Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I kitẹ ini e seng nal᷊iwirẹ̌, u i Kristus seng něliwirẹ̌ si kitẹ! Kụ ual᷊ingu ene ute pěmpẹ̌tumpaedẹ̌ su karal᷊iwiru, kụ abe kawe saụ mapulu makitahuěllang.
2 Ene ěng, kereu i kamene mẹ̌dorong makisunatẹ̌, ene mangal᷊ene i Kristus tawẹ gunane si kamene. Kụ mẹ̌bẹ̌berang ini e kai iạ sẹ̌saku i Paulus.
3 Sěnsul᷊eko l᷊ai iạ mangonggọu ingate su taumata apan mẹ̌dẹ̌dorong makisunatẹ̌, u iạ kai hinong měndal᷊engu kaguwạu toratẹ̌!
4 Kamageng i kamene mẹ̌tawakal᷊iwe mẹ̌sěngkapian Duata su ral᷊ungu toratẹ̌ ute, mangal᷊ene pẹ̌kakauhu ringangi Kristus e seng nạběsụ. Kụ ual᷊ingu ene i kamene mẹ̌bẹ̌biahẹ̌ su l᷊ikudu tatal᷊ěntụ u Ruata.
5 Arawe si kami, i kami e mělẹ̌harapẹ̌ u ual᷊ingken tul᷊umangu Rohkẹ̌ u Ruata e ringangu iwěnta su pangangimang i kami si Kristus, Mawu e mapakawalang kami mẹ̌sěngkapia ringang'E.
6 Batụu kereu i kitẹ seng nasěmbaụ dingangi Kristus Yesus, ute hal᷊ẹ̌u tumuhụ arau tawe tumuhụ atorangu sunatẹ̌ e tawe lai makoạ sungkal᷊ene. Kụ kahumotongange kětạewen pangangimang si Kristus, kụ ene mal᷊ahẹ su ral᷊ungu kakěndagi kitẹ su taumata wal᷊ine.
7 Kạngerẹ i kamene nạungbe měbẹ̌bangkuadẹ̌ kerene kapiane! Kụ ini e kawe unụe i kamene seng tawe lai tumuhụ kapulun Duata? Kai i sai tangu mạmitaugẹ̌ si kamene?
8 Nal᷊ahẹu i sain nẹ̌koạ ene wal᷊inewe Ruata kụ seng nẹ̌kui si kamene!
9 "Lahaesẹ̌ kạdodọ sarung makatuwo kal᷊awọu ghol᷊opung," angkuěngu taumata.
10 Manịeng kerene iạ deng bẹ̌dang mangimangu i kamene, sarung tawẹ kanaung i kamene wal᷊ine; batụu i kitẹ seng nasěmbaụ dingangi Kristus. Kụ iạ mangimangu isaiewen apan mapẹ̌bẹ̌bingọ u naung i kamene, sarung ihukungu Ruata.
11 Iạ e wue manga anạ u sěmbaụ, unụe iạ měngkate hanesẹ̌ sẹ̌sẹ̌dukang kereu iạ bẹ̌dang mělẹ̌habaru tiahan sunatẹ̌ e ghẹ̌gaghal᷊eěng? Kereu iạ mambeng mělẹ̌habarẹ̌ kerene, ute pělahabarẹ̌ku su hal᷊ẹ̌ u kuruis'i Kristus e tawe makakal᷊ěton sangkural᷊ange.
12 Limembong kapiane manga taumata apan mapẹ̌kẹ̌kal᷊emboghang u tiněnnang kamene ene saunengke sẹ̌bang sěnsul᷊ẹ bọu jamaatẹ̌.
13 I kamene seng nikuiang tadeạu makoạ taumatang karal᷊iwirẹ̌. Kai abe kawe mẹ̌pakẹu karal᷊iwirẹ̌ ene tadeạu měngkate hanesẹ̌ mẹ̌kẹ̌koạ balạewe apa kapulung kamene koateng. Su sěmběkane, i kamene harusẹ̌ mẹ̌kakakěndagẹ̌ dingangu mẹ̌tẹ̌tatondong tangkiang.
14 Patikụ toratẹ̌ e seng nasahiangkung su ral᷊ungu wawera sěmbaụ ini e, "I kau e kěndagẹ̌kong kasanggidangu kerẹewe i kau kuměndagu watangengu hala."
15 Arawe kereu i kamene kawe mẹ̌kẹ̌kakahụ sěmbaụ dingangu wal᷊ine, ute pakapia wue, i kamene sarung mawinasa sěngkawinasa.
16 Timonaku e kere ini: Balạe kere Rohkẹ̌ u Ruata e mamihing si kamene ringangu kumbahangbe měmpẹ̌biahẹ̌ tumuhụ kapulun taumata.
17 Batụu kapulun taumata e mědẹ̌darokạ dingangu kapulun Rohkẹ̌ u Ruata, dingangu kapulun Rohkẹ̌ u Ruata e mědẹ̌darokạ dingangu kapulun taumata. I rẹ̌dua ene měngkate lawọ tawe mahang pěloěng hakịu i kamene tawe makakoạ apang kụ ikẹ̌kapulung kamene.
18 Kai kereu Rohkẹ̌ u Ruata e mangahạ si kamene, ute i kamene tawe pẹ̌kawasaěngu toratẹ̌.
19 Kapulun tabiatu taumata e mal᷊ahẹ su ral᷊ungu manga kakanoạ u pẹ̌sasundal᷊ẹ̌, karal᷊amuhụ, dingangu tawe mělahino;
20 su ral᷊ungu pẹ̌tatahamawu su mahang duata, pẹ̌dal᷊ahopa, su ral᷊ungu pẹ̌sasasẹ̌du, pẹ̌kakakoka, sasingking, mal᷊ighạ mẹ̌pědu, měnẹ̌naung batangeng hala; pẹ̌dararal᷊aị; pẹ̌tatawang,
21 dingangkewen pananoi, pẹ̌tatěngkiwukang, pẹ̌sasal᷊imbang, dingangu lai wal᷊ine. Su těngon patikụ ene iạ měmaghẹ maul᷊ị si kamene orasẹ̌ ini kerẹewe nạung seng takụ nipaul᷊ị lai kal᷊imona u apan taumata měmpẹ̌kẹ̌koạ kerene ute tawe makoạ dal᷊ohon jamaatu Mawu.
22 Su sěmběkane, kereu Rohkẹ̌ u Ruata mangahạ pẹ̌bawiah'u pẹ̌sěngkatau ute wuane kai: I sire mẹ̌kẹ̌kakěndagẹ̌, mẹ̌daral᷊uasẹ̌, maghaghighilẹ̌, makakẹ̌dang, dingangu mawawudi, maral᷊ahimumu sěmbaụ su wal᷊ine, masatia,
23 naung i sire masasanạ dingangu měngkai mẹ̌tẹ̌těngkaudupu watangeng. Tawẹ apa toratẹ̌ mẹ̌sẹ̌sědingu manga hal᷊ẹ̌ kerene.
24 Taumata apan seng nakoạ tataghuaneng i Kristus Yesus, taumata ene seng němate kakakoạ u taumatane ringangu patikụ kapulun gẹ̌si ringangu ěnninge.
25 Rohkẹ̌ u Ruata seng nangonggọ si kitẹ pẹ̌bawiahẹ̌ buhu; ual᷊ingu ene i Sie mal᷊aing harusẹ̌ měngawasa pẹ̌bawiahi kitẹ.
26 I kitẹ tawe wotonge měngobotẹ̌, dingangu mẹ̌tatatědụ u ral᷊ungu naung, ringangu lai mẹ̌papangiri sěmbaụ su wal᷊ine.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA