Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ee, ngini 'o ngowa-ngowaka, salingou niakisingounu nia balusika, sababu ngini winimote-moteke ma Kristus, so salingou koge'ena.

² "Niakihoromati nia dea de nia 'esa," ge'enau ma Jo'oungu ma Dutu 'awi besesongo ma di-disiraka gee de 'awi jaji, wongose 'ato:

³ "La ngini niosanangi de nia 'umuru 'ikurutu 'o duniaka."

⁴ Ee, ngini 'o dea-dea, 'uwa niodiai 'ania ngowa-ngowaka yakito'otasa. Ma 'ena niakipaliara de ma Jou 'awi do-dotoko de 'atorangi.

⁵ Ee, ngini 'o yongo-yongosi, salingou niaki'isene 'ania tuangika. De mita salingou niakihoromati de niosigou-gounguku niaki'isene 'isoka wini'isene ma Kristusika.

⁶ 'Uwa niaki'isene duga ka gee ma 'orasi 'ona nisilega-lega, la duga kaniomau 'o nyawa nisiie. Ma ngini ge'ena ma Kristus winile-leleani so salingou niomanarama de nia singina ma gou-goungu moteke ma Jo'oungu ma Dutu wi mau.

⁷ De ngini 'o yongosi, nia manarama niadiai ge'ena salingou de nia singina 'isa-sanangi 'iso kogee ka ma Jou winileleani so duga ka 'o nyawakawa nialeleani.

⁸ Niongano-nganono! 'O nyawa 'iodumu, 'o yongosi bolo ko 'o yongosuawa, 'asa yamake 'o parasengi ma Jouno, ma ngale 'okia sonaa yaowa-owa yadi-diaiokau.

⁹ De ngini gee niodadi 'o tua-tuangi, ngini salingou nia di-diai koge'enali mita nia yongosika. 'Uwau niakisimodo-modongo de niakiano-anoko. Niongano-nganono ngini de 'o yongo-yongosi go'ona, to ngini 'ania tuangi kawimoi ge'ena la ma Jou 'o sorogaaka. 'Una ge'ena 'o nyawa kowoiri-irikuwa.

¹⁰ Ma do-dogumuku ne'ena ge'ena la, ngini salingou niokuata de 'o guata gee ngini niamakeno ma Jou wi kuasano, sababu ngini nimarimoi de de 'una.

¹¹ Niakokipake 'ania kia sonaa ma Jo'oungu ma Dutuno matero ka nia dae ma ngale niomariwo, la ngini 'idadi nia'akunu nialawani 'o Tokata ma Koana ma balifuta.

¹² Sababu ngone pomariwo ge'ena ko 'o nyawawa palawani, ma 'ena 'o sagala tokata ma guata gee yaparetano ma 'orasi 'o dorou 'idadi ne'ena. Ngone palawani 'o sagala ngomasa ma dorou gee 'ipareta 'o ngawa-ngawaka.

¹³ Ge'enau so salingou niakokipake 'ania dae ma Jo'oungu ma Dutuno ge'ena, la gee ma 'orasi 'o dorou 'idadi, ngini nia'akunu nimariwo. De mita sigado ma do-dogumika, ngini koni'akunuwa de ka nia guatoka.

¹⁴ Ngini salingou nimadudu-duanga! 'Iodumu gee 'iti-tiai ma Jo'oungu ma Dutuno niadiai 'ania gorona ma bu-busuku, de nia singina ma boooto niadiai 'ania baju 'o besi gee nia roese niositato-tatoko.

¹⁵ Salingou 'ania magae niositotara 'o Habari ma Owa gee 'inasikasa-sanangi, ge'ena matero ka nia tarupa.

¹⁶ 'O 'orasi 'isinoi-noimi 'ania ngo-ngaku ma Jouka niadiai 'ania sawaunu; sababu de 'ania ngo-ngaku ge'ena, ngini 'idadi niakokisongone 'o Tokata ma Koana ma toimi ma doto gee 'iluri-luri.

¹⁷ Niadawongo 'o laha ma Jo'oungu ma Dutuno, sababu ge'ena matero ka nia capeo 'o besi, de niadawongo ma Jo'oungu ma Dutu wi demo niadiai matero ka nia samarangi de niapake moteke 'o Ngomasa 'Itebi-tebini ma mau.

¹⁸ Niadiai 'iodumu ge'ena de nimalahidoa ma ngale nimaga'asoko ma Jo'oungu ma Dutu winiriwo. 'O 'orasi 'isinoi-noimi, nimalahidoa 'isoka kokia naga 'o Ngomasa 'Itebi-tebini nipareta. Ngini salingou tatapu nimadudu-duanga de 'uwa nimasisarakani. De salingou kaitaurika niakisilahidoa ma Jo'oungu ma Dutu wi 'umati 'iodumu.

¹⁹ De nisilahidoa ngoi mita, la ma Jo'oungu ma Dutu woikula 'o demo-demo yadae-daene gee ma 'orasi ngoi tobi-bicara. De mita la ngoi tomo-moroini tositotara 'o Habari ma Owa gee ma sira 'o nyawa koyanakowasi.

²⁰ Sababu 'o Habari ma Owa ge'enau, so ngoi todadi 'o su-suloko, de ma 'orasi ne'ena ngoi 'ibuika. Niolahidoa la ngoi tomoroini tobicara gee salingou kokia naga tobicara, ma ngale 'o Habari ma Owa ge'ena.

²¹ 'O Tikhikus nanga 'esa moi powisiboso-bosono, gee wota-tangaro womanarama ma Jou wi manarama, 'asa winisitotara nginika 'o sagala moi-moi ma ngale ngoi, la ngini nianako ngoi kokia de 'ai manarama kokia.

²² Ge'enau so ngoi towisuloko 'una wotagi nginika, la wositotara ngini nioodumika ma ngale ngomi kokia, la nia singina 'ikuata.

²³ Tanu ma Jo'oungu ma Dutu to ngone nanga Dea, de ma Jou Yesus Kristus yokula 'o sanangi de yosidadi 'o jamati 'iodumu 'imarimoi de yomakadora moi de moi, de mita tatapu yongaku ma Kristusika.

²⁴ Tanu ma Jo'oungu ma Dutu wosibarakati 'o nyawa 'iodumu gee wisiboso-bosono ma Jou Yesus Kristus, de 'o dora gee koiisa-isanguwau. Ngoi 'o Paulus, tinitabea!

Efesus

Video Efesus 6

Ikuti Kami:

KONTAK | PARTISIPASI | DONASI