Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pabi-bicara 'iodumu ge'ena ma titi ge'ena la: To ngone nanga 'Imam ma Amoko gu'una, 'una ge'ena wopareta de ma Jo'oungu ma Dutu gee wi pareta ma batingi koi'iwa, daku 'o sorogaaka.

² 'Una 'awi manarama wa'ao ma ngale 'o 'Imam ma Amoko ma manarama 'o Ngii 'Itebi-tebini 'Ifo-foloioka, ge'ena la ma Jou 'awi Woa ma dutuoka, gee ko 'o nyawawa yodiaiku, ma 'ena ma Jou.

³ 'O 'Imam ma Amoko yakigoraka 'isinoimi ge'ena ma ngale yositedene 'o su-suba 'o haewani de 'o su-suba 'iregu-regu ma Jo'oungu ma Dutuka. Koge'enali mita to ngone nanga 'Imam ma Amoko; 'una salingou naga de ma 'ena 'o kianikia moi ma ngale wosisuba-suba.

⁴ Nako kogee 'una ne'ena 'o duniaka, 'una 'asa kowo'imamuwa sababu de ma 'enau yositede-tedene 'o su-suba gee moteke 'o besesongo gee 'o Musa wositota-totara.

⁵ 'O manarama gee 'o 'imam yadi-diai, ge'ena duga ka 'okia naga gee 'o sorogaaka ma gurumini. Ge'ena ma sira ma Jo'oungu ma Dutu wosidemokau 'o Musaka, gee ma 'orasi 'o Musa womau wodiai 'o woa gee ma Jou wisuba-suba ma ngii. Ma Jo'oungu ma Dutu wongose konee 'o Musaka, "Nongano-nganono! 'Iodumu ge'ena salingou nadiai moteke kokia naga ma duhu gee nisidumu-dumutokau daku 'o gigieka."

⁶ Ma ne'ena 'o Yesus wamake 'o 'imam ma manarama gee 'ifoloiosi yaowa de gee to 'imam 'iregu-regu go'ona, sababu ma ngekomo 'una, ma Jo'oungu ma Dutu wodiai 'o jaji gee 'ifoloiosi yaowa 'o nyawaka ngano ma titi 'okia sonaa gee 'ifoloiosi yaowa.

⁷ Nako kogee naga 'o jaji ma di-disiraka koi'iwa ma kurangi, ge'ena koiparaluuwau ma Jo'oungu ma Dutu wojajioli 'o nyawaka.

⁸ Duga ma Jo'oungu ma Dutu wamakekau manga sowono 'awi kawasaka, so kawongosekau, "Niosi-singina! Dua 'asa ma 'orasi ya'adono, ngoi 'asa todiai 'o jaji ma sungi 'o Israel ma nyawaka, de 'o Yehuda ma nyawaka.

⁹ Koimaterowa de 'o jaji gee 'isoka todi-diaiokau to 'ona manga edete de manga dotumika gee ma 'orasi taki'asa takisisupu 'o Mesir manga tonaoka. 'Ona koyamotekuwa 'o jaji gee todiai 'onaka, ne'enau ma sababu so ngoi kotakikalesanguwa 'onaka. Ma Jou koge'ena wongose.

¹⁰ So nanedau 'o jaji gee dua 'asa todiai 'o Israel ma nyawaka, ma Jou wongose. Ma wange dua 'asa ya'adono: Ngoi 'asa tanoa 'ai besesongo to 'ona manga di-dibangioka de tosilefo manga singinaka. Ngoi 'asa todadi to 'ona manga Jo'oungu ma Dutu, de 'ona 'asa yodadi to ngoi 'ai kawasa.

¹¹ 'Ona koiparaluuwau yodotoko kayomasi'ona-'onaka bolo yositotara manga riaka dodotika, 'Salingou wininako ma Jou!' Sababu 'ona yoodumu yoamoko de yotingoono, 'asa 'inako ngoi.

¹² Ngoi 'asa kotongano-nganonuawau to 'ona manga dorou, de kotosi-singinawau to 'ona moi-moi manga so-sowono."

¹³ Sababu 'o jaji ma sungiou gee ma Jo'oungu ma Dutu wosidemokau, so 'una wadiai 'o jaji ma sira ge'ena koipakewau de 'itorouokau. De 'okia naga gee koipakewau ge'ena yacobou 'iisanga.

Ibrani

Video Ibrani 8

Ikuti Kami:

KONTAK | PARTISIPASI | DONASI