Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tana'a kita totu-totu'udon nobebas, sing ki Kristus tontanií in nopobebas ko'i naton! Tuamai tantuídon ḷukadai ing kabebasanmu, bo dona'ai mo'ibog bui tonggata'an.
2 Pokotorop in na'a, aku'oi, ki Paulus moguman ko'i monimu: Aka mo'ikow bo moki sunat, yo tua im mangalenya, ki Kristus in diaídon baraguna ko'i monimu.
3 Komintanpa doman aku'oi mobogoi im poringatan kon intau mita inta moramiji moki sunat, sia im musti mopobayak im bayongan inta pinais kon hukum i Musa.
4 Aka mo'ikow bo moramiji dumudui kon hukum i Musa simbaí posaḷamaton, yo tua im mangalenya hubungan monimu takin i Kristus nobontowdon. Bo aka natua yo mo'ikow in nobiag bidon kon ḷuai in totabi i Allah.
5 Ta'e aka ko'i nami, kami tongaíbií moharap makow kon totabi i Allah sim pinodoyon kom pirisaya ko'i Kristus. Ki Allahbií im mobogoi ing kasampatan mobiag moyodame bui takin-Nya.
6 Sin aka kita bo ain notobatuí takin i Kristus Yesus, yo soaáḷ sunaton ande diaí sunaton, diaíbií mobalií soaáḷ ko'i naton. Sin totok mopenting im pirisayabií ko'i Kristus bo tua im monyata kon tabi naton kon tumpaḷa intau.
7 Kolipod mo'ikow mosiḷawangan mogaid kon inta mopia. Yo nongonu sim masa na'a mo'ikow doií bidon dumudui kon onu inta kino ibog i Allah? Ki ine in nopongaruh ko'i monimu?
8 Nopasti bidon kon de'emanbií ki Allah inta nogoinií ko'i monimu in nogaid kon soaáḷ natua.
9 Nana'a kain singog in intau, "Ragi topilik nokokutad kom bayongan topong inta pomia'an kukis."
10 Umpakahbií natua ta'e aku'oi im mopirisayabií kom mo'ikow in diaípabií tongaí mopomakeí in raian monimu tontanií, sing kita ain notobatuí takin i Kristus. Bo moyakinbií in aku'oi kong ki inekabií intau inta mopotomba'uk in raian monimu nion, toko hukumonbií i Allah.
11 Bo aka soaáḷ aku'oi utat mita, nongonubií sin umuranbií saturuon monimu in aku'oi aka moguman kon atorang in sunat tua in diaíbií moponting? Aka aku'oi mopota'au natua, daí onu inta pinota'auku soaáḷ kayu pinoyotalempang i Kristus, diaí bidon mokopomukaí kom bobayowan.
12 Mopiadon totok aka intau mita inta umuran mopotomba'uk in raian monimu nion, baḷuídon ḷumuai nongkon jama'at!
13 Utat mita! Mo'ikow aindon inoinií mobalií intau inta nobebas. Ta'e dona'aibií pakeíon ing kabebasanmu tatua saḷaku kasampatan mogaid kon onukadon ing ko'ibog monimu aidan. Ta'e popobaragunabií ing kasampatan tatua motuḷung kon intau ta'e musti podoyon kon tabi kon tumpaḷa intau.
14 Bayongan hukum in agama sinipun kon tobatuí parentah tana'a, "Kotabibií in tumpaḷa intau naí kototabimu kon awakmu tontanií."
15 Ta'e aka mo'ikow bo mo'ibog mosi kamburungan ande mosi limodan, yo kopopia sin dikabo mo'ikow tumpaḷa moyoyang.
16 Nana'abií im makusudku: "Kobiagdon mo'ikow podudui kon ibog in Roho i Allah, dona'aibií mo'ibog mobiag podudui ibog in intau.
17 Sin onu inta kino ibog in intau noyoposibií ing kino ibog i Allah, andeka nana'a, inta kino ibog i Allah noyoposibií inta kino ibog in intau na'a, tuamai mo'ikow diaí mota'au mogaid kon onu inta ko'ibog monimu.
18 Ta'e aka mo'ikow bo mo'ibog kapiton in Roho i Allah, yo mo'ikow in diaí bidon mobiag kom bonu ing kawasa hukum i Musa.
19 Ibog in awak na'a ontongon bidon kon oaíid mita inta diaí mopia, bo mora'at bo inta diaí doman patus aidan in intau.
20 Mosia mo'ibog mosumbah kon ilah mita ibanea, mongonggaing, mo'ibog mosisaturuan, mo'ibog moropatoi, mo'intoi kon intau ibanea, ḷagi tumoruí, bo tongaí momikir kong kopontingan tontanií, momoguya'at kon jama'at, bo mo'ibog mopoyoposi kon intau.
21 Diaí mosanang ing gina aka moko'ontong kon intau ibanea no'iliu kom batangan, umuran monginum kon inta mokoḷoḷangu, mo'ibo-ibog in rame bo noyagi-yagipa doman ing ko'ibog monia. Kom bayongan oaíid natua, buikupa doman tonggina'an im mo'ikow, naí kolipod kon tantuí mokopo'ingat, sin intau mita inta nogaid kon soaáḷ mita natua diaíbií mobalií umat i Allah.
22 Tongaí intau mita inta kinawasa'n in Roho i Allah, yo nana'abií in aidan monimu: Oyuíon totabian, umuran mosanang ing gina bo mo'onow ing gina, oyuíon kasabaran, mopia ing gina, umuran mopia kon tumpaḷa intau, motoindudui,
23 mo'ompaí in dodia, bo mokokotahang kon gina. Diaíbií in hukum agama im molarang kon oaíid mita natua.
24 Ki ine inta ain nobalií kapunya'an i Kristus Yesus, yo mosia tua ain doman noḷumbuí kon tabiat intau bo bayongan ibog in dunia na'a.
25 Aka roho i Allah bo nobogoidon ing kobiagan nobagu ko'i naton, yo pomayakdon makow, simbaí sia im mongawasa kong kobiagan naton.
26 Bo dona'aibií ing kita kumaḷakuang, mosiposakian kong gina, bo mosi intoian."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA