Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Manga rariọ! Makoạ tumatol᷊e si Kristus e kai harusẹ̌ pakatatuhụ su ghaghurang i kamene u kai ene harusẹ̌ koateng i kamene.
2 "Pěngadatẹ̌ si amangu ringangu si ninangu e" kai tita masěllahẹ̌ bọu Mawu Ruata ringangu někědo,
3 u: "Tadeạu i kau e mal᷊unsemahẹ̌ dingangu maumburẹ̌ su dunia".
4 Manga anạ u sěmbaụ nakoạ kere i amang! Kumbahang bue mẹ̌koạ manga anạ i kamene sarang i sire měmpẹ̌bawal᷊uang. Kaiso pěhikingbe si sire ringangu maatorẹ̌ dingangu těntiroiwen těntiron Mawu.
5 Manga anạ u sěmbaụ apan nakoạ mẹ̌tatangkiang! Pakatatuhụko su mawung kamene su dunia e. Tẹ̌tuhukengben dingangu adate satia, ore lai ringangu kạguwạu ral᷊ungu naung al᷊ingkai kere kakoạ i kamene si Kristus sẹ̌sane.
6 Kumbahangbe kẹ̌taeng mẹ̌koạ kerene su tempong i kamene ikẹ̌kasilo e tadeạu kětạu makiralo su taumata. Kaiso i kamene kěngkakoạko kere sěngkatau mẹ̌tatangkiang si Kristus kapẹ̌kẹ̌koạe kapulun Mawu Ruata e ringangu kạguwạu naung.
7 Munara kẹ̌koateng i kamene kere sěngkatau mẹ̌tatangkiang e, koạkong kamene ringangu karal᷊uasu naung al᷊ingkai Mawu e tẹ̌tangkianeng i kamene wal᷊inewe kai kẹ̌tạeng taumata.
8 Pẹ̌tahěndungko u sěngkatau-sěngkatau e waẹbe i sie ěllang arau taumata wal᷊ine ěllang e, sarung makahombang bawal᷊ise wọu Mawu e baụgu munara mapapia e kinoạ e.
9 Manga anạ u sěmbaụ apan nakoạ manga mawu! I kamene kěbị e kěngkakoạko kerene su manga ěllang i kamene. Kumbahang měngkai měmẹ̌matakụ. Pẹ̌tahěndungko u i kamene ringangu manga ěllang i kamene ene, lawọ mạnaghuang mawune sěmbaụ kụ kai Mawu Kasěllahenge ěnnạe su sorga. I Sie tawe měmamile ghati.
10 Samurine ute, i kamene e pakatatoghasẹ̌ko ual᷊ingu katatoghasẹ̌ kahombangeng i kamene wọu kawasan Mawu, watụ u i kamene kai nasěmbaụ dingang'E.
11 Pakẹko patikụ padualatu pẹ̌seketang nighěllịu Ruata si kamene, tadeạu i kamene makararagẹ̌ dumokạ kal᷊awọu kal᷊iewehu akal᷊u setang.
12 Batụu i kitẹ e mẹ̌sẹ̌sekẹ bal᷊inewe rụdokạ taumata, kaiso kawe rụdokạ patikụ kuatu setang e kụ měngẹ̌ngawasa tempo ral᷊akisẹ̌ ini e. I kitẹ e kai rụdokạ kal᷊awọu kuatu rohkẹ̌ dal᷊akisẹ̌ nẹ̌kawasa huangu winangaeng.
13 Ual᷊ingu ene ute ini e pěmpẹ̌pakẹkom patikụ apal᷊iwụu pẹ̌sěketang'u Ruata, tadeạu su ěllo ral᷊akisẹ̌ e i kamene e makaumal᷊ẹ̌ bue měmatạ kal᷊awọu sekẹ e. Dingangu tadeạu sarangke i kamene mẹ̌kul᷊ẹ̌te makaratingu pěhẹ̌pusange ute, i kamene mamben těbe matoghasẹ̌.
14 Pakaral᷊ukadẹ̌ bue i kamene. Pẹ̌papẹ̌gongkong kasasatia su Mawu Ruata e i kamene tabidạem papehẹ, dingangu pěluhengkong katul᷊idẹ̌ e kere pakeang i kamene uase.
15 Pakakěhagẹ̌ bue i kamene měhabaru Injilẹ̌ e makawawa karal᷊unsemahẹ̌ si kamene makoạ kere sapatung kamene.
16 Mase měngkai sěntiniạ tempo e pěmpẹ̌pakẹem pěngangimang su Mawu Ruata e kere aghidẹ̌ ipěnẹ̌nighe; ringangu pěngangimang ene e makapěnẹ̌bu horom papitị piạ putunge wọ'i ral᷊akisẹ̌ e.
17 Daekeko kasasal᷊amatẹ̌ e koạ kere sakapeti waja, ringangu hengetangu Mawu e koạ kere aghidẹ̌ bọu Rohkẹ̌ u Ruata e.
18 Koạko patikụ ene e kapẹ̌kal᷊iomanenge mẹ̌gẹ̌gausẹ̌ tul᷊umang bọu Ruata. Tinịa apạewen piạ loahe, ute pěmpẹ̌kal᷊iomanengko kerẹewe laahạu Rohkẹ̌ u Ruata e si kamene. Pakarariagạ bue i kamene ringangu pakakakědang bue. Pakasau wue mẹ̌kal᷊iomaneng baụgu patikụ kawanuan Duata.
19 Mase lai pẹ̌kal᷊iomanengbe waugu iạ, tadeạu su tempong iạ mẹ̌bisara ute iạ onggotangbem Mawu e wawera mẹ̌tatal᷊ahino. Dingangu tadeạu iạ e wahani makapěhabaru lẹ̌lirung u Injilẹ̌ e.
20 Ual᷊ingu Injilẹ̌ ene e iạ nakoạ sěngkatau rarolohang kụ orasẹ̌ ini e mạtatahungkụ. Pẹ̌kal᷊iomanengko waugu iạ e tadeạu wahani mahumbisaran Injilẹ̌ e, kerẹewe hinone iạ makapẹ̌bisara.
21 I Tikhikus, anạ u sěmbaụ i kitẹ dingangu mẹ̌tatangkiang satia su ral᷊ungu Mawu e, sarung mapakasingkạu patikụ kakakoạku e si kamene, tadeạu i kamene makakasingkạu iạ dingangu munaraku.
22 Kai ene hakịu iạ něndoloh'i sie si kamene pělẹ̌habaru kakakoạ i kami si kamene kěbị, tadeạu mapakasarian naung i kamene.
23 Milumbạko Ruata i Amang, dingangu Mawu Yesus Kristus mapakasěmbạu u patikụ jamaatẹ̌ dingangu mẹ̌kakakěndagẹ̌ dingangu tatapẹ̌ mạngimang si Kristus.
24 Mal᷊umbạko Ruata e měngal᷊amatẹ̌ si kamene kěbị kụkěndagu Mawung kitẹ i Yesus Kristus dingangu kakěndagẹ̌ tawe lumaědusẹ̌. Adat'i kami, Paulus
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA