Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Genduari lit padan Dibata man banta maka kita banci bengket ku bas pengadi-NgadinNa. Dage metengetlah gelah ula lit sekalak pe i bas kam gagal bengket ku bas pengadi-NgadinNa e.

² Sabap nggo sibegi Berita Si Mehuli e, bali ras kalak ndai. Ibegina berita e tapi la erguna man bana sabap la ialokenna e alu kiniteken.

³ Tapi kita si tek, bengket ku bas pengadi-ngadin e. Bagi si ikataken Dibata, "Merawa Aku dingen Ersumpah 'Ndigan pe ia la bengket ku bas pengadi-ngadinKu!'" Si enda ikataken Dibata aminna pe nggo dung DahinNa kenca IjadikenNa doni enda.

⁴ Sabap kerna wari si pepituken lit tersurat i bas Pustaka Si Badia, "I bas wari si pepituken ngadi Dibata erdahin."

⁵ Tapi pe lit tersurat, "Asa ndigan pe ia la bengket ku bas pengadi-ngadinKu."

⁶ Kalak si tangtangna megi Berita Si Mehuli la bengket ku bas pengadi-ngadin Dibata erdandanken la ia tek. Adi bage tentu lit kalak si deban si banci bengket ku bas pengadi-ngadin Dibata e.

⁷ Si enda tangkas sabap nggo itetapken Dibata sada wari si deban, si igelari "wari enda". Ndekah kenca si e ngerana Dibata kerna si e arah Daud bagi nggo tersinget arah lebe, "Adi ibegindu sora Dibata wari enda, ula pemersik ukurndu."

⁸ Adi nggo min ndai ibabai Josua bangsa e ku bas pengadi-ngadin Dibata, lanai nari bo min ndai Dibata ngerana kerna sada wari si deban.

⁹ Tapi genduari lit denga nge wari pengadi-ngadin guna anak-anak Dibata, bagi Dibata ngadi i bas wari si pepituken e.

¹⁰ Sabap kalak si bengket ku bas pengadi-ngadin Dibata, ngadi me ia i bas dahinna nari, bagi Dibata ngadi i bas DahinNa nari.

¹¹ Dage sipala-palailah gelah kita bengket ku bas pengadi-ngadin Dibata. Ula lit sekalak pe i bas kita la patuh bagi kalak nai, seh maka la ia bengket ku bas.

¹² Kata Dibata e nggeluh dingen erdahin. Kata Dibata e telapen asangken pedang si dua babahna. Mbages kal bekas penebakna seh maka isirangkenna tendi ras kesah, buku-buku ras utuk tulan. Ihakimina perukuren ras sura-sura manusia.

¹³ La lit kai pe si terligen man Dibata. Kerina si nasa lit tangkas dingen talang i lebe-LebeNa. Man BaNa me sipertanggung jabapken kerina perbahanen-perbahanenta.

¹⁴ Emaka tetaplah si gelem kiniteken si iakuken kita. Sabap lit kap Imam si Mbelinta si mulia si nggo seh ku lebe-lebe Dibata jine, e me Jesus Anak Dibata.

¹⁵ Imam si Mbelinta e labo kalak si la nggejapken kekoten-kekotenta. Tapi Imam si Mbelinta e pernah ngenanami percuban si kuga pa pe, bali ras kita; saja ngenca Ia la erdosa!

¹⁶ Emaka marilah sideheri alu la biar-biaren Dibata si erkuasa si dem alu lias ate. I je sialoken perkuah ate ras lias ate gelah dat kita penampat i bas paksa si iperluken kita.

Ibrani

Video Ibrani 4

Ikuti Kami:

KONTAK | PARTISIPASI | DONASI