Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Utatku mita umat i Allah inta nogutun kom Pilipi, inta notobatuídon i Kristus Yesus bo inta ain nobalií itoi bo diaken kon jama'at! Aku'oi, ki Paulus bo ki Timotius inta mogogaid kon oaíidan i Kristus Yesus,
2 mopo'igum makow kom baí ki Allah, ki Amaí naton bo ki Tuhan Yesus Kristus umuran mobogoi im barakat bo kobiagan motompia ko'i monimu.
3 Pomuḷoi in aku'oi mokotorop ko'i monimu aku'oi mopoyaput in sukur ko'i Allah.
4 Bo pomuḷoi doman makow sambayanganku i mo'ikow komintan takin sanang ing gina.
5 Aku'oi mopoyaput in sukur ko'i Allah sin nongkon pinomangkoianmai nodapot kon tana'a makow, mo'ikow umuran nobantung ko'inakoí nopota'a-ta'au makow in Habar Mopia inta nongkon i Allah.
6 Ki Allahbií in nomangkoi kon oaíidan mopia tatua ko'inimu, bo moyakinbií in aku'oi, kon tantu-Nyabií ingguputan in oaíidan-Nya tatua modapot kon singgai ki Kristus Yesus mamangoidon bui.
7 Totu'ubií kon diaíbií mo'itaḷaí in raianku tana'a ko'i monimu, sim mo'ikow umuran kong gina-ginaku makow, lantaran mo'ikow ain noko'ulií domandon kon totabi bo barakat i Allah inta inogoi ko'inakoí; ko wakutu in aku'oi kom bonupa im ponjara tana'a makow ande kowakutu ing kon ḷuaidon mobela kong kabanaran in Habar Mopia tatua.
8 Kinota'auanbií i Allah kon nongkon i Kristusbií tontanií in tanob bo tabiku ko'i monimu.
9 Na'abií in sambayangku ko'i monimu: Igumon makow doaí, mo'ikow totu-totu'udon motabi ko'i Allah bo kon tumpaḷa intau bo umuran doman modugang im pongotahuan monimu kon soaáḷ inta mopia bo pororai inta mobijaksana.
10 Sahingga ing kota'auandon monimu im momilií kon onu inta totok im mopia, bo kobobiagmu in diaídon singkuleon ande poponapudan in onuka kon singgai ki Kristus mo'iangoidon bui.
11 Mo'ikow mobiag takin oaíid mita inta totu-totu'u mopia, oaíid inta tongaíbií kota'auan aidan i Yesus Kristus tontanií, sahingga ing ki Allah duiíon bo dayowon.
12 Ibogonku kota'auandon monimu komintan, kon soaáḷ mita inta ain nobalií ko'inakoí tuabií in nokopopisií sahingga in nobayongdon nokidongog bo nopirisaya kon Habar Mopia tatua.
13 Tuamai bayongan intau kon istana bo intau mita ibanea inta kong kotaí tana'a nonota'audon kon aku'oi pinobonu kom ponjara sin dinumudui ko'i Kristus.
14 Pinomonjara'an ko'inakoí nobaliídon dodoyonan sahingga nobayong intau ing Keresten kong kotaí tana'a nobalií nopirisaya totok ko'i Tuhan, daí diaídon mo'odo-ondok mosia mopota'au im Pirman i Allah.
15 Totu'ubií doman kon oyuíonbií in tongonumai kon sigad monia tua inta mopota'au in habar soaáḷ ki Kristus lantaran mo'intoi bo mo'ibog mobobayowan, ta'e oyuíonbií doman in totu-totu'u motulid ing gina nopoyaput in habar soaáḷ ki Kristus tua.
16 Intau mita tatua nogaid kon tua sim mosia motabi ko'i Allah bo ko'inakoí, sing kinota'auandon monia kong ki Allahbií in nokiaid intua ko'inakoí sim moponyata kon totu'ubií in Habar Mopia tatua.
17 Ta'e oyuíon doman intau ibanea in nopota'au in habar soaáḷ ki Kristus takin makusud inta diaí mopia, mosia nopota'au untuk kopontingan tontanií. Sin irai monia kon oaíid monia tatua mokodugang kon yoyigaku kom bonu im ponjara.
18 Ta'e diaíbií nongonu! Naíondakabií in cara monia mopota'au in Habar Mopia soaáḷ ki Kristus; makusud mopia ande diaí, tatap habar soaáḷ ki Kristus pinota'aubií doman, daí mosanangbií ing ginaku.
19 Sing kinota'auankubií kom barakat in sambayang mita monimu takin totuḷung doman in Roho i Yesus Kristus, daí mobebasbií in aku'oi.
20 Inta totok ing ko'ibogku bo haraponku makow im baí diaí moko'imontanmai mogagal in aku'oi i mopobayak oaíidanku. Ta'e haraponku baí pomuḷoi makow, torutama totok tana'a makow mobaranidon totok in aku'oi sahingga bayongan onu inta ko'inakoí -- mobiag andeka matoi -- ki Kristus im pomulia'an.
21 Sin aka ko'inakoí, tujuan kobiaganku tongaíbií ki Kristus! Aka matoi yo ka'untunganbií intua.
22 Ta'e aka aku'oi mobiagpa kon dunia na'a, daí mota'aupa in aku'oi mogaid kon oaíidan inta baraguna, daí diaídon kota'auanku mongo onda im piliíonku.
23 Doyowa norupa na'a im mogogugutan kom bonu ing ginaku. Mo'ibogdon aku'oi monaḷaímai kon dunia na'a bo mayak mogutun takin i Kristus, sin tuabií inta paling mopia;
24 ta'e lantaran kopontingan monimu, daí mopiabií doman aka kon duniapa na'a in aku'oi.
25 Moyakinbií in aku'oi kon soaáḷ tatua. Tuamai kota'auankubií kon umuranpabií ing kita moyotakin, simbaí mota'aupa motuḷung moginropot bo modugangdon sanang ginamu kon onu inta aim pinirisayamu ko'i Tuhan.
26 Sahingga aka aku'oi mobuidon mangoi ko'i monimu, daí modugangdon ḷoben in dodoyonan porasaan pia ing gina monimu tua ko'inakoí.
27 Daí tuamai na'a im po'igumonku, kobiagbií im mo'ikow podudui onu inta pino'igum kom bonu in Habar Mopia i Kristus, simbaí aka mo'iangoi in aku'oi yo paling tidak kodongogankudon, kom mo'ikow in umuranbií notobatuí kong gina bo raian im moramiji mogaid kon onu inta pinirisaya podudui in Habar Mopia nongkon i Allah.
28 Bo topilikmai dikabií mo'ondok kon saturumu mita; sin aka diaí mo'ondok im mo'ikow, yo tua im mopo'ontong kom mosia in taḷowonbií bo mo'ikow im mo'untung, sing ki Allahbií tontanií im mobogoi intua ko'i monimu.
29 Sim mo'ikow inogoian bidon i Allah in totabi inta de'emanbií tongaí mopirisaya ko'i Kristus, ta'e poḷatbií doman motanggung kon roriga-Nya.
30 Tana'a, mo'ikow noyotakinku nogaid kon oaíidan inta notongkai; tuata oaíidan inta pernahdon inontong monimu iramijiku totok kolipod, bo inta tantuíku doman ramijion dapot kon tana'a makow, naí inta dinongogdon monimu masa in tana'a.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA