Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Selapuq dengan-dengan saq tehususang bagi Allah saq araq lẽq Pilipi, dait saq sampun lẽq dalem Deside Isa Almasih. Dait semeton-semeton pengawas dait pelayan jemaah! Tiang, Paulus, kance Timotius, hambe-hambe Deside Isa Almasih, beharep semoge

² rahmat dait sejahtere lẽman Allah, Bapante, dait Junjungan Saq Mulie Deside Isa Almasih araq bareng kance side pade.

³ Tiang ngucap syukur tipaq Allah, sebilang tiang inget lẽq side pade.

⁴ Dait sebilang tiang do'eang side selapuq, Tiang bedo'e siq sukecite.

⁵ Tiang besyukur tipaq Allah sẽngaq side pade sampun nulung tiang nyampẽang Kabar Solah lẽman Allah mulai lẽman jelo penembẽq jangke mangkin niki.

⁶ Sẽngaq lẽq dalem atẽn tiang, tiang yakin bahwe Allah, saq sampun mulai karye saq solah lẽq dalem diriqde gen nutuqang ẽndah jangke kerauhan Deside Isa Almasih.

⁷ Mule patut tiang bedowẽ perasaan maraq nike lẽq side pade, sẽngaq selapuqde tetep araq lẽq angen tiang. Dait side pade ẽndah sampun bareng kance tiang nerimaq rahmat saq sampun teicanin siq Allah tipaq tiang sewaktu tiang masih lẽq bui dait sewaktu tiang bẽle dait pertahenang Kabar Solah nike.

⁸ Sẽngaq Allah nike saksi tiang bahwe tiang tetu-tetu kangen lẽq side siq rase kasih lẽman Deside Isa Almasih.

⁹ Niki do'e tiang umaq side pade: Semoge kasih side pade sayan luwẽq lẽq dalem penenaoq saq kenaq dait lẽq dalem selapuq pengertian.

¹⁰ Sehingge side pade tao pilẽq napi saq paling solah. Siq care nike, jangke kerauhan Almasih side pade jari suci dait ndẽq bedowẽ cacat cele,

¹¹ penoq siq kebajikan, saq cume bau tehasilang siq Deside Isa Almasih, jari kemuliean dait pujian bagi Allah.

¹² Tiang mẽlẽ side pade nenaoq bahwe hal-hal saq sampun telaksane lẽq tiang, malahan jari penyebap luwẽqan malik dengan dengah dait percaye lẽq Kabar Solah nike.

¹³ Akibatne, selapuq pengawal istane dait selapuq dengan lain nenaoq bahwe tiang tebui lantaran tiang jari pelayan Almasih.

¹⁴ Dait keadaan tiang saq tebui niki sampun miaq luwẽq semeton-semeton seiman lẽq kote niki jari sayan yakin lẽq dalem Tuhan, sehingge ie pade sayan bani, ndẽqne takut-takut malik ngabarang Manik Allah.

¹⁵ Mule araq pire dengan lẽq antare ie pade saq beriteang Almasih lantaran talon atẽ dait mẽlẽ betungkasan, laguq saq lainne beriteang Almasih sẽngaq bedowẽ maksut saq solah.

¹⁶ Ie pade saq beriteang siq maksut saq solah ngelaksaneang hal nike lantaran kasih, sẽngaq ie pade nenaoq bahwe tiang araq lẽq dalem bui jari bẽle Kabar Solah lẽman Allah nike.

¹⁷ Laguq dengan saq lain beriteang Almasih siq maksut saq ndẽq ihlas; ie pade beriteang jari kepentinganne mẽsaq. Siq care nike ie pade beharep bau miaq tiang jari sayan susah lẽq dalem bui.

¹⁸ Laguq ndẽqne kembẽ-kembẽ! Sẽngaq napi juaq maksutne, jujur atao palsu, saq penting Almasih teberiteang ẽndah; tiang jari seneng. Dait tiang gen tetep merase maraq nike,

¹⁹ sẽngaq tiang nenaoq bahwe siq do'e-do'ende dait siq bantuan lẽman Roh Deside Isa Almasih, tiang gen tebẽbasang.

²⁰ Sẽngaq saq tiang melẽtang gati dait saq tiang harepang nike, adẽq lẽq dalem selapuq hal tiang ndẽq teperilaq. Sebalikne tiang beharep adẽq sebilang waktu, terutame gati mangkin, tiang bani sehingge siq selapuq awak dait roh tiang -- timaq tiang idup atao matẽ -- Almasih temulieang.

²¹ Sẽngaq bagi tiang idup nike umaq Almasih dait matẽ nike keuntungan.

²² Laguq lamun tiang idup lẽq dunie niki, tiang harus begawẽan dait beramal. Jari mbẽ saq harus tiang pilẽq, mindah tiang.

²³ Tiang teantuq lẽman due pihak. Tiang melẽt gati bilin dunie niki, terus lalo dait araq bareng kance Almasih, sẽngaq nike jaoq solahan;

²⁴ laguq, jari kepentingan side, solahan lamun tiang masih ndot lẽq dunie.

²⁵ Tiang yakin lẽq hal nike. Keranaq nike tiang nenaoq tiang gen tetep ndot bareng kance side pade, adẽq side pade sayan maju dait besukecite lẽq dalem iman.

²⁶ Keranaq nike, laun lamun tiang tulak ojok side, kebanggean side pade lẽq dalem Deside Isa Almasih gen sayan luwẽqan malik lantaran tiang.

²⁷ Cume, padeang idupde kance Kabar Solah mengenai Almasih, adẽq lamun tiang dateng, tiang bau serioq, atao lamun tiang ndẽq dateng, tiang bau dengah bahwe side pade tetep araq lẽq dalem sopoq roh dait siq sopoq angen bejuang bareng-bareng lẽq dalem iman saq asalne lẽman Kabar Solah lẽman Allah nike.

²⁸ Side pade harus tetep bani: Ndaq side pade takut lẽq musuh-musuhde. Bagi ie pade, selapuqne nike tande kebinasean, laguq umaq side pade nike tande keselametan saq asalne lẽman Allah.

²⁹ Sẽngaq Allah sampun ngicanin paice tipaq side pade ndẽqne cume jari percaye lẽq Almasih, laguq jari menderite ẽndah bagi Almasih.

³⁰ Mangkin side pade milu ẽndah kance tiang dalem perjuangan saq pade maraq saq laẽq side serioq lẽq tiang, dait saq mangkin side dengah mengenai tiang.

Filipi

Video Filipi 1

Ikuti Kami:

KONTAK | PARTISIPASI | DONASI