Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Keranaq nike sengonẽq janji jari tame ojok dalem taoq-Ne mentelah masih berlaku, ite harus tetep merase takut ndaq-ndaq araq sopoq dengan lẽq antare side teanggep gagal tame ojok dalemne.

² Sẽngaq Kabar Solah nike sampun teberiteang lẽq ite, pade maraq tipaq ie pade. Laguq lẽq ie pade, manik nike ndẽq araq manpaatne. Sẽngaq sewaktu ie pade dengah, ie pade ndẽq percaye.

³ Laguq ite saq beriman gen tame ojok taoq-Ne mentelah. Hal nike kenaq kance napi saq temanikang siq Allah, maraq niki, "Lẽq dalem murke Tiang, Tiang besumpah, 'Ie pade ndẽq gen tame ojok taoq Tiang mentelah.'" Allah bemanik maraq nike timaq karye-Ne sampun tutuq mulai lẽman dunie niki Ie cipteang.

⁴ Sẽngaq mengenai jelo kepituq, araq tetulis maraq niki, "Lẽq jelo saq kepituq Allah mentelah lẽman selapuq karye-Ne."

⁵ Mengenai hal nike araq ẽndah tetulis maraq niki, "Ie pade ndẽq gen tame ojok negeri nike jari mauq mentelah bareng kance Tiang."

⁶ Jari ie pade saq penembẽq dengah berite mengenai Kabar Solah nike, ndẽqne tame ojok taoq-Ne mentelah sẽngaq ie pade ndẽq percaye. Lamun maraq nike sampun jelas bahwe araq dengan-dengan saq gen tame ojok taoq-Ne mentelah nike.

⁷ Sẽngaq Allah sampun nentuang sopoq jelo, saq tesebut "Jelo Niki". Betaun-taun sesampun nike Allah bemanik mengenai hal nike langan Daud, lẽq dalem ayat saq onẽq sampun tesebut, "Lamun lẽq jelo niki side dengahang Manik Allah, ndaq side pagah."

⁸ Sẽngaq lamun Yusak sampun jauq dengan-dengan nike tame ojok taoq-Ne mentelah, make Allah nẽnten gen bemanik malik mengenai sopoq jelo saq lain.

⁹ Jari, umaq dengan-dengan saq tehususang bagi Allah masih araq janji jari mentelah maraq Allah mentelah lẽq jelo saq kepituq nike.

¹⁰ Sẽngaq dengan-dengan saq sampun tame ojok taoq-Ne mentelah, ie pade gen mentelah ẽndah lẽman selapuq pegawẽanne, pade maraq Allah.

¹¹ Keranaq nike, silaq ite berusahe pacu-pacu jari tame ojok taoq-Ne mentelah nike, adẽq ndaq jangke sopoq dengan juaq lẽman ite saq gagal maraq ie pade laẽq, lantaran ndẽqne percaye lẽq Allah.

¹² Manik Allah nike idup dait kuat; merangan lẽman selapuq klẽwang saq bemangan due. Manik nike nusuk dalem gati jangke misahang jiwe dait roh; sendi-sendi dait sumsum, malahan bau bẽdeang pikiran dait niat atẽ manusie.

¹³ Ndẽq araq sopoq mahluk juaq saq bau seboq diriqne lẽman arepan Allah. Selapuqne pedas penggitan dait kebukaq lẽq arepan-Ne. Dait ite harus betanggung jawab tipaq Allah.

¹⁴ Keranaq nike ite harus tetu-tetu percaye lẽq pengakuan imante. Sẽngaq ite bedowẽ Imam Agung saq belẽq saq sampun liwatin selapuq langit, Ie Deside Isa, Bije saq asalne lẽman Allah.

¹⁵ Imam Agungte nike ndẽqne imam saq ndẽq bau ngeraseang kelemahan-kelemahante. Sebalikne, Ie sampun tecobe lẽq dalem selapuq hal, pade maraq ite mẽsaq; cume Ie nẽnten piaq dose!

¹⁶ Keranaq nike, silaq ite baniang diriq parek ojok tahte paice-Ne adẽq mauq rahmat dait paice, sehingge ite mauq pertulungan lẽq waktune.

Ibrani

Video Ibrani 4

Ikuti Kami:

KONTAK | PARTISIPASI | DONASI