bas PerdalanenNa, la banci la IbentasiNa daerah Samaria.
5 Seh me Jesus ku sada kuta i daerah Samaria, gelarna Sihar. Kuta e deher ras juma si ibereken Jakup nai man anakna Jusup.
6 I bas juma e lit sumur si igelari sumur Jakup. Perbahan latih Jesus erdalan, emaka kundul Ia i tepi sumur e. Paksa e wari nggo ciger; ajar-ajar Jesus lawes ku kuta nukur nakan. Asum Jesus sisada i je, reh sekalak diberu bangsa Samaria ku sumur e ngelegi lau. Nina Jesus man bana, "Enta sitik lau ena gelah Kuinem."
7 (Yoh 4:6)
8 (Yoh 4:6)
9 Ngaloi diberu e, "Kam kalak Jahudi janah aku kalak Samaria; ngkai maka IpindoNdu lau inemen man bangku?" (Biasana kalak Jahudi la nggit make kai pe si nggo ipake kalak Samaria.)
10 Nina Jesus, "Adi ietehndu kerna pemere Dibata, janah adi itandaindu ise si mindo lau man bandu enda, tentu ipindondu man BaNa lau, jenari IberekenNa man bandu lau si mereken kegeluhen."
11 Ngaloi diberu e, "O Tuan, mbages kap sumur enda, janah TimbaNdu pe la lit. I ja IbuatNdu lau si mereken kegeluhen e?
12 Nini kami Jakup nai mereken sumur enda man kami. I jenda nari me lau inemenna, inemen anak-anakna ras asuh-asuhenna. Ma labo kin IkatakenNdu maka belinen Kam asangken ningken ni kami Jakup e?"
13 Erjabap Jesus, "Kalak si nginem lau enda muas denga.
14 Tapi kalak si nginem lau si Kubereken man bana, lanai ia muas seh rasa lalap. Sabap lau si Kubereken e jadi sumbul si erburak-burak i bas ia dingen mereken kegeluhen si tuhu-tuhu si la erkeri-kerin."
15 Ngaloi diberu e, "O Tuan, bereken min lau e man bangku gelah olanai aku muas, janah lanai perlu aku ku jenda muat lau."
16 Nina Jesus, "To legi perbulangenndu, ras kam ku jenda."
17 Ngaloi diberu e, "La lit perbulangenku." Emaka nina Jesus, "Tuhu bagi si ikatakenndu e, la lit perbulangenndu.
18 Sabap kam nggo lima kali erjabu janah dilaki si ras kam genduari e pe si tuhuna labo perbulangenndu. Payo kal katandu e."
19 Ngaloi diberu e, "O Tuan, nabi kepeken kam.
20 Nini-nini kami i das uruk ah nembah Dibata, tapi nini kalak Jahudi i Jerusalem me inganna ersembah man Dibata."
21 Nina Jesus man bana, "O bibi, teklah kam man bangKu. Reh me pagi paksana maka lanai kalak i deleng ah nembah Dibata bage pe lanai i Jerusalem.
22 Kam kalak Samaria si tuhuna la ietehndu ise si isembahndu, tapi kami kalak Jahudi ieteh kami ise si isembah kami, sabap Si Engkelini si ipadanken Dibata e reh arah kalak Jahudi.
23 Tapi reh me paksana, janah si tuhuna nggo seh pe, i ja arah Kesah Si Badia manusia ersembah man Dibata alu payo.
24 Dibata Kesah kap, emaka arah Kesah e ngenca maka banci manusia nembah Dibata alu payo."
25 Ngaloi diberu e man Jesus, "Kueteh maka Raja Penampat si ipadanken Dibata, si igelari Kristus, nandangi reh me. Janah adi reh Ia, kerinana pagi IpetangkasNa man banta."
26 Nina Jesus man bana, "Aku, si ngerana ras kam enda kap Si Engkelini si ipadanken Dibata e."
27 Paksa si e nggo reh mulihken ajar-ajar Jesus. Mamang kal atena sabap idapetina Jesus ngerana ras sekalak diberu. Tapi sekalak pe ia la nungkun man diberu e, "Kai atendu?," ntah nungkun man Jesus, "Ngkai maka Kam ngerana ras ia?"
28 Kenca bage lawes diberu e ku kuta itadingkenna ingan launa ndai, jenari nina man anak kuta,
29 "Marilah sinehen kalak si nggo nuriken kerina lagu langkahku. Banci jadi Ia me Raja Penampat si ipadanken Dibata e."
30 Emaka berkat anak kuta e ndahi Jesus.
31 Paksa si e ajar-ajar ngiahken Jesus man nina, "O Guru, man kita!"
32 Tapi ngaloi Jesus, "Lit kap panganKu si la ietehndu."
33 Emaka sisungkun-sungkunen ajar-ajar e nina, "Lit kin ndai kalak naruhken nakan man BaNa?"
34 Jenari nina Jesus, "PanganKu e me kap ngikutken peraten si nuruh Aku, dingen ndungi dahin si IberekenNa man bangKu.
35 Ikatakenndu: Empat bulan nari nggo rani. Tapi nehenlah ku juma-juma; page nggo megersing i bas juma e guna iperani!
36 Kalak si mperanisa ngaloken upah janah ipepulungna asilna guna kegeluhen si tuhu-tuhu si la erkeri-kerin, gelah si merdang ras si rani ras-ras ermeriah ukur.
37 Tuhu me bagi si ikataken i bas kuan-kuan, 'Lain si merdang, lain si peranisa.'
38 Kusuruh kam rani i juma si la kam ndahisa; kalak si deban i je erdahin janah kam si mpepulung ulihna latih."
39 Nterem kalak Samaria i bas kuta e tek man Jesus erdandanken nina diberu e, "IturikenNa man bangku kerina si nggo pernah kubahan."
40 Emaka kenca jumpa kalak Samaria e ras Jesus, ipindokenna gelah ola lebe Jesus lawes. Perbahan si e dua wari dekahna Jesus i kuta kalak Samaria e.
41 Kenca Jesus ngajar reh teremna pe kalak si tek.
42 Jenari nina kalak e man diberu ndai, "Kami nggo tek genduari, labo erdandanken kai si ikatakenndu, tapi erdandanken kami jine nggo megi PengajarenNa, janah ieteh kami maka tuhu-tuhu me Ia Si Engkelini doni enda."
43 Kenca dua wari Jesus i bas kuta e berkat Ia ku Galilea.
44 Jesus nggo pernah ngataken, "Sekalak nabi labo meherga i bas kutana."
45 Tapi kenca seh Jesus i Galilea, ialo-alo kalak Ia alu meriah ukur, sabap asum Wari Raya Paskah i Jerusalem nggo idah kalak kerina kai si ibahan Jesus.
46 Alu bage mulihken Jesus ku kuta Kana i daerah Galilea, kuta si pernah i je IbahanNa lau jadi anggur. I bas kuta e lit sekalak menteri raja, anakna sakit i Kapernaum.
47 Kenca ibegina berita maka Jesus nggo reh i Judea nari ku Galilea, emaka ijumpaina Jesus, janah ipindokenna gelah berkat Jesus ku Kapernaum mpepalem anakna si menam mate e.
48 Tapi nina Jesus man bana, "Adi langa kin idahndu tanda-tanda sengget si mbelin labo kam tek."
49 Ngaloi menteri raja e, "O Tuan, berkatlah kita minter ope denga mate anakku."
50 Nina Jesus man bana, "To mulih kam, malem nge anakndu e." Tek menteri e kai si ikataken Jesus, emaka lawes ia.
51 I tengah dalan jumpa ia ras juak-juakna. Nina juak-juakna e man bana, "Anakndu nggo malem."
52 Isungkunna juak-juakna e ntah jam piga anakna e mulai malem. Erjabap juak-juak E "Nderbih kira-kira jam sada suari nggo malem penakitna."
53 Jenari i inget menteri emaka i bas jam e me nina Jesus man bana, "Malem nge anakndu e." Emaka kerina ia ras keluargana tek man Jesus.
54 Enda me tanda sengget si peduaken ibahan Jesus i Galilea. Tanda sengget enda IbahanNa kenca Ia mulih i Judea nari.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA