Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Utat mita! Aka oyuíon intau ing kino kadapatan monimu nogaid kon no'itaḷaí, daí mo'ikow inta nobiag no'idudui kon ibog in Roho i Allah, musti modia bui kon intau tatua mongindaḷan inta mo'itutui. Ta'e koḷukoíon im mosingog, bo mo'ikow musti mokopo'ingat simbaí diaí kopongaruan doman.
2 Mosituḷungan aka moko'ontong kon roriga ande oaíidan in intau ibanea. Aka tua in aidan monimu, yo dinumuduidon kom parentah i Kristus im mo'ikow.
3 Aka tobatuí intau bo nosangka kon sia tua intau moponting, padahaḷ bo diaíbií, yo sia in nonguboḷdon ko'inia tontanií.
4 Pomuḷoi intau mustibií mo'indoi kon oaíidannya tontanií, mopia andeka diaí in oaíidnya. Aka mopia daí tuabií im mokosanang kong ginanya. Ta'e dona'aibií mopoyobandingmai onu inta inaidan intau ibanea.
5 Sim pomuḷoi intau mustibií motanggung jawab kon onu in inaidnya tontanií.
6 Intau inta notarima kon totunduí i Kristus, musti mosilai doman ko'i gurunya kom bayongan inta mopia, inta oyuíon koinia.
7 Dika mo'ibog uboḷan. Sing ki Allah in diaíbií mota'au pogogitogan! Sin onu im pomuḷa'an intau yo tuabií doman in sipu'onnya.
8 Aka ki ine in nomuḷa pinodoyon kon tabiat in intau, yo kopatoian im mo'uliínya. Ta'e aka sia bo nomuḷa pinodoyon kong ko'ibog in Roho i Allah, yo kobiagan mononoi im mo'uliínya nongkon Roho i Allah.
9 Manangka intua dona'aibií mokopomaḷas im mogaid kon inta mopia; sin aka kita bo diaí mogogai im mogaid kon inta diaí mopia, yo korasa'anbií doman naton ing ko'onggotannya.
10 Daí tuamai ko wakutu oyuíonpa ing kasampatan naton, yo koligai ing kita simbaí mogaid kon inta mopia kom bayongan intau, muna-munamai'n ko'i utat mita naton inta mopirisaya ko'i Tuhan Yesus.
11 Tarukiradon totok kopira onu inta pinaisku takin hurup mita moḷoben.
12 Intau mita inta mokiko'ontong kon tumpaḷa intau, mosia inta moramiji momakisa ko'i monimu simbaí sunaton. Ta'e tua in aidan monia simbaí diaí pogutuíon intau Yahudi im mosia. Sim mosia nopoyaput in habar soaáḷ roriga i Kristus.
13 Sim mosiapa inta nokisunat diaíbií doman dinumudui kon hukum i Musa. Ta'e ibogon monia im mo'ikow musti mokisunat, simbaí mosia mota'au dumodia, sim mo'ikow no'ibog dinumudui kon atorang tatua.
14 Ta'e aku'oi in totu'u kon doiíbií dumodia kon onu inta ain inaidanku, kolikudbií im modayow ko'i Tuhan naton ki Yesus Kristus inta aim minatoi pinopopakuí kong kayu pinoyotaḷempang. Lantaran Sia bo aim minatoi pinopopakuí kong kayu pinoyotalempang, daí dunia na'a in diaí bidon im mangalenya ko'inakoí. Naí doman tua aku'oi kon tayowon in dunia na'a, inanggap monia aku'oi na'a naonda bo minatoidon.
15 Sinunat ande diaí sinunat, tua in diaíbií moponting, sim mobaliíbií intau inta mobiag mobagu takin i Allah im moponti-ponting.
16 Kom bayongan intau inta umuranpa nokadai kon atorang tatua bo bayongan doman intau inta dinumudui kon ibog i Allah, umuran igumonku makow simbaí ki Allah mobogoi ing kobiagan motompia bo barakat-Nya.
17 Mo'iduduimai kon tua, po'igumanku doman, simbaí diaí tobatuímai intau moposusahmai ko'inakoí bui. Sing kon awakku na'a oyuíonbií in tandaí kon aku'oi na'a in dumoduduibií i Yesus.
18 Po'igumonkudon makow totabi bo barakat i Tuhan naton ki Yesus Kristus umuran kotaki-takin monimu utatku mita. Amin. Hormat nami, Ki Paulus
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA