Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ee, tokupusile'to! Ia ke denni mesa' tau diampa' mpugauk dosa, ia to kamu' nturu' Roh Allataala la mipatuju rampa'i joo tau lako lalan kameloan. Apa la mijagai to kalemi danggi' mituru' toda mpugaukki.

² La sibalian kamu' mpassan pamawanmi, sanga iamo joo la minii mpugaukki to atoran-Na Almaseh.

³ Ia ke denni tau ssanga bang kalena makkeguna, apa te'da natongan, iamo mbango'-bango'i kalena.

⁴ Pada la mparessaki' kaleta' kumua, meloraka ba'tu te'daraka namelo to panggaukanta'. Ia ke melomi, mane'ki' wa'ding masannang. Apa te'da tawa'ding mpasibandingngi panggaukanna tolaen,

⁵ sanga simesa'-mesa' tau pada la mpebalian kalena.

⁶ Ia to tontarima pangngajaran-Na Puang Isa Almaseh, pada la natawa-tawai barakka'na sola gurunna.

⁷ Danggi' mitobango'-bango'i kalemi! Nasaba' Ia to Puang Allataala te'da nawa'ding dipaningoi. Apa to natanan tau, iamo la napebuai,

⁸ sanga ia to tonturu' bang kamadoangan penawanna, la llolongan kasaburan. Na ia to tonturu' pangpatujun-Na Roh Allataala, la nnampa' katuoan melo te'da cappa'na.

⁹ Danggi' tamarosso mpugauk kameloan, nasaba' ia ke te'da tamarosso, nang la den pissen talolonganni to assele'na.

¹⁰ Iamo joo ia naden unapa wattu dibenki', tamanggauk melo lako padanta' rupa tau, la'bi pole'pa lako sile'to padanta' to matappa'.

¹¹ Kitai matumba matonggona tee hurupu' pangnguki'ku' mati'.

¹² Ia to guru tangtongan, madoangri la napakala'bih tau. Naparuku kamu' mpugauk sunna', dikua nadanggi' napakario-rioi to-Yahudi, sanga pangngajaran kaju sitamben-Na Almaseh, battuananna kumua kamatean-Na mandara Almaseh jao kaju sitamben la mpupenjaji tomelo tau.

¹³ Nasaba' ia una to tompugauk sunna', te'da naturu' ngasanni to atoran agama, apa iara nakabudai ke mpugauk kamu' sunna', anna pemajaoi penawanna kumua, "Naturu'i to-Galatia to pangngajaranki'."

¹⁴ Ia tee aku', te'da kulampemajaoi penawangku', apa mpakala'bihna' Puangta' Puang Isa Almaseh to mangkamo mate jao kaju sitamben. Iamo joo ia to tolino na atoranna te'damo bua'na lako aku'. Susi too aku' lako tolino.

¹⁵ Nasaba' todisunna' ba'tu totangdisunna' pada te'da naparallu, apa ia to parallu iamo to katuoan baru.

¹⁶ Dennaa upa' nabenni Puang Allataala kamamasean-Na sola kamasannangan-Na sininna to nturu'i tee pangngajaran, iamo to umma'-Na Puang Allataala.

¹⁷ Danggi'mo naden tau ssussaina', nasaba' budamo lape' jio kaleku' to buttinna kumua umma'-Nana' Puang Isa.

¹⁸ Dennaa upa' nabarakka'i tarruh kamu' Puang Isa Almaseh. Amin. Sallangki' mati', Paulus

Galatia

Video Galatia 6

Ikuti Kami:

KONTAK | PARTISIPASI | DONASI