Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian! Lamun sopoq dengan tedait gawẽq dose, side pade saq idup menurut Roh Allah harus bimbing dengan nike adẽqne tulak ojok langan saq kenaq. Laguq side pade harus ngelaksaneang nike secare lemah lembut, dait jagaq ndaq jangke side mẽsaq tegode ẽndah.

² Side pade harus saling tulung lẽq kesusahan dengan, adẽq siq care nike side pade taat lẽq prẽntah Almasih.

³ Lamun sopoq dengan paran diriqne penting, padahal ndẽq, dengan nike beduste lẽq diriqne mẽsaq.

⁴ Sebilang dengan harus meriksaq mẽsaq napi kelakuanne solah atao ndẽq. Lamun solah, ie bau merase bangge siq hal nike. Laguq ndaq ie bandingang kance napi saq telaksaneang siq dengan lain.

⁵ Sẽngaq sopoq-sopoq dengan harus bedowẽ rase tanggung jawab mẽsaq.

⁶ Dengan saq nerimaq pengajahan mengenai Manik Allah, sepatutne ie bagiang selapuq saq solah saq araq lẽq ie tipaq dengan saq ngebẽng pengajahan nike.

⁷ Ndaq sesat. Allah ndẽqne bau teanggep rẽmẽh! Napi saq tetalet, nike saq tepataq.

⁸ Lamun dengan nalet menurut tabiat manusiene, ie gen mataq kematẽan lẽman tabiatne nike. Laguq lamun ie nalet menurut pimpinan Roh Allah, ie gen mataq idup sejati dait kekel lẽman Roh Allah.

⁹ Keranaq nike, ndaq ite jari pendaq ngelaksaneang hal-hal saq solah; sẽngaq lamun ite ndẽq mentelah ngelaksaneang hal-hal nike, make lẽq sopoq jelo ẽraq ite gen mauq hasilne.

¹⁰ Jari, semasih ite araq kesempatan umaq, ite harus ngelaksaneang saq solah tipaq selapuq dengan, terutame gati tipaq semeton-semetonte saq seiman.

¹¹ Perhatiang solah-solah bagian niki saq tiang tulis mẽsaq kadu hurup saq belẽq-belẽq.

¹² Dengan-dengan saq mẽlẽ ajum diriqne lẽq hal-hal saq lahiriah, ie pade saq berusahe maksaq side turut aturan sunat. Laguq ie pade laksaneang nike cume adẽq ie pade ndẽq teaniaye lantaran salib Almasih.

¹³ Dengan-dengan saq turut aturan sunat ẽndah ndẽqne ngelaksaneang Hukum Taurat. Laguq ie pade mẽlẽ side pade tesunat, adẽq ie pade bau banggeang bahwe side pade taat lẽq aturan nike.

¹⁴ Laguq tiang tetu-tetu ndẽq mẽlẽ banggeang napi juaq, selain Junjungante Saq Mulie Deside Isa Almasih saq sampun ninggal tepakuq lẽq kayuq salib. Sẽngaq lantaran Ie sampun ninggal lẽq kayuq salib, make dunie ndẽqne bedowẽ arti napi-napi malik umaq tiang. Dait tipaq dunie niki, tiang ẽndah piaq diriq maraqne sampun tepakuq lẽq kayuq salib.

¹⁵ Tesunat atao ndẽq tesunat, nike ndẽqne penting. Saq penting nike jari ciptean baru.

¹⁶ Bagi dengan-dengan saq idup menurut pendapet nike, dait maraq nike ẽndah Israel saq jari dowẽn Allah, tiang harep Allah gen ngicanin damẽ sejahtere dait rahmat-Ne.

¹⁷ Selanjutne, ndaq jangke sopoq dengan juaq nyusahang tiang malik, sẽngaq lẽq awak tiang araq bukti-bukti bahwe tiang pengiring Deside Isa.

¹⁸ Rahmat Junjungante Saq Mulie Deside Isa Almasih, tetep araq bareng kance side pade. Amin.

Galatia

Video Galatia 6

Ikuti Kami:

KONTAK | PARTISIPASI | DONASI