Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O kam anak-anak! Ikutkenlah ajar orang tuandu, sue ras peraten Tuhan sabap patut idalankenndu.
2 "Pehagalah nande-bapandu," eme pedah si pemena ibereken Dibata radu ras PadanNa.
3 Eme, "gelah mejuah-juah kam, janah ndekah kam nggeluh i doni enda."
4 Kam orang tua! Ula pesega-sega anakndu si erbahanca ia merawa. Tapi i bas mpebelin-belin ia ajari dingen tegu-tegulah ia bagi si ngena ate Tuhan.
5 O kam budak-budak, patuhlah man tuanndu alu mbiar dingen gentar; ikutkenlah alu bulat ukurndu, tempa-tempa idahikenndu e guna Kristus.
6 Bagelah ibahanndu labo saja tupung ia i je tempa-tempa kam ndarami pujin i bas manusia nari saja; tapi dalankenlah alu tutus kai si ngena ate Dibata, selaku budak-budak Kristus.
7 Dahilah dahinndu alu meriah ukur. Anggaplah kam erdahin guna Tuhan labo guna manusia.
8 Ingetlah! Kerina manusia, subuk budak-budak ntah si la budak-budak, ngaloken balasen i bas Tuhan nari erkiteken kerina dahinna si mehuli.
9 O kam tuan-tuan! Kam pe bage ka lah perbahanenndu nandangi budak-budakndu. Ulanai ia ipesega-segandu. Ingetlah! Subuk kam, bage pe budak-budakndu sada kap Tuanndu i Surga. Janah labo erndobahen kam i lebe-LebeNa.
10 Kedungenna, megegehlah kam erdandanken persadanndu ras Tuhan dingen erdandanken KuasaNa si mbelin.
11 Pakekenlah kerina senjata si ibereken Dibata gelah ngasup kam tedis ngelawan akal Iblis si jahat e.
12 Sabap labo manusia si man lawanenta, tapi kuasa pemerentah ras penguasa si la teridah, kuasa doni si gelap enda, ras kesah si jahat i bas ingan si meganjang.
13 Emaka genduari pakekenlah kerina senjata si ibereken Dibata, gelah adi reh pagi paksa si jahat e, ngasup kam ngelawan serangen-serangen musuh, janah kenca erperang seh ku kedungenna, tetap denga kam tedis alu megegeh.
14 Emaka tedislah kam! Pakekenlah ketuhu-tuhun jadi bentingndu; pakekenlah kinibujuren jadi baju besi guna erperang.
15 Janah pakekenlah keriahen ukurndu meritaken Berita Si Mehuli kerna kemalemen ate jadi sepatundu.
16 Bahanlah kinitekenndu jadi ampang-ampangndu katawari pe. Alu e banci inimpetindu kerina anak panah si gara si ipanahken si Jahat.
17 Alokenlah keterkelinen jadi topi waja man bandu, janah kata Dibata jadi pedang si ibereken Kesah Dibata man bandu.
18 Bahanlah si e kerina alu ertoto, mindo penampat man Dibata. Ertotolah i bas bukuna alu kuasa Kesah. Erdandanken si e erjaga-jaga dingen tutuslah kam i bas ertoto. Ertotolah rusur guna kerina anak-anak Dibata.
19 Janah ertoto pe man gunangku, gelah ibereken Dibata man bangku kata-kata si payo adi aku ngerana, dingen gelah pang aku ngerana dingen mpetangkas rahasia Berita Si Mehuli e.
20 Sabap guna Berita Si Mehuli emaka aku jadi utusen Dibata, janah ipenjaraken pe. Ertotolah kerna aku, gelah pang aku ngerana kerna Berita Si Mehuli e, bagi arusna aku ngerana.
21 Gelah ietehndu kuga percibalku, Tikikus nurikenca man bandu. Seninanta Tikikus si ikelengi enda sekalak serayan si tutus i bas dahin Tuhan.
22 Kusuruh ia ndahi kam gelah iturikenna man bandu kerna percibal kami kerina, janah gelah alu bage reh tetapna ukurndu.
23 Dibata Bapa ras Tuhanta Jesus Kristus mereken kemalemen ate, kekelengen ras kiniteken man bandu gelah.
24 Lias ate Dibata rembak ras kerina kalak si erkeleng ate man Tuhanta Jesus Kristus alu keleng ate si la erkeri-kerin.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA