Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Amabu'ula li Lowalangi andrõ moguna nasa, ba tebe'e dania khõda nahia wolombase. Tobali, ya tarorogõ ena'õ bõi so samõsa moroi ba gotaluami zi tesõndra si lõ tebe'e nahia wolombase nifabu'u andrõ.
2 Bõrõ me Turia Somuso Dõdõ andrõ no la'ombakha'õ khõda si mane khõra. Ba ba khõra, turia andrõ lõ hadõi mo'õlõ. Bõrõ me inõtõ larongo, ba lõ faduhu dõdõra.
3 Ba sanandrõsa khõda si no faduhu tõdõ khõ Lowalangi, duhu mube'e khõda nahia wolombase si no Ifabu'u li Lowalangi andrõ. Ba faudu da'õ ba niw̃a'õ Lowalangi si mane da'e, "Mofõnu Ndra'o ba fahõlu, 'Lõ dania mõi ira bakha wanõndra folombase andrõ khõ-Gu.'" Lowalangi zanguma'õ si manõ, hew̃a'ae halõw̃õ-Nia no awai i'otarai me Iwõwõi gulidanõ andre.
4 Bõrõ me sanandrõsa ba ngaluo si fitu, so nisura bakha ba Mbuku Ni'amoni'õ si mane, "Ba ngaluo si fitu molombase Lowalangi moroi ba halõw̃õ-Nia fefu."
5 Sanandrõsa ba da'õ so nisura nasa si mane, "Lõ dania mõi ira bakha wanõndra folombase andrõ khõ-Gu."
6 Tobali ya'ira si ofõna mamondrongo turia sanandrõsa ba Duria Somuso Dõdõ andrõ, lõ tebe'e nahia wolombase, bõrõ me lõ faduhu dõdõra. Na si manõ oroma wa so niha bõ'õ si tola manema nahia wolombase andrõ soroi Lowalangi.
7 Bõrõ me Lowalangi zi no mangahonogõi sambua ngaluo bõ'õ nasa, niw̃a'õ-Nia "Ma'õkhõ andre". Ha'uga fakhe aefa da'õ fahuhuo Lowalangi sanandrõsa ba da'õ nifa'ema Dawido, bakha ba ayati si no muw̃a'õ mege, "Na ma'õkhõ andre mirongo li Lowalangi, bõi mi'abe'e'õ dõdõmi."
8 Na no i'ohe mena'õ Yosua niha andrõ we'amõi bakha ba nahia wolombase nifabu'u Lowalangi, ba lõ sa'ae muhede Lowalangi sanandrõsa ba luo bõ'õ andrõ.
9 Tobali, ba Mbanua Lowalangi so nasa wawu'usa li ba wolombase, si mane folombase Lowalangi ba ngaluo si fitu andrõ.
10 Me niha si no mõi bakha ba nahia wolombase nifabu'u Lowalangi khõnia, ba molombase dania ia gõi moroi ba halõw̃õnia fefu, si mane Lowalangi.
11 Bõrõ da'õ, da taforege sindruhundruhu ba wanema nahia wolombase andrõ soroi Lowalangi. Bõi so samõsa gõi moroi khõda zi te'ala si mane ya'ira fõna, me lõ faduhu dõdõra khõ Lowalangi.
12 Taroma li Lowalangi andrõ ba no taroma li sauri, ba sabõlõ atarõ moroi ba gari si faoma bawa. Taroma li andrõ isõsõ irugi bakha noso ba eheha; irugi ba mbu'umbu'u ba uto dõla, irege I'ila bakha gera'era ba sõndra dõdõ niha.
13 Sambua lõ hadõi niwõwõi gõi si tobini ba duduma hõrõ Lowalangi. Fefu hadia ia lõ balubalu ba no mubokai fõna-Nia. Ba ya'ita lõ tola lõ mame'e fanema li khõ-Nia.
14 Da'õ mbõrõ wa ta'aro'õ wololohe nifaduhusida tõdõ andrõ. Bõrõ me so khõda Gere Salaw̃a Sebua, si no mõi bakha irugi fõna Lowalangi -- ya'ia Yesu Ono Lowalangi.
15 Ere Sebua si so khõda andrõ tenga ere si tebai fao ba wamatõfa ba dõdõ-Nia wa'ambõ fa'abõlõda. No na'i mutandraigõ Ia ba ngawalõ hadia ia fefu, hulõ si mane ya'ita, awai i Ya'ia lõ horõ!
16 Bõrõ da'õ, da ta'ondrasi Lowalangi samatõrõ sahakhõ tõdõ andrõ, ba bõi ata'u ita. Lowalangi zangomasi'õ dania ya'ita ba samahowu'õ ya'ita, ena'õ tasõndra wanolo, faudu ba ginõtõ moguna khõda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA