Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O anak oloh! Kilau oloh ain Kristus, keleh mamenda oloh bakas keton karana jete je patut ilalus.
2 "Hormat bapam tuntang indum" jete parentah je solake bara Hatalla hapan janji,
3 iete: "Mangat ikau sanang tuntang panjang umurm hong hunjun petak".
4 Pahari handiai je manjadi bapa! Ela mawi kare anak keton kalote ampie sampai ewen balait. Tapi keleh keton mampahai ewen hapan atoran tuntang ajar bara Tuhan.
5 Pahari handiai je manjadi jipen! Keleh manumon parentah tuan keton je hong kalunen toh. Lalus jete hayak angat hormat tuntang panumon hayak hapan kahias kilau jaka keton malalus jete akan Kristus kabuat.
6 Ela keton malaluse baya metoh keton iator, baya handak mandino tara bara olon. Tapi keleh keton malaluse kilau rewar Kristus je manumon kahandak Hatalla hapan salepah atei.
7 Gawi je ilalus keton kilau rewar te keleh keton malaluse dengan kahanjak atei kilau jaka keton manyang Tuhan, tapi dia akan olon.
8 Keleh mingat, genep oloh, aloh rewar atawa oloh mardeka, kareh mandino baleh bara Tuhan tagal kare taloh bahalap je iawie.
9 Pahari handiai je manjadi tuan! Keleh keton mawie kalote kea dengan kare rewar keton. Ela hindai mahapan kare ancaman. Ingat, keton tuntang kare rewar te, sama-sama mamenda ije tuan, iete Tuhan je huang sorga. Ie dia mintih ampin olon.
10 Kalepahe haliai, keleh keton manjadi abas hapan kaabas je dinon keton bara kuasan Tuhan, awi keton ije Dengae.
11 Keleh mahapan salepah pakakas parang je inenga Hatalla akan keton, mangat keton olih tahan malawan kare tirok papa ain setan.
12 Basa itah dia kalahi malawan olon, tapi malawan kaabas roh papa je manguasa langit.
13 Tagal te, toh keleh mahapan salepah pakakas parang bara Hatalla, mangat hong andau je papa keton olih malawan kare musoh je manyarang. Tuntang mangat limbah keton hakalahi sampai kalepahe keton magon mamot menteng.
14 Keleh keton bajaga tuntang batawat. Keleh mangkepan kaketep dengan Hatalla kilau peteng kahang, tuntang kabujur atei kilau baju sanaman.
15 Keleh kahias mangabar Barita Bahalap te je mimbit kasanang manjadi sapatun keton.
16 Sining katika keleh mahapan kapercaya dengan Tuhan kilau talawang; hapan kapercaya jete keton tau mambelep kakare isin panah apui bara taloh papa.
17 Keleh manduan salamat kilau tanggoi waja, tuntang auh Hatalla kilau padang bara Roh Hatalla.
18 Keleh malalus taloh handiai te sambil balakudoa mangat balaku dohop dengan Hatalla. Hong genep katika je buah, keleh balakudoa mangat Roh Hatalla mamimpin keton. Keleh keton harajur batawat tuntang ela manyarah. Keleh balakudoa harajur akan hapus ungkup Hatalla.
19 Tuntang keleh balakudoa akangku kea, mangat hong katika aku hakotak, Hatalla manenga akangku kare auh je buah. Tuntang mangat aku tau menteng ureh pangkemeku mansanan rahasia Barita Bahalap te.
20 Tagal Barita Bahalap te kea, aku manjadi ije biti sarohan tuntang metoh toh aton huang penjara. Keleh balakudoa mangat aku bahanyi hakotak tahiu Barita Bahalap te, kilau je tumon kapatute aku hakotak.
21 Tikhikus, paharin itah tuntang pelayan itah je baketep huang gawin Tuhan, kareh mansanan akan keton taloh handiai tahiu aku, mangat keton katawan tahiu keadaan ayungku tuntang gawingku.
22 Jete sababe aku manyoho ie manalih keton uka mansanan keadaan ikei akan keton handiai, hapan mampahai atei keton.
23 Keleh Hatalla Bapa, tuntang Tuhan Yesus Kristus mampahinje hapus ungkup uka bulat tuntang hasinta hayak tetep percaya dengan Kristus.
24 Keleh Hatalla mamberkat pahari handiai je sinta Tuhan itah Yesus Kristus hapan sinta je dia tau belep. Hormat ikei, Paulus
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA