Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ai sagala sintua ni malim, na pinilih humbani jolma, ipabangkit do halani jolma, laho marugas i lobei ni Naibata, ase igalangkon sibere-bere ampa galangan halani dousa.
2 Na tarbahen do ia mangahapkon ahap ni na oto ampa na kahou, ai ia pe ibagas hagalekon do.
3 Halani ai maningon mamboan galangan pardousaon do ia, sedo halani bangsa ai hansa, tapi dihut do halani dirini.
4 Anjaha seng adong na mambuat hamuliaon na sonai bani dirini, tapi na nidilo ni Naibata do ia hujai songon si Aron.
5 Sonai do homa Kristus in, seng Ia pasangap diri-Ni gabe Sintua ni Malim, tapi Naibata do, na dob mangkatahon hu Bani, “Anak-Ku do Ho, sadari on do Ho Hutubuhkon.”
6 Bani ianan na legan homa ihatahon do, “Malim do Ho ronsi sadokah ni dokahni mangihutkon orde ni si Melkisedek.”
7 Sanggah jolma Ia, igalangkon do pangindoan-Ni ampa elek-elek-Ni marhasoman doruh banggal ampa iluh hubani na boi paluahkon-Si humbani hamatean, anjaha itangihon do Ia, gabe maluah humbani habiaran ai.
8 Ai age pe Anak Ia, iguruhon do pambalosion marhitei na tinaron-Ni ai.
9 Anjaha dob gabe gokan dear Ia, jadi bona ni haluahon sisadokah ni dokahni do Ia bani haganup, na mambalosi-Si.
10 Igoran Naibata do Ia Malim mangihutkon orde ni si Melkisedek.
11 Buei ope namin sihatahononnami pasal ai, tapi payah do patorangkon ai bani nasiam, halani na so marpangarusion ai nasiam.
12 Ai marimbang dokahni ai domma patut jadi guru nasiam, hape maningon porlu ope ajarhonon bani nasiam humbani pangajaran pamungkah ni hata ni Naibata, gabe dadih mando porlu bani nasiam, sedo sipanganon na koras.
13 Ai sagala siinum dadih, seng marpambotoh ope ai bani ajaran na sasintongni, halani dakdanak ope ai.
14 Tapi sipanganon na koras, ai ma bani na dob matoras, na dob pasomal-somalhon dirini, gabe ibotoh parleganan ni na madear ampa na masambor.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA