Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ngana-ngana, komiu kana matundu nte tina tuamamiu sabana haitumo pokainggu masipato ka topomparasaya i Pue.

² Bilamo tina tuamamiu ala komiu matuvu mabelo bo mandoe umurumiu ri dunia. Lako ri Sapulu Parenta nu Alatala, haitumo parenta pamulana anu nitambai ante pojanji nabelo.

³ (6:2)

⁴ Komiu anu najadi tuama-tuama nu ngana, nee rapoviamiu anu mompakadua rara anamiu. Tapi piaramo ira. Patuduki bo popatora ira ante pepatuduki lako nte i Pue.

⁵ Sampesuvu-sampesuvu anu najadi batua, turusimo parenta nu tuamiu anu naria ri dunia hitu. Bilamo ira bo pekoumo nte ira ante mpuu-mpuu raramiu, nasimbayu mpo komiu nekou nte i Kristus mboto.

⁶ Nee aga mokarajaa mabelo tempo komiu rakita nu tuamiu ala komiu ratoiya nu manusia. Tapi pokarajaamo ante mpuu-mpuu raramiu najadi batua i Kristus anu nangoseaka dota nu Alatala.

⁷ Pokarajaamo ante damba nu rara. Rekemo komiu nokarajaa ka i Pue, ledo aga ka manusia.

⁸ Pariaramo! Isema-sema novia nabelo, nau ia batua atau ledo batua, kana rakavana balasina nabelo lako nte i Pue.

⁹ Bo komiu anu najadi tua atau madika, komiu muni kana mokainggu mabelo nte batuamiu. Nee momparangga ira, sabana nisanimiu mboto Tupumiu bo Tupura aga saito. Iamo naria ri suruga bo Ia ledo nompelenje.

¹⁰ Kaupuna, komiu kana maroso ante kuasa nitarimamiu lako ri kuasa nTupu anu nabaraka, apa komiu nosangu rara ante Ia.

¹¹ Pakemo pura-pura pareva posieva nidekei nu Alatala ka komiu, ala komiu mompakule mombatidamaka mpengaya-ngaya peeva noakala lako ri Magau nu Seta.

¹² Apa kita ledo nangeva manusia. Kita nangeva kuasa-kuasa bo pomarenta-pomarenta nadaa anu ledo nikita. Kita nangeva *malaeka-malaeka nadaa anu nakuasa ri dunia hitu. Kita nangeva mpengaya-ngaya *seta bo anu daa ri laerava.

¹³ Sabana haitu, pakemo pura-pura pareva posieva nidekei nu Alatala ala rapakulemiu mombatidamaka peeva nu balimiu ri tempo posieva ntamo, sampe komiu da bate-batena meangga maroso maupu posieva haitu.

¹⁴ Jadi, komiu kana masadia mombatidamaka peeva balimiu! Komiu kana matutu mangoseaka pepatuduki nakana. Haitumo sulepemiu. Komiu kana mokainggu manoa. Haitumo *baju asemiu anu nombalenduti karomiu.

¹⁵ Komiu kana masadia manggeni Kareba Belo anu nompoposinggabelo manusia ante Alatala. Haitumo sapatumiu anu nompakaroso peanggamiu.

¹⁶ Komiu kana maroo momparasaya Alatala riara mpengaya-ngaya. Haitumo kaliavomiu ratipalemiu ala rapakulemiu mantenggu bo mompepaya mpengaya-ngaya mata pana apu lako nte Magau Seta. Ane maroo pomparasayamiu, rapakulemiu mombadagi pesori.

¹⁷ Komiu kana maroo manjarumaka Alatala mompakasalama komiu. Haitumo songgo bajamiu anu mombalenduti balenggamiu. Bo komiu kana mompake Tesa nu Alatala. Haitumo guma nidekei Nosa GasaNa ka komiu.

¹⁸ Komiu kana masaro mosambaya bo merapi tulungi nte Alatala. Nuapa-nuapa rapoviamiu, posambayamo, nangoseaka pekeniaka Nosa Gasa nu Alatala. Komiu kana mainga bo nee maupu raramiu mosambaya. Nggani-nggani mosambaya, sambayani pura-pura todea nu Alatala.

¹⁹ Bo posambayaka muni yaku ala tempo yaku motesa, Alatala mombadekei ka yaku tesa-tesa masipato, bo nau bara nuapa majadi, yaku mabia mompatolele Kareba Belo anu ledo nisani ntona nggaulu.

²⁰ Yaku niposumba i Yesus Kristus mompatolele Kareba Belo. Bo sii-sii yaku nitarunggu sabana nompatolele Kareba haitu. Jadi, posambayakamo yaku ala mabia yaku mompatolele Kareba Belo, sabana haitumo pokarajaa nidekei nu Alatala ka yaku.

²¹ Dotaku ala rasanimiu berimba katuvuku ri sii. Jadi haitu sampe nituduku i Tikhikus tou nte komiu. Ia sampesuvuta nipotoveku anu natutu nantulungi pokarajaa nTupu.

²² Ia nituduku tou nte komiu bo manguli anu najadi nte kami ri sii, ala raramiu rapakavoe.

²³ Kuperapi Tuamata Alatala bo i Pue Yesus Kristus mompakatinonto raramiu, bo mompakaroso pepotove bo pomparasayamiu pura-pura.

²⁴ Kuperapi Alatala bate-batena nabelo nte pura-pura tona anu ledo naupu-upu nompotove Tuputa Yesus Kristus. Amin. Tabe lako nte yaku Paulus

Efesus

Video Efesus 6

Ikuti Kami:

KONTAK | PARTISIPASI | DONASI