Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kanak-kanak saq jari pengiring Almasih, harus taat lẽq dengan toaqde sẽngaq hal nike saq patut telaksaneang.

² "Pade hormatin amaqde dait inaqde". Nike prẽntah Allah saq penembẽq saq berisi janji,

³ "Adẽq side bahagie dait bẽlo umurde lẽq gumi."

⁴ Semeton senamian saq jari amaq! Ndaq perlakuang bije-bijende semẽlẽ angende sehingge ie pade jari sili. Sebalikne, didik ie pade lẽq dalem pengajahan dait nasẽhat Tuhan.

⁵ Semeton senamian saq jari hambe! Pade turut prẽntah tuande saq lẽq dunie niki. Laksaneang hal nike siq rase hormat dait patuh serte pacu-pacu, pade maraq side pade laksaneang tipaq Almasih.

⁶ Ndaq side bekelakuan maraq nike cume lẽq waktu side teawasin, cume jari teajum siq manusie. Laguq side pade harus laksaneang sebagẽ hambe Almasih saq kenyeke turut pekayunan Allah sepenoq angen.

⁷ Pegawẽan saq side pade laksaneang sebagẽ hambe nike, harus side pade laksaneang siq atẽ saq gembire maraq Tuhan saq side pade layanin, dait ndẽqne manusie.

⁸ Pade inget bahwe sebilang dengan, timaq hambe atao dengan merdẽke, lamun ie ngelaksaneang hal-hal saq solah, ie gen nerimaq balesan lẽman Tuhan.

⁹ Semeton senamian saq jari tuan! Side pade harus bekelakuan maraq nike ẽndah lẽq hambe-hambende. Ndaq malik kadu anceman-anceman. Inget bahwe side pade dait hambe-hambende nike pade-pade bedowẽ sopoq Tuan, nike Tuhan saq lẽq sorge. Ie nẽnten bẽde-bẽdeang dengan.

¹⁰ Ahirne, side harus jari kuat siq kekuatan saq side pade mauq lẽman kuase Tuhan, sẽngaq side pade araq lẽq dalem Tuhan.

¹¹ Pade kadu selapuq perlengkapan perang saq teicanin siq Allah, adẽq side pade bau tahen ngelawan siasat-siasat Belis saq licik nike.

¹² Sẽngaq ite bejuang ndẽqne ngelawan manusie, laguq ngelawan selapuq kekuatan sẽtan-sẽtan saq nguasein jaman saq jahat niki. Ite ngelawan roh-roh jahat saq araq lẽq awang-awang.

¹³ Keranaq nike, mangkin, pade kadu selapuq perlengkapan perang Allah, adẽq lẽq jelo saq jahat, side pade sanggup ngelawan serangan-serangan musuh. Dait adẽq sesampun side pade bejuang jangke tutuq, side pade masih gagah perkase.

¹⁴ Side pade harus tetep bejage-jage. Pade kadu kesetieande lẽq Allah jari sabuk, dait ketulusan jari kelambi besinde.

¹⁵ Kerẽdeande jari beriteang Kabar Solah damẽ sejahtere jari sepatunde.

¹⁶ Sebilang waktu kadu percayende tipaq Tuhan jari senjate penangkis, siq care nike side pade bau kalahang selapuq anak panaq berapi lẽman si jahat.

¹⁷ Pade bait keselametan jari songkoq waje, dait Manik Allah jari klẽwang lẽman Roh Allah.

¹⁸ Laksaneang selapuqne nike sambil bedo'e jari tunas pertulungan lẽman Allah. Lẽq sebilang kesempatan, pade bedo'e lẽq dalem Roh dait side pade harus tetep bejage-jage lẽq dalem do'ende nike siq petunasan saq ndẽq araq tutuqne umaq selapuq dengan-dengan saq tehususang bagi Allah.

¹⁹ Dait do'eang tiang ẽndah, adẽq lẽq waktu tiang ngeraos, Allah ngicanin tiang ucapan-ucapan saq tepat. Dait adẽq tiang bani jari nyampẽang rahasie Kabar Solah nike.

²⁰ Lantaran Kabar Solah lẽman Allah nike, tiang jari sopoq utusan, dait mangkin araq lẽq dalem bui. Pade bedo'e adẽq tiang bani ngeraos mengenai Kabar Solah nike, berembẽ tiang harus ngeraos.

²¹ Tikikus, semetonte dait pelayan saq setie dalem karye Tuhan, gen badaq side selapuq hal mengenai tiang, adẽq side pade nenaoq keadaan tiang dait pegawẽan tiang.

²² Keranaq nike tiang ngutus ie tipaq side, jari badaq side selapuq keadaan tiang pade, adẽq ie belẽqang angende.

²³ Damẽ sejahtere dait kasih dait iman lẽman Allah, Bapa dait lẽman Junjungan Saq Mulie Deside Isa Almasih araq bareng kance semeton senamian.

²⁴ Rahmat Allah araq bareng kance selapuq dengan saq ngasihin Junjungante Saq Mulie Deside Isa Almasih siq kasih saq kekel.

Efesus

Video Efesus 6

Ikuti Kami:

KONTAK | PARTISIPASI | DONASI