Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sangamberidda tai imam sabeu sipiliy sibara ka talagat paamian, samba tupauddet sia masipasikeli galajet Taikamanua sibailiu punu tubudda. Galajetnia iaté, masibuluaké ka tubut Taikamanua sangamberinia panguruat samba buluakenen pasiappet jo.
2 Ka sia imam sabeu maigi gulainia ka sangamberinia, oto kalulut néné, buítá maleppe bagania ka tubudda sitaiagai apa pá, samba simapepepe ka enung puririmanuanda.
3 Oto kalulut gulainia leú et ka sia néné, bailiu buítá ibuluaké buluakenen; samba buluakenen néné, tá sarat kalulut jodda sapaamian, tápoi kalulut jonia leú et ka sia.
4 Tá anai beri sia sara sirióaké tubunia muimam sabeu. Ibabailiu sia geti imam sabeu iaté, ké ai pasogaiat Taikamanua ka tubudda; kelé ka sia kai Aron.
5 Ka sia leú et Kristus, kisedda leú et. Tá tubunia airióaké tubunia bailiu Imam Sabeu. Tápoi Taikamanua lé airióaké nia. Aikua ka matania Taikamanua, "Ekeu néné Togakku; ka gogoi néné bailiunangan aku Ukkuinu."
6 Ka bagei leú et, ai atusurat'aké kisé, "Ekeu néné iaté imam teret buru-burú, kelé si Imam Melkisedek."
7 Ka tetret ai peilé nia mukukuddu Jesus ka polak néné, amaniddou nia samba aitiddou simaná-ná ka tubut Taikamanua sialei gerei samba sou, simagege masibelaaké nia ka kamateiat. Samba kalulut purereddet nia ka tubut Taikamanua bulat sibara kahormatnia, arepinangan leú et nia.
8 Togat Taikamanua lé nia Jesus néné, tápoi kenanen kisedda, aigelai leú et mureddet iaté, ka pangoringannia.
9 Oto kelé aitubailiuaké nia sipaarau bulat sipulelelek, bailiunangan leú et nia bakkat puaragat sitaitatatá ka tubudda sangamberi simareddet ka tubunia,
10 samba oniakénangan nia Taikamanua Imam Sabeu, kelé kai Imam Melkisedek.
11 Oto pagalaiat tiboi tubut Jesus sibailiu Imam Sabeu, maigi peilé kuanenmai ka tubumui, tápoi mabesí itukolouaké, aipoí mabesí peilé isak-sak ka bagamui.
12 Bulat siripokatnia aiailingan tetrenia ibailiu kam guru, tápoi ituitsó maerú lé nupasigelai kam ka tubudda sabagei pagalaiat pubakkanan tiboiet Taikamanua barana ka panandaatnia. Aipoí tápei momoi nukom kam kan pakela-kelá; buítá sarat susu peilé nuloló kam.
13 Aipoí ké ai peilé sia mutotot-tot, oto toga sigoisó peilé sia ituooniaké, aipoí tápei raagai kipa sineseat samba kipa sitaipasesese.
14 Tápoi ka sia geti sikebbukat, simakeláan lé kanda, kalulut amasikebbukat'an poí tubudda, araagaian masipabaggei kipa simaerú, samba kipa sikataí.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA