Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 He ya'ami iraono! Me no solo'õ Keriso ami, ba lõ tola lõ mi'o'õ li ndra satuami, me da'õ zinangea mifalua.
2 "Fosumange namau awõ ninau" da'õ zi fõfõna goroisa nibe'e Lowalangi si fao amabu'ula li:
3 "Ena'õ ohauhau dõdõu ba anau nosou ba gulidanõ".
4 Ba ya'ami, ira ama! Bõi mi'andrõ wõnu ndraonomi. Tobali, mi'ebua'õ ira ba goigoi si sõkhi ba ba wamahaõ Zo'aya.
5 He ya'ami sawuyu! Mi'o'õ li zokhõ ya'ami ba gulidanõ andre. Milau da'õ si fao famosumange ba folo'õ, awõ wangodõdõgõ, hulõ na khõ Keriso milau.
6 Bõi ha na lafaigifaigi ami milau zi manõ, ena'õ lasuno ami niha. Ena'õ na si mane enoni Keriso ami, solo'õ somasi Lowalangi moroi ba dõdõ.
7 Halõw̃õ nifaluami ba wa'a'sawuyu andrõ, ba ya mi'ohalõw̃õgõigõ ia si fao fa'omuso dõdõ, hulõ na khõ So'aya, ba tenga ba niha.
8 Mitõngõni wa dozi niha, he sawuyu, ba he si tenga sawuyu, itema zulõ dania moroi khõ Zo'aya, ba ngawalõ zi sõkhi si no ifalua.
9 Ba ya'ami sokhõ sawuyu! Ena'õ si manõ gõi ami ba zawuyumi. Mibõhõli wametameta'u ya'ira. Mitõngõni, wa he ya'ami ba he sawuyumi andrõ, faoma ha sambua zokhõ ya'ami, ya'ia Zo'aya ba zorugo. Lõ khõ-Nia famaigi bawa niha.
10 Afuriatania, ba mi'abe'e'õ ami ba wa'abõlõ si no misõndra khõ Zo'aya, bõrõ me no ha sambua ami khõ-Nia.
11 Mi'oguna'õ fefu wangõna ba wasuwõta andrõ, si no Ibe'e Lowalangi khõmi, ena'õ abe'e ami ba wolaw̃a fa'onekhe Gafõkha.
12 Bõrõ me fasõndratada tenga ba wolaw̃a niha, no ba wolaw̃a ngawalõ wa'abõlõ zatana sangokhõgõ inõtõ si lõ sõkhisõkhi andre. Talaw̃a wa'abõlõ geheha si lõ sõkhisõkhi, samatõrõ talu mbanua si yaw̃a.
13 Bõrõ da'õ, iada'e, mi'oguna'õ fefu wangõna ba wasuwõta andrõ si otarai Lowalangi, ena'õ ba ginõtõ si lõ sõkhisõkhi andrõ tola milaw̃a wa'abõlõ nudu. Ba ena'õ na no awai wasõndratami irugi gafuriata, sabõlõ nasa ami.
14 Ba mifa'anõ ami. Mibali'õ bõbõlõwimi wa lõ farõi khõ Lowalangi, ba baru si'õli khõmi wa'atulõ dõdõ.
15 Badagahemi ya'ia wama'anõmi ya'ami ba wangombakha Turia Somuso Dõdõ, solohe fa'ohahau dõdõ.
16 Ero inõtõ mi'oguna'õ wa'afaduhu dõdõmi andrõ khõ Zo'aya tobali fangõna ba watelesa; fao famati tola mibunu nono wana zatana andrõ so'alitõ.
17 Takula si'õli khõmi wangorifi, ba fõda Eheha Lowalangi khõmi daroma li-Nia.
18 Milau da'õ fefu si fao fangandrõ, ba wangandrõ fanolo soroi Lowalangi. Ero inõtõ mi'angandrõ molo'õ fondrõnia'õ Geheha Lowalangi ya'ami. Bõi mamalõ mi'amanõ, awõ wa lõ mitehe mitou'õ ami ba danga nudu. Mi'angandrõ salahi mbanua Lowalangi fefu.
19 Ba mi'angandrõ gõi salahigu, ena'õ ba ginõtõ fahuhuo ndra'o, Ibe'e khõgu Lowalangi wehede si fenahõi. Ba ena'õ lõ aiw̃õ ndra'o ba wangombakha si tobini andrõ moroi ba Duria Somuso Dõdõ.
20 Bõrõ Duria Somuso Dõdõ andrõ wa no tobali tengetenge ndra'o, ba iada'e no so bakha ba gurunga. Mi'angandrõ ena'õ lõ aiw̃õ ndra'o fahuhuo, ba wangombakha Turia Somuso Dõdõ andrõ, si mane si lõ tola lõ uw̃a'õ.
21 Tikhiko andrõ, talifusõda ba enoni si lõ farõi ba halõw̃õ Zo'aya, i'ombakha'õ khõmi dania ngawalõ hadia ia zanandrõsa khõgu, ena'õ aboto ba dõdõmi hewisa ndra'odo awõ halõw̃õgu.
22 Da'õ mbõrõ wa ufatenge ia khõmi, ba wangombakha ya'aga khõmi fefu, ena'õ terara dõdõmi.
23 Ya Lowalangi Ama, ba So'aya ya'ita, Yesu Keriso zame'e fa'abõlõ khõmi ena'õ ha sambua ami ba faoma mi'omasi'õ nawõmi, awõ wa lõ farõi ami ba wamati ba khõ Keriso.
24 Ya'Ifahowu'õ Lowalangi ami fefu sangomasi'õ So'aya ya'ita Yesu Keriso, fa'omasi si lõ tola taya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA