Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Basa hala kokolak ia la lala'e na, huu na nde ia: Ita tanuu Imam Matua Ina fo leondia ka nangatuuk paleta sama-sama no Manetualain, fo Mana Koasa matua ina nai nusa so'da ka.

² Ana tao-no'i belaba'un, da'dileo Imam Matua Ina nai Kama Malalaok nanseli a, fo nde nai Manetualain Uma Lopon isi-isi na dalek, fo Manetualain nde napadedei kana, te ta hataholi daebafa ka fa.

³ Basa Imam Matua Ina la, nanaso'uk soaneu ana fe tutunu-hohotuk neu Manetualain. Leondiak boe, ita Imam Matua Ina; ana muse nanuu hata esa, soaneu Ana tunu-hotu.

⁴ Leo uni ka, nai daebafak ia soona, neukose Ana ta da'di imam fa, nana hapu imam, soaneu ana fe tutunu-hohotuk, fo nananoke nakasetik nai agama Yahudi a hoholo-lalanen dale.

⁵ Tatao-nono'ik fo ala tao-no'in da'dileo imam ndia, tunga ndoo na ka'da dulak esa ma salaok esa neme hata fo manai nusa so'da ka mai. Ndia nananafa'da basak nakahuluk neme Manetualain neu Musa, nai lelek fo Musa nau napadedeik Manetualain Uma Lopo na. Manetualain nafa'da nae leo ia neu Musa, "Mafandendelek! Te basa sila la, muse o taon tunga natutu'duk fo nananatu'duk neu o neme letek lai na."

⁶ Tehu besak ia, Yesus hapu bela-ba'u Ima ma, ndela-sa'an lenaheni imam-imam sila la bela-ba'un. Nanahu hala heheluk fo Ana ito-ato nai Manetualain no hataholi daebafa ka tala'da, nde bee na hala heheluk fo malole na lena, nanahu tunga hala heheluk soaneu dede'ak fo malole na lena.

⁷ Leo uni ka nai hala-hehelu makasososa ka dalek, ta hapu hala hehelu manadai tak fa soona ta paluu tao hala hehelu kadua so'ok.

⁸ Tehu Manetualain hapu basa salak nai hataholi kamahehele nala, de nalosa Manetualain nafa'da nae, "Mafandendelek, neukose losa fai na te, neukose Au tao hehelu-balata beuk, o leoina Israe la, ma no leoina Yehuda la.

⁹ Ta sama leo hehelu balataak fo Au taon no sila bei ba'i kai nala, nai lelek fo Au hela-noles kalua leme nusa Masi ra mai. Ala ta lilineka neu hehelu-balataak fo Au taon no sila fa; hu ka nde ndia de, Au ta afaduli fas.

¹⁰ Tehu besak ia, ia nde hehelu-balataak fo neukose Au taon no leoina Israe la nai fai-fai manamai ka, Manetualain nafa'da nae: Neukose Au tao Au hoholo-lalaneng neu dudu'a-aafi nala dalek, ma Au sula kana neu dale nala dalek. Neukose Au da'di sila Manetualai na, ma neukose sila da'di Au hataholi kamahehele ngala.

¹¹ Sila ta paluu lanoli sila lau nala fa, do lafa'da tolanoo nala lae, 'Malelak Manetualain leona.' Nanahu sila basa-basas, matua, ana, neukose lalelak Au.

¹² Neukose Au fe do'o do ampon neu sala-singo nala, ma Au ta afandele sala-singo nala so'on."

¹³ No hehelu-balataa beuk esa nananafa'dak de Manetualain tao hehelu-balataak fo makasososak ndia, namalasi ma ana palaa so, ma hata beek fo namalasi soona, neukose no lai-laik ana sapu-lalo.

Ibrani

Video Ibrani 8

Ikuti Kami:

KONTAK | PARTISIPASI | DONASI