Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi ini luk belén kai: idi tau inan sebuleng Imam Rayeh luk kudeng ineh, luk tudo pa tinueh kerusi Luk Meluun Rayeh déi' surga,
2 ieh ineh Lun Ngasa' Su luk inan luk Meluun Ligan idi Lepo luk matu, luk pinudut Tuhan, baken ratnan lemulun.
3 Anid-anid Imam Rayeh litep pad maré baré idi luk kereten luun bubpun teh; idi ratnan ineh na miak na Imam ineh pana' inan kuan bururNeh luk miak barénNeh.
4 Kudeng Ieh bang tana' ini na Ieh miak mangun ku imam ngaceku pangeh inan lemulun luk maré luk barén maya' Ukum lun Yahudi.
5 Kekamendeh ineh pinginud idi lungung amung-amung luk déi' surga, mepad kudeng luk icuk allah ni Musa, kareb ieh netemina' nganau' Lepo ineh, kebalaNeh, "Ngerawé do'-do' pad iko nganau' amung-amung ineh maya' ayu luk pangeh bida' namu déi' luun pegkung ineh.
6 Iamo' nekini Yésus pangeh nengalap aceh kekamen luk meluun ligan, ngaceku Ieh mangun ku Lun Ngatum aceh pejani' luk meluun ligan, luk litep luun amung-amung jani' luk meluun ligan.
7 Kudeng pejani' luk pun-pun ineh meriput, na petulu inan jani' luk kedueh ineh.
8 Iamo' Allah ngesala' pupuNeh, kebalaNeh, "Aconeh miak macing, kebala Tuhan, kareb Ui miak nganau' pejani' luk mebaruh kuan pupu Israil idi pupu Yahuda.
9 Baken maya' kudeng pejani' luk inau'Ku kuan tepundeh, kareb aco Ui nengimet ticu'deh idi nenguyut nedeh remuat rat bang bawang Masir. Na ideh lutep maya' jani'Ku ineh, idi Ui pana' na nengerawé nedeh.
10 Iamo' kudeng ini pejani' luk barénKu kuan pupu Israil muci rat kareb ineh, kebala Tuhan: Ui sikal nuet ukumKu bang terawédeh idi Ui sikal ngayud ukum ineh bang niatdeh. Ui sikal mangun ku Tuhandeh, idi ideh mangun ku pupuKu.
11 Na ulek seburur pana' mada' nelun bang bawangdeh, idi pebala kuan kinanak-kinanakneh, 'Do' ngiti Tuhan.' Ngaceku amung-amungdeh miak ngiti Negku ratnan luk isuut macing luk rayeh pana'.
12 Ui maré do' ratnan amung kekamendeh luk dat, idi na Ui ngerawe sala'deh teh."
13 Kareb Ieh pebala ratnan pejani' baruh, Allah pebala luk pun-pun ineh pangeh mangun ku luk mon, idi anun-anun luk amé' mon ineh idi luk amé' mengered lélé miak talan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA