Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saq jari inti selapuqne niki bahwe: Ite bedowẽ Imam Agung saq maraq nike, saq melinggih lẽq sedi kanan Saq Maheagung lẽq sorge.

² Ie ngelaksaneang tugas sebagẽ Imam Agung lẽq Ruang Mahesuci, lẽq dalem Kẽmah Tuhan saq sejati, saq tepiaq siq Tuhan, ndẽqne siq manusie.

³ Sebilang imam agung teangkat jari ngaturang kurban atao persembahan tipaq Allah. Maraq nike ẽndah Imam Agungte; Ie harus araq saq Ie aturang.

⁴ Seandẽne Ie araq lẽq dunie niki, Ie nẽnten gen jari imam, sẽngaq sampun araq imam saq ngaturang kurban saq tetuntut lẽq dalem Hukum Taurat.

⁵ Pegawẽan saq ie pade laksaneang jari imam nike setetune cume sopoq gambaran dait bayangan lẽman napi saq araq lẽq sorge. Hal nike laẽq sampun tesampẽang siq Allah tipaq Musa, sewaktu Musa gen piaq Kẽmah Tuhan. Maraq niki Manik Allah tipaq Musa, "Inget! selapuqne nike harus side piaq menurut conto gambar saq tepetitoqang tipaq side lẽq atas gunung."

⁶ Laguq mangkin Deside Isa nerimaq tugas jari imam saq jaoq muliean lẽman napi saq telaksaneang siq imam-imam nike. Sẽngaq Ie sampun jari Perantare sopoq perjanjian saq muliean, sẽngaq tedasarang siq janji-janji saq solahan.

⁷ Lamun ndẽq araq kekurangan lẽq perjanjian saq penembẽq, make ndẽqne perlu malik tepiaq perjanjian saq kedue.

⁸ Laguq Allah sampun ngewade umat-Ne, sehingge Allah bemanik, "Inget! gen dateng waktune, Tiang gen miaq perjanjian saq baru kance bangse Israel, dait kance bangse Yehuda.

⁹ Ndẽqne maraq perjanjian saq Tiang piaq kance leluhur ie pade sewaktu Tiang pimpin ie pade sugul lẽman negeri Mesir. Ie pade ndẽq setie lẽq perjanjian saq Tiang piaq kance ie pade, keranaq nike Tiang nolaq ie pade."

¹⁰ Laguq mangkin, niki perjanjian saq gen Tiang piaq kance umat Israel lẽq jelo-jelo saq gen dateng, manik Tuhan: "Tiang gen noloq hukum Tiang lẽq dalem pikiran ie pade, dait gen Tiang tulis lẽq atẽ ie pade. Tiang gen jari Allah ie pade, dait ie pade gen jari umat Tiang."

¹¹ Ie pade ndẽq perlu ngajah sepade wargene, atao bebadaq tipaq semetonne, "Side harus kenal kance Tuhan." Sẽngaq ie pade selapuq, belẽq atao kodẽq, gen kenal kance Tiang.

¹² Tiang gen ngampunin kesalaqan-kesalaqan ie pade, dait Tiang ndẽq gen inget malik dose-dose ie pade.

¹³ Siq nyugulang perjanjian saq baru, Allah nyatayang bahwe perjanjian saq penembẽq nike jari batal, dait napi saq sampun tebatalang gen becat telang.

Ibrani

Video Ibrani 8

Ikuti Kami:

KONTAK | PARTISIPASI | DONASI