Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto! Nako niakimake 'o nyawa 'o sowono yodiai, ge'ena ngini gee nio'ahu moteke 'o Ngomasa 'Itebi-tebini, salingou niakiriwo 'o nyawa go'ona la 'uwau 'o sowono yodiai. Ma ngini salingou niakiriwo de nia singina 'ima-ma'ai, de nimasitiari la 'uwa ngini mita niootaka 'o sowonuku.

² Salingou niomarimoi niakiriwo 'o nyawa manga gina 'itu-tubuso, la de ge'ena ngini niamoteke ma Kristus 'awi besesongo.

³ Nako moi yomamaoku 'ona ge'ena yobaraguna, 'ena momongo ko'uwa, ge'ena ka 'ona ma sirete yomasihaga.

⁴ 'O nyawa moi-moi salingou 'ona ma sirete yomalega ma diai manga gokoie yaowa bolo ko'uwa. Nako manga gokoie yaowa ge'ena 'idadi yomorene, ma 'uwa yosikadelega de 'o nyawa 'iregu manga gokoie.

⁵ Sababu 'o nyawa 'isinoimi salingou yamadamoku to 'ona manga gokoie ma Jo'oungu ma Dutu wi bionoka.

⁶ 'O nyawa gee yadawo-dawongo ma Kristus 'awi do-dotoko, 'ona salingou yokula 'o kianikia yaowa-owa manga guruka.

⁷ 'Uwa ngini nisihaga, sababu ma Jo'oungu ma Dutu koidadiwa powisisasaru! 'Okia naga 'o nyawa yadatomo, dua ya'utuku mita ge'enali.

⁸ Nago'ona manga di-diai moteke ka to 'ona manga du-duaka 'ito-torou, 'ona 'asa yosongene sababu manga du-duaka 'ito-torou ge'ena. Ma nago'ona manga di-diai moteke 'o Ngomasa 'Itebi-tebini ma pareta, 'ona 'asa yamake 'o 'ahu ma dutu 'ika-kakali 'o Ngomasa 'Itebi-tebinino.

⁹ Ge'enau so ngone 'uwa 'inakiwounu podiai 'okia sonaa yaowa-owa; sababu nako ngone kopomaogoruwa podiai gee yaowa-owa, dua ma du'uruoka ngone 'asa pa'utuku ma hasili yaowa-owa.

¹⁰ So kokia naga ma do'ingo nanga 'orasi ka de ma 'enasi, ge'ena salingou nanga gokoie yaowa 'o nyawa 'iodumika, 'ifoloiosi nanga 'esa moika gee ka 'o ngo-ngaku moi.

¹¹ Nialega niosidi-diai ma bula ne'ena gee ngoi ma sirete tolefo de 'o huruf 'ila-laagomo.

¹² 'O nyawa gee yomau yomasidaduie de to 'ona ma sirete manga di-diai gee 'o nyawa yamake-make, 'onau ge'ena yogegoto niomoteke nimasuna. Ma koge'ena yodiai ge'ena yomau duga ka 'o Yahudioka 'uwa yakisikisaa 'onaka, sababu 'o nyawa gee yositotara ma ngale ma Kristus wosongene 'o salipoka ge'ena ma raiokau yakisangisara.

¹³ 'O nyawa gee yakisuna-sunakau mita koyamotekuwa 'o 'agama ma besesongo. Ma 'ona yomau nisuna, la to 'ona manga singina 'iamoko 'ato ngini niamoteke ma 'atorangi ge'ena.

¹⁴ Ma ngoi 'ai singina 'iamoko ge'ena duga ka nanga Jou Yesus Kristus wosongene 'o salipoka. So sababu ma Kristusou wosongene 'o salipoka so 'o dunia ma mau-mau ge'ena ma faedaa ka ma eta ma koi'iwau ma ngale ngoi. De ma duniaka ne'ena, ngoi mita 'isoka tosongenokau.

¹⁵ Nisuna bolo ko'uwa ge'ena ma ngale koi'iwa. 'Iparaluu ge'ena 'o 'ahu ma sungi.

¹⁶ 'O nyawa gee yo'ahu moteke koge'ena, de mita ma Jo'oungu ma Dutu 'awi 'umati 'iodumu, ngoi toga'asoko tanu ma Jo'oungu ma Dutu winisibarakati de winikula 'o sanangi.

¹⁷ Deika, ka moi ma 'uwau 'isisusali, sababu 'ai roesie ma nyo-nyata de ma 'ena 'ato ngoi 'o Yesus 'awi do-domoteke.

¹⁸ Tanu ma Yesus Kristus kaitaurika winisibarakati 'Esa moi riaka dodoto. 'Amin. Koge'enau. Ngoi 'o Paulus, tinitabea!

Galatia

Video Galatia 6

Ikuti Kami:

KONTAK | PARTISIPASI | DONASI