Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ho, kědon Duata e wědangbeng kạtatanạ kerene ringangu i kitẹ e sarungbe ipěngirul᷊e kerẹewe su kědon'E. Kụ i kitẹ e pakaral᷊ukadẹ̌ bue tadeạu kumbahang piạ u sarang sěngkatau wo'i kamene kawe nasahẹ u tawe nakateěng pangangirul᷊e kụ nikědon'E ene.
2 Batụu Injilẹ̌ e seng nihabarẹ̌ si kitẹ e mẹ̌sul᷊ungkewelai si sire. Kaiso waug'i sire e, habarẹ̌ ene tawẹ gunane. Batụu su tempong i sire nakaringihẹ̌ e, i sire tawe nangimang.
3 Arawe i kitẹ apang němpangimange makahombangbe irul᷊ene kụ seng nikědong Mawu Ruata e. Ene nẹ̌tatal᷊ahino wue kerẹ ewe seng piněhěngetang u Mawu Ruata e kere ini, "Iạ e limangehẹ̌ dingangu nẹ̌salu, 'kụ i sire tawe makapahunsuẹ̌ makapangirul᷊e ringang-Ku e.' "Duata e něhengetang kerene, sěmbal᷊iau kal᷊awọu munaran'E e sembeng nauadipẹ̌ dokeng i Sie něndiadi dunia ini e.
4 Batụu mạanung ěllo kapitune tangu, kai piạ kạbawohẹ su ral᷊ungu Bukẹ̌ Susi kere ini, "Su ěllo kapitune Mawu Ruata e nangirul᷊e wọu patikụ munaran'E."
5 Mạanụeweng hal᷊ẹ̌ ene tangu, nịbawohẹ lai kere ini, "I sire mang tawe makapahunsuẹ̌ su wanua ene mědeạu makapěngirul᷊e ringang-Ku e."
6 Kụ i sire nạung kahumotong-motongange nakaringihẹ̌ habaru Injilẹ̌ ene, tawe nanarimạ u pěngangirul᷊eng ene ual᷊ingu i sire tawe němpangimang. Mạeng kerene seng nal᷊ahẹ u piạ taumata wal᷊ine kụ botonge měnarimạ u pangangirul᷊e ene.
7 Batụu Ruata e seng něnilakehu ěllo wal᷊ine lai, kụ isěsẹ̌bạ e "Ěllo Ini". Dingangu taunge kụ samurin Duata e měbẹ̌bisara mạanung hal᷊ẹ̌ ene si Daud su ral᷊ungu ayet'e kụ kere seng niwera kal᷊amona, "Kereu su ěllo ini e i kamene nakaringihẹ̌ tingih'u Ruata e, kumbahangbe i kamene mẹ̌tungkětị u naung i kamene."
8 Kai mangạewe i Yosua e seng nangonggọu tempone si sire ipangirul᷊e tuhụ kědon Duata e tangu, Mawu Ruata e sembelain tawe mahumbisarang ěllo l᷊ai wal᷊ine.
9 Kụ baugu kawanuan Duata e bědambeng piạ kědong pěngangirul᷊e mẹ̌sul᷊ungkewelain pěngangirul᷊en Duata e su ěllo kapitune ene.
10 Ual᷊ingu taumata kụ manarimạ pangangirul᷊e kụ nikědon Mawu Ruata e, si sie, sarung l᷊ai mangirul᷊e wọu patikụ munarane, kerẹewe lai Mawu Ruata e.
11 Ual᷊ingu ene, i kitẹ e mẹ̌tawakal᷊iko kahěnga-hěngang mědeạu makapěnarimạu irul᷊e kụ nạung nikědon Duata e. Kumbahangbe sarang piạ u sěngkatau lai wọu i kitẹ e kụ tawe makawunạ kerẹewe i sire nạung kal᷊amona, ual᷊ingu tawe nangimang su Mawu Ruata e.
12 Hengetangu Mawu Ruata e kai hengetang biahẹ̌ dingangu matoghasẹ̌; limembong kahorone wọu peda matane ruamběka. Bawera ene nụněnggạ sarang kẹ̌takengu lensorange su pẹ̌sěmakengu himukụdẹ̌ dingangu rohkẹ̌, sarangkeweng pẹ̌kětakengu lensorange ringangu ghěsin duhine, makakasingkạ maunsui tiněnna ringangu sipirangu ral᷊ungu naungu taumata e.
13 Tawẹ diadikang sarang sěmbaụ kụ mạbawuni su silon Duata e. Patikụ sạbarange mang tilandang dingangu kạbawualagẹ̌ su těngon'E. Dingangu i kitẹ e hinong mẹ̌tul᷊ungu sasimbang'i kitẹ e si Sie.
14 Hakịu ene i kitẹ e hinong mangumbelẹ pakasěgadẹ̌ su l᷊aakung pangangimang i kitẹ e. Batụu i kitẹ e kai mạnaghuang Imang Mawantugẹ̌ masěllahẹ̌, kụ seng nakasuẹ̌ sol᷊ong těngon Mawu Ruata -- kụ kai i Sie i Yesus Ahus'u Ruata.
15 Imang i kitẹ Mawantugẹ̌ ene, wal᷊inewe imang kụ tawe makapapěndang dingang kal᷊awọu kasasigěsạ i kitẹ e. Ral᷊iune, i Sie kai seng nisal᷊ukateng su ral᷊ungu patikụ sạbarang, mẹ̌sul᷊ungkewelain i kitẹ hala e; kětạeweng i Sie kawe tawẹ dosane!
16 Ual᷊ingu ene tangú, i kitẹ e mẹ̌tumbahaniko tumatěngo Mawu Ruata kụ mẹ̌pẹ̌parentawe ringangu naung'E mapia e. Mawu Ruata e sarung kuměndag'i kitẹ dingangu měngal᷊amatẹ̌ si kitẹ tadeạu i kitẹ e makahombangbe tul᷊umang kụ mẹ̌kětạbeng tempone.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA