Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Surad gini dau dang, Paulus, dou yeng yedag Allah men goucimdeb se cinogo Pilipi, an meijen mougtir, dara meren gedeijan yen yaugwan. Anai yen yedag hom dara Krisdus Yesusohob. Dara dan insi, Timotius, en toua esa mer deb se surad gini naugb en ou yen. Anai aman amahwas amedag Krisdus Yesus men sogougb naugb aman amasai en moro dou lusud touohob.

² Dangga hang, aman amacgeij maman Mamina Allah dara maman Adehsud Yesus Krisdus naugb lan mardoc eineg an yen. Dara lan laseyeiyo yen. Dara lan laic gesgigouhwesa dou yen dougwo areg gecgu augwan toua namcir.

³ Astesda sug dan indoc eiseisan meijen geicara an dan sug nosa, kaba, dan den sijo dou Allah naugb yen toua. Anai sug dan desai Mer Geigouhw eisaugb Krisdus dou yen sug aimougtut, kaba, yen yemamsoho dan touwero. Doba dau lona ingga terimda iteitogini, kaba, yen yousa dan terimdohob. Dangga hang, astesda sug dan docuncum dou Allah naugb yen, kaba, dan indoc momogo touwero. Doba dan docuncum dou en dara dan indoc agahugouhw an yen namcir.

⁴ (1:3)

⁵ (1:3)

⁶ Anai dan decinaga dau sug en ebiji naugb en ens meijen geicara geigouhw dou yen sug aimougtutohob, kaba, dag en emamsoho yen touwero. Doba en arautut yen se gin terimda edebeij Lona Sug Krisdus Yesus En Ecicugwen toua.

⁷ Areg graga augwan, kaba, oihirir areg se misen namcir. Anai sug Allah eigdoumesa dan indoho naugb dan desai Mer Geigouhw eisaugb Krisdus dou lusud sug nosa, kaba, yen yemehig dau dan touwero. Doba sug dan doho meh dougwo gini, era dan dos dadi Mer Geigouhw gini se geica dou lusud, hanoba len louf dan se tu gesisug iteitogin icira gin toua, kaba, yen yemamsoho dan an gin touwero. Doba yen yedag hom dara dan se indan geicara gin terimdohob. Dangga hang, dan indoc moc dougwo yen touwero. Doba dan damimiri an yen terimda toua.

⁸ Hang dan indoc gororougb yen medam dag gin, kaba, aninim dag Krisdus Yesus enin medoc gororougb maman sug nosa touohob. Dan dacgeij Allah naugb en ouma debin gin dag dan denara se misen namcir.

⁹ Sug dan indoc gororougb yen dag ginohob, kaba, dan docuncum dou Allah, dauntoba en ousa yen naugb yen meigdoc gororougwim. Dara en eic mou ouforoho dou yen, dauntoba yen yecinaga areg asesa Allah enin medoc mes. Dara yen yed aremeijouhw aingma aingma augwan daum terimda toua.

¹⁰ Anai sug yen meiju auti dag ginohob, kaba, eic goubesa dou yen naugb yen yemaimo areg gecgu toua deitero. Doba se aremer augwan gin, kaba, yen yaimo ucina gedag beim dara gobosboro anim ucucugb toua terimda. Hang se Lona Sug Krisdus En Ecicugwen, kaba, en emowun yen meijoho an aremer hom touwero. Doba yen yecabeci deseino en.

¹¹ Anai ogdoc Yesus Krisdus men goubesa gin, kaba, yen yaimo areg geigouhw atij bobdaga an lusud laugwan namcirohob. Hang emeic dag len leigdoumesa dara lagahugouhw an Allah icira meijen geicara gin toua terimda.

¹² Dan indagunerij, dara dan indamouwerij, dan douwan dens dau lusud meren geicara dou dan sug nosa meijouhw augwan asesa dou yen touahabi. Dauntoba yen yecinaga dag augwan gini, kaba, emedag sogo maga dougwo Mer Geigouhw eisaugb Krisdus gin touwero. Doba eic dag agaha becinten leng lesedougwo mougt mera gouji en men tu dara lusud gus laugwan namcirohob.

¹³ Dangga hang, len laugwan gin, kaba, lemecinaga dag lusud lemouf dan se tu gesisug emogdoc indan geicara gecgwero. Doba ogdoc sug dan desai Krisdus moro dou lusud gin dous.

¹⁴ Dara dan insir se Krisdus, kaba, sug len leiya dag dan demahau dau sug dan deigtou se tu gesisug ginero. Doba dan deic indus naugb dan dos dadi Krisdus moho deseino lusud laugwan terimda, kaba, eic leinyana dag len toua lemahau dau sug len lesai Krisdus moro dou lusud touwero. Doba len laiyan meigdocesem naugb len lebedbed en mer gini edreg dau nosa dou lusud deit.

¹⁵ Dara ligbum, kaba, dan decinaga dag len lemesai Krisdus moro dou lusud dareg len merdoc emeigouhw an danero. Doba len lebedbed dou lusud, anai len leclulan indan mera einyanohob. Dara len louwan lenara laisedim eisaugb areg dan debedbed gin toua terimda. Dangga hang, len lemesai Krisdus moro dou lusud dara len merdoc emecabeci touwero. Doba len lebedbed dara merdoc hwai dous. Anai len louwan dau sug len lebedbed dou lusud, kaba, lusud gini leigdoumesa len meroho an gin toua namcir. Dara len loudesa dau sug dan douman dau gini se tu gesisug, kaba, dag augwan gini eic dan indoc momogo dou dan toua deitahabi. Doba len gus, kaba, len lecinaga dag Allah eigdoumesa dan indoho naugb dan debehnehino dougwo Mer Geigouhw eisaugb Krisdus gin dag misenohob. Hang len lemebedbed Krisdus mer dareg merdoc emecgu an danero. Doba len lesai Krisdus moro, anai len merdoc gororougb dan toua terimdohob.

¹⁶ (1:15)

¹⁷ (1:15)

¹⁸ Doba sug lusud lesai Krisdus moro naugb sug len leic momogo dou dan. Era len lebedbed en mer, aimo dau sug len merdoc gororougb dan, kaba, augwan gini inggaida. Doba areg esloulougb, kaba, dag len lesai Krisdus moro dou lusud hom dous. Anai sug len leicara dag gini, kaba, eic dag dan indoc eigouhw an gin namcirohob.

¹⁹ Dara dan demarges dau gin touwero. Doba dan indoc agahugouhw terimda. Anai dan decinaga ogdoc sug yen yocuncum dou Allah naugb dan, dara ogdoc sug Mena Gogoufu men goubesa ousa dan toua, kaba, dag dan demeigtou se tu gesisug gin terimdero. Doba dan indina agau dau aremer gin augwan namcir. Anai Krisdus en esa Mena Gogoufu se dan indoc mesohob.

²⁰ Doba sug dan indina agau dau aremer gini, era len leic gomom dou dan toua, doba augwan gin, kaba, inggaida. Anai areg dan douwan dara dan indoc erleij icira gin, kaba, dag dan demahau dau aremer gogom hom touwero. Doba sug aremer gakebin dan iteitogini, era aremer gus augwan gen aud dan se lona daiyamo gacin, kaba, dan deic indus naugb dan demobsara dau hom touwero. Doba dan daimo areg Allah esedeb naugb dan augwan toua terimda. Dauntoba se indan geicara augwan, kaba, dan deicara naugb daigdoumesa Krisdus enin moho dous. Anai dan decinaga dau sug dan deicara dag gin, kaba, dag igdebes emeba dan se aremer hom touwero. Doba dan indoc ebtou namcir.

²¹ Anai naugb dan, kaba, sug indireseb gini dag dan deicara daimo Krisdus hom dous. Era sug len leic gomom dou dan, doba indan mera einyana eb naugb dan touohob.

²² Doba sug dan indina agau, kaba, dan dec mera einyana icira gin toua deit. Dangga dan douci ara deita?

²³ Anai dan indoc erleij naugb dan domom dous, dauntoba dan deigtou desij Krisdus. Anai gini eigouhw edreg dau areg gus augwan namcir.

²⁴ Doba naugb yen, kaba, esloulougb dag dan indireseb an yen, dauntoba dan desedougwo yen dara dan dousa yen terimdahabi. Hang iteitogin, kaba, gomom dara maireseb laic dan anim terimdaba.

²⁵ Sug dan decinaga, doba esloulougb naugb dan deigtou an yenahabi, kaba, dan dod indina debsa dag dan indina agau an yen toua. Dauntoba dan darautut yen naugb yen meigdoc mes eiloboro aud Krisdus edreg dau nosa deit. Dara dan dousa yen naugb yen meigdoc ebdebin an en edreg dau nosa. Dauntoba sug yen meigdoc ebdebin an en bedreg dag ginohob, kaba, eic dag yen yagahugouhw an en eiseisaugb terimda toua.

²⁶ Dan douwan deicara dag gini dou yen, dauntoba sug dan dedebeij yen deitohob, kaba, eic dag yen yeimiman Krisdus Yesus an dan edreg dau nosa namcir toua. Anai yen yedag hom dara en touohob.

²⁷ Doba sug dan dedebeij yen sungga, era dan demedebeij yenero, kaba, dan douwan naugb lusud ledecic dou dan dag yen yemarges dau Krisdus men ucina gin touwero. Doba yen meiju hom anim namcir naugb yen yes agadgeij terimda. Dara dan douwan naugb len ledenara dou dan dag yen yemobsara dau sug yen meigdoc ebdebin an Krisdus gin touwero. Doba yen meigdoc dag hom naugb yen yehin gunini icira gin terimda toua. Anai sug yen yeicara dag gin, kaba, yen yaimo areg Mer Geigouhw eisaugb Krisdus arougb yen an gin augwan bedeinyumohob. Anai augwan gini, kaba, esloulougb medam edreg dau areg gus augwan namcir.

²⁸ Dangga sug meijen moc leic mog erij dou yen, kaba, yen yemahau dau gin touwero. Doba yen yaiyan meigdocesem naugb yen yes agadgeij terimda. Anai sug Allah eija yen sug nosa, kaba, en emeija yen naugb yen meigdoc ebdebin an Krisdus dousero. Doba en esedeb yen naugb yen yesogwa deisa Krisdus mohotimei mohw se ucina mog erij gin touohob. Dangga sug len leiya dag yen yemahau dau lenero, doba yen yes agadgeij namcir, kaba, gini eb ainyes dou len dag se lona daiyamo gacin, kaba, Allah eic mor mor se dum smougb dou len toua. Doba yen, kaba, dag en eic maireseb menau geb huhugb dou yen dous. Anai len leiya, doba Allah enin eng eic goubesa dou yen. Hang yen yemahau dau len touwero, doba yen yeic meijus dou len terimda.

²⁹ (1:28)

³⁰ Dangga yen yemobsara dau ucina mog erij gin touwero. Doba yen yes agadgeij namcir naugb yen yaimo dan se ucina gin toua terimda. Aninim dag yen yeiya dag dan daimo ucina mog erij gini sug nosa touohob. Dara yen youman dag iteitogin, kaba, dan daimo Yesus se ucina mog erij gin touaba.

Filipi

Video Filipi 1

Ikuti Kami:

KONTAK | PARTISIPASI | DONASI