Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ka ma noimi ma Jo'oungu ma Dutu wakiiriki 'o 'Imam ma Amoko 'awi 'umatioka, ge'ena yakisitatapu ma ngale yakisi'asa 'o nyawa-nyawa ma Jo'oungu ma Dutuka. To 'ona manga manarama ge'ena la yositedene 'o jou-jou de 'o su-suba ma ngale 'o sowono ma ga-gaiki.

² 'O 'Imam ma Amoko ma sirete naga 'o gudai kowatotomuwa, ge'enau so 'una 'awi singina 'ima'ai 'o nyawaka gee koyomasinako-nakowa de yoliba-liba.

³ De sababu 'una mita 'o gudai kowatotomuwa, so 'una salingou wositedene 'o su-suba, ma ngale duga ka 'o nyawa 'iregu-reguwa manga so-sowono, ma 'ena to 'una ma sirete mita.

⁴ Komoiwa moi ka 'ona ma sirete yomagorakie yodadi 'o 'Imam ma Amoko. 'O nyawa yodadi 'o 'Imam ma Amoko, nako la ma Jo'oungu ma Dutu waki'asoko ma ngale wakigoraka, 'isoka 'o Harun.

⁵ Koge'enali mita ma Kristus, 'una ko 'unawa ma sirete womagorakie wodadi 'o 'Imam ma Amoko, ma 'ena ma Jo'oungu ma Dutu. Ma Jo'oungu ma Dutu wongose 'unaka, "Ne'ena ma wange ngoi tosidumutu 'ato ngoi ne'ena 'ani Dea; de ngona to ngoi 'ai Ngowaka."

⁶ Naga 'o Buku 'Itebi-tebini ma bo-bula 'ireguoka ma Jo'oungu ma Dutu wongose mita, "Ngona ge'ena 'o 'Imam ma Amoko kaisi'ado-'adonika, 'isoka ma sira 'o Melkisedek."

⁷ Ma 'orasi 'o Yesus wo'ahu 'o duniaka ne'ena, 'una womalahidoa womasigasoko wosigari-gari ma Jo'oungu ma Dutuka gee wa'akunu wisiresene 'o songene. De 'una kawomotekuwa ka to 'una 'awi mau, ma widomoteke de wihoromati ma Jo'oungu ma Dutuka, so 'awi lahidoa ge'ena 'awi Dea wakalesangi.

⁸ 'O Yesus ge'ena la ma Jo'oungu ma Dutu wi Ngowaka, ma ngaro koge'ena ma 'una womadotoko wosingounu ma ngekomo wosangisara.

⁹ Ge'enau so ma Jo'oungu ma Dutu wisitotomokau, de 'una wodadi 'o laha 'ika-kakali ma titi ma ngale wakisilaha 'o nyawa yosingou-ngounu 'unaka.

¹⁰ De ma Jo'oungu ma Dutu wositatapuokau 'ato 'una ge'ena 'o 'Imam ma Amoko 'isoka ma sira ma 'Imam Melkisedek.

¹¹ Ma ngale 'okia naga tosidemo-demo ge'ena, naga 'o gudaiosi 'iparaluu miositotara nginika ma 'isusa miosiwaiti sababu ngini rekeni koniokalesanguwa so 'ito'ingo niasahe.

¹² Yadaene tanu ma 'orasiou ngini niodadi 'o guru, duga ma nyo-nyata ngini salingou kanimadotokosi 'o nyawa 'ireguka ma ngale ma Jo'oungu ma Dutu 'awi do-dotoko ma guruesi. 'Isoka 'o ngowaka ma giau so salingou kayosusuosi sababu koya'akunuawasi 'o 'inomo 'i'opi-'opini.

¹³ 'O nyawa gee kayosusuosi ge'ena ma ngale ka 'o ngowakosi. 'Ona koyasahewasi 'okia naga gee yadae-daene de 'isowo-sowono.

¹⁴ 'O do-dotoko ma ngale 'o nyawa manga ngo-ngaku 'ikua-kuatika ge'ena 'isi-'ade-'ade 'isoka 'o 'inomo 'i'opi-'opini ma ngale ka 'o ngowaka ma giauwau manga 'inomo. Sababu 'o nyawa manga ngo-ngaku 'ikua-kuata yabiasakau yomadotoko gee 'iti-tiai so 'ona 'idadi yosikanako ka'ena ma owa de ka'ena ma dorou.

Ibrani

Video Ibrani 5

Ikuti Kami:

KONTAK | PARTISIPASI | DONASI