Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mewali, ara mani dandina Pue Ala irikita bona peisake molambi pengkarooangaa hihimbela hai Ia. Ido hai hangangaa mainga-inga mpuuke, bona dati ara hadua hangko i olonta au bara molambi apa au Nadandi iti.

² Lawi ikita ide, rapahawea worimoke Ngkora Marasa, nodo to Yahudi hangkoya. Agayana Ngkora Marasa iti bara moanti pewati irihira, lawi rahadi mbero pea, barahe mepoinalai.

³ Batena pea ikita au mepoinalai au molambi pengkarooangaa hihimbela hai Pue Ala. Ane tauna au bara mepoinalai, barahe molambi apa au Nadandi. Taisa iti hangko i Ngkorana Pue Ala inona au manguli: "RumpuNa, hai Kusumpa, Kuuli: Barahe peisa molambi pengkarooangaa hihimbela hai Iko." Ihira bara molambi pengkarooangaa, agayana nauri nodo, batena mpuu ara pengkarooangaa hihimbela hai Pue Ala au Napasilolonga hangkoya i pewaliana dunia. Lawi i lalu ini alona Pue Ala mampopewali langi hai dunia, hai i alo kapituna mengkaroomi.

⁴ Ara teuki i lalu Sura Malelaha au mokabelai alo kapituna node: "I alo kapituna, Pue Ala mengkaroo hangko i ope-ope bagoNa."

⁵ Hai idemi Ngkorana Pue Ala au tahadi inona: "Bara mpuuhe peisa molambi pengkarooangaa hihimbela hai Iko."

⁶ Ihira au nguru-nguruna mohadi Ngkora Marasa, barahe molambi pengkarooangaa hihimbela hai Pue Ala, lawi barahe moula hawaNa. Agayana tunggaiana Pue Ala, hangangaa ara tauna au molambi pengkarooangaa iti.

⁷ Ido hai Pue Ala mopakanoto hangalo au ntanina bona manusia peisa molambi pengkarooangaa hihimbela hai Ia. Alo au Napakanoto iami alo ide halalu, lawi alo ide tahadimi Ngkora Marasa hangko i Pue Ala. Bahangkia atuna parena roo nabi Musa, Datu Daudi mouki Ngkorana Pue Ala au tahadi inona au manguli: "Alo ide, ane nihadi wotuna Pue Ala, inee nipamatua lalumi."

⁸ Hangkoya, Yosua moantihe to Yahudi mesua i tampo Kanaa au nadandiahe Pue Ala. Agayana bara iti pea au rauli pengkarooangaa hihimbela hai Pue Ala. Ane keiti pea au rauli pengkarooangaa hihimbela hai Pue Ala, moapari pane ara lolitana Pue Ala au mokabelai alo ntanina?

⁹ Mewali, ara mani katepaka i taunana Pue Ala bona molambi pengkarooangaa hihimbela hai Ia. Pengkarooangaa iti, nodo pengkarooangaana Pue Ala i alo kapituna.

¹⁰ Lawi ane mengkarooke hihimbela hai Pue Ala, lempona, takabahami peharunganta i pobagonta haduduanta hai meharunga peake i Pue Ala. Pengkarooangaa iti rapandiri node: nodo Pue Ala mengkaroo hangko i bagoNa i alo kapituna, mengkaroo worike hangko i bagonta.

¹¹ Mewali halalu, hangangaa tapari-pari molambi pengkarooangaa hihimbela hai Pue Ala, bona datike ara au mousuli hangko i pepoinalainta, nodo to Yahudi hangkoya au bara moula hawaNa.

¹² Lawi Ngkorana Pue Ala iami lolita au tuwo hai au makuasa. Meliu kamataruna hangko i piho au momata mpotimali. Hamata piho peisa metohu duuna hawe i leho-leho buu hai ati buu. Nodo wori NgkoraNa Pue Ala metohu duuna hawe i lalunta hai i tanoananta. Hai NgkoraNa iti Napake Pue Ala moparesa pekirinta hai tunggaiana lalunta.

¹³ Bara ara hampaka au tewuni i peitaNa. Hinangkana au ara tongawa hai mabaa Iria. Hai Iria hangangaa tapangaku ope-ope babehianta.

¹⁴ Mewali, ara irikita hadua Tadulako Menomba Mahile au meliu mpuu kamahilena tuwoNa: iami Yesu Anana Pue Ala. Ia mengkaore lao i suruga hai mesua i lindona Pue Ala mewali Tadulako Menombata Mahile au mamperuruike. Ido hai hangangaa tapakaroho pepoinalainta hai tapangaku liliu kaYesuna Amputa.

¹⁵ Lawi Tadulako Menombata au Mahile moisa kamaledenta. Naisa mpuu, lawi Ia rakelo worimi i hinangkana nodo ikita, agayana Ia bara madosa.

¹⁶ Ido hai halalu, ineemoke langa. Hangangaa baimoke mohungkuki Pue Ala anti kaYesuna au mewali Tadulako Menombata au Mahile. Maimoke mohungkuki Pue Ala i pohudaaNa au i suruga, bona tahadi ahiNa irikita, hai Natulungike hangko i kabulana laluNa i tempona au taparaluu.

Ibrani

Video Ibrani 4

Ikuti Kami:

KONTAK | PARTISIPASI | DONASI