Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Rat ni Paulus luk pinili' mangun ku rasul, baken ratnan lemulun idi baken lemaba lemulun teh, iamo' ratnan Yésus Keristus idi Allah Taman, luk pangeh nenui Yésus rat arang lun naté.

² Amung-amung kinanak luk tungé' maré tabi' denganku kuan sidang-sidang luk déi' Galatia:

³ Do' katu idi awang temurun kuan muyuh ratnan Allah Taman idi Tuhan tau Yésus Keristus.

⁴ Keristus nemaré bururNeh ngaceku sala' tau, pad Ieh miak muit netau ratnan kareb luk dat ini maya' pian Allah, ieh ineh Taman tau.

⁵ Rayeh kuan Allah macing ruked-ruked! Amin.

⁶ Ui mawa ngaceku muyuh mesaget maya' bala luk baken, idi teketed ratnan Allah luk nenawar nemuyuh bang katu Keristus.

⁷ Setuneh na luk idi Bala luk Do' luk baken; iamo' inan sebuang lemulun luk ngagau nemuyuh, idi luk sikal ngisu' Bala luk Do' ratnan Keristus.

⁸ Iamo' kudeng kai ini idi seburur melaikat rat surga pana' miak mada' kuan muyuh bala luk baken ratnan luk kai pangeh nemada' kuan muyuh, nima' neneh uen ngediman!

⁹ Kai pangeh nemala atun, nekini pana' ui mala teh, idi kudeng idé lemulun mada' bala kuan muyuh luk baken ratnan luk pangeh ilap muyuh ineh, nima' neneh uen ngediman.

¹⁰ Inanké muyuh ngerawé ui pian buren lemulun? Na tu! Ui pian buren Allah. Inanké ui pian pedingeren lemulun? Kudeng pieh kudeng ineh, idi baken ui ini demulun Keristus.

¹¹ Nima' negku maré kali' nemuyuh, O kinanak-kinanakku: Bala luk Do' luk pangeh bida'ku ineh baken ratnan lemulun.

¹² Na ui nengalap bala ineh ratnan lemulun, idi na ui bida' seburur lemulun pana'. Yésus Keristus sebuleng nengelio ineh kuanku.

¹³ Muyuh pangeh neninger ratnan ulunku luk atun bang sembayang lun Yahudi, ratnan ui pelaba ucet ngedereh sidang Allah idi nengusag neneh.

¹⁴ Ui metaduk bang sembayang lun Yahudi meluun ratnan pupuku luk mula' luk mepad ulun denganku, ngaceku pelaba kél ratnan amung-amung adat tepunku.

¹⁵ Iamo' Allah dengan katuNeh nemili' negku rat bang batek tinanku, idi nenawar negku pad ui ngakem kuanNeh. Idi kareb ieh pian

¹⁶ ngegala' AnakNeh ineh bang negku, pelé ui miak mada' Bala luk Do' ratnan Ieh arang lun pupu baken, idi kareb ineh teh ui na pegayam dengan seburur pana',

¹⁷ idi na ui numak iné' Yerusalim matun lemulun luk mangun ku rasul atun rat negku, iamo' ui iné' déi' bawang Arab, idi nelemubed teh iné' Damsik.

¹⁸ Pangeh teluk lak baruh ui numak iné' Yerusalim sikal pekali' dengan Pétrus; idi ui netudo denganneh dueh minggu kinioneh.

¹⁹ Iamo' rasul-rasul luk baken, seburur pana' nateh nepapu'ku iamo' Yakub sebuleng mo' luk kinanak Tuhan ineh.

²⁰ Luk inayudku ini matu. Pa kiung Allah na ui mebalih.

²¹ Muci ratnan ineh ui iné' déi' bawang Siria idi Kilikia.

²² Iamo' kiungku nateh initi sidang luk bang Keristus déi' Yudia.

²³ Ideh nekali' luk bila lemulun mo', "Lemulun luk nengedereh netau atun, nekini mada' Bala luk Do' ratnan anu luk piderehneh atun."

²⁴ Idi ideh nengubur Allah ngaceku ui.

Galatia

Video Galatia 1

Ikuti Kami:

KONTAK | PARTISIPASI | DONASI