Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ngini ge'ena ma Jo'oungu ma Dutu wi ngowa-ngowaka gee winisiboso-bosono, sababu ge'ena ngini salingou niamoteke 'isoka to 'una 'awi gokoie.

² 'Ania 'ahu salingou ma titi 'o dora, 'isoka ma Kristus mita wonadora ngone. 'Una womasisarakani wiso-songene ma ngale wonasilaha, de ge'ena 'imadadi 'o su-suba gee ma bounu yaowa-owa de ma Jo'oungu ma Dutu 'awi singina yasa-sanangi.

³ Ngini ge'ena ma Jo'oungu ma Dutu 'awi 'umati. Sababu ge'ena, nginioka naga koyadaenuwa nimakapake kanio'itimaronga, niodiai 'o sagala dorou bolo 'okia sonaa niodo-dopokana. 'Uwa sigado 'o nyawa yongose 'ato ngini niodi-diai koge'ena.

⁴ Mita koyadaenuwa ngini niosisupu 'o demo-demo gee 'ipa-pakisani, 'o demo-demo gee ma faedaa koi'iwa-'iwa, de gee koyadae-daenuwa posisupu. Ma 'ena ngini salingou nio'amalaha ma Jo'oungu ma Dutuka.

⁵ Niongano-nganono: 'O nyawa gee yomakapake kaitimaronga, manga di-diai 'ipa-pakisani bolo yodo-dopokana 'okia sonaa, 'ona koidadiwa yodadi 'umati gee ma Kristus de ma Jo'oungu ma Dutu yakipa-pareta. Sababu 'o nyawa gee koge'ena yodi-diai ge'ena kaimatero de gee 'o barahala yasuba-suba.

⁶ 'Uwa ngini nisihaga de 'o demo-demo gee ma faedaa koi'iwa-'iwa, sababu koge'ena-'enau 'isiwaere ma Jo'oungu ma Dutu 'awi gorosau 'o nyawa-nyawaka gee kowisingou-ngounuwa.

⁷ So ka ma eta ma 'uwa niakidomoteke 'o nyawa-nyawa 'isoka go'ona.

⁸ Ma sira ngini ma sirete nio'ahu matero ka 'o darusoka. Ma ne'ena ngini niodadiokau ma Jou wi 'umati so ngini matero ka 'o darangiokau.

⁹ Sababu 'o daranginou ge'ena 'ibaoro 'o sagala di-diai gee ma gou-goungu yaowa-owa, 'iloa de 'itiai ma Jo'oungu ma Dutu wi bionoka.

¹⁰ Niomariwo de ma goungu niosikanako 'okia naga gee ma Jou wodua-duaka.

¹¹ 'Uwa niadiai 'okia sonaa gee ma faedaa koi'iwa-'iwa 'isoka gee 'o nyawa yo'ahu 'o darusoka yadi-diai. Ma 'ena ngini salingou niosidumutu 'o nyawa-nyawaka, ma ngale gee koge'ena yodi-diai ge'ena 'isowono.

¹² (Sababu 'okia naga gee 'o nyawa yadi-diai kayosigi-gi'iunino, ge'ena kapabicara ma 'inamaekokau.)

¹³ 'O sagala moi-moi gee 'o siwara yadae-daene, 'asa 'o nyawa yamake 'iwai-waiti.

¹⁴ Sababu 'iodumu gee pamake-make ge'ena 'imadadi 'o darangi. Ge'enau ma sababu so yongose 'ato, "Nomomiki ngona gee noma'idu-'iduoka, de nomomiki 'o songenoka! Ma Kristus 'asa wonidisiwara ngonaku."

¹⁵ Sababu ge'ena, niatibangi niosidi-diai kokia to ngini nia 'ahu. 'Uwa nio'ahu 'isoka 'o nyawa yohaga-haga; ma nio'ahu 'isoka 'o nyawa yoba-barija.

¹⁶ 'O 'orasi niamake 'isinoimi, salingou niapake niosidi-diai ma ngale niadiai gee yaowa-owa. Sababu ma 'orasi ne'ena naga ge'ena la 'o 'orasi 'idadi 'o dorou.

¹⁷ 'Uwa niohaga-haga, ma 'ena salingou niasahe 'okia naga gee ma Jou wodua-duaka.

¹⁸ 'Uwa 'o 'anggur niosigeto, sababu ge'ena dua nisitorou. Ma ngini salingou 'o Ngomasa 'Itebi-tebini niparetano.

¹⁹ De nimabi-bicara ge'ena salingou niapake 'o demo-demo 'o Mazmuroka, ma Jou powisiarene ma nyanyioka, de pojaru powisitedene ma Jo'oungu ma Dutu. Ngini salingou niomore-morene nionyanyi ma Jou winisiarene.

²⁰ Naga 'o sagala moi-moioka, ngini salingou kaitaurika nio'amalaha ma Jo'oungu ma Dutuka to ngone nanga Dea, niositesongo de ma Yesus Kristus to ngone nanga Jou 'awi ronga.

²¹ Ma ngale winihoromati ma Kristus, ngini salingou nimaka'isene moi de moi.

²² Ee, ngini 'o weka-wekata, salingou niaki'isene nia rokatika, 'isoka ngini wini'isene ma Jouka.

²³ Sababu 'o rokata ge'ena yodadi balusu 'o wekatika, 'isoka ma Kristus mita wodadi 'o jamati ma saeke de 'unau wonasilaha-laha 'o jamati gee matero ka to 'una 'awi roese.

²⁴ 'Isoka ngone 'o jamati mita po'isene ma Kristusika, koge'ena mita 'o sagala moi-moioka 'o wekata salingou yo'isene manga rokatika.

²⁵ Ee, ngini 'o roka-rokata, salingou niakisibosono nia wekata, 'isoka ma Kristus wosibosono 'o jamati de womodeke wiso-songene ma ngale watuusu 'o jamati.

²⁶ Ma Kristus koge'ena wadiai la 'una 'idadi wonatebini ngone 'o jamati de 'awi do-dotoko de 'o go-gosiki ma 'akere ma ngale pomarimoi de de 'una, la dua 'una 'asa 'idadi wonasisarakani ma Jo'oungu ma Dutuka.

²⁷ Ge'enau so ma Kristus wonadiai, la ngone 'o jamati poma'okode 'awi bionoka 'ena posironga de pokumatioka de potebi-tebini, de ko naga kiawa 'ikurangi, de nanga sala ka ma eta ma koi'iwa.

²⁸ Koge'enali mita 'o rokata salingou yakidora manga wekatika 'isoka 'onali ma sirete yomadora. 'O nyawa gee manga wekata yadora, ge'ena ma ngale yomadora 'ona ma sirete.

²⁹ (Koma'iwa yodu'uduku to 'ona manga roese ma sirete. Ma 'ena yajaga de yapaliara, 'isoka ma Kristus mita wapaliara 'awi jamati,

³⁰ sababu ngone ne'ena matero ka ma Kristus 'awi roese ma kia sonaa.)

³¹ 'O Buku 'Itebi-tebinoka 'isilefoku, "Sababu ge'ena 'o nau-nauru 'asa yakimada manga dea de manga 'esa ma ngale yomarimoi de manga wekata, de yamididi go'ona 'asa yodadi ka moi."

³² Ma Buku 'Itebi-tebini ma bo-bulaka ge'ena ma ngale posironga ma lukuku. De ngoi tosika'ese ge'ena, ma Kristus de 'o jamati.

³³ Ma ma bo-bula ge'ena mita ma dumutu nginika. 'O roka-rokata 'iodumu salingou manga wekata yosibosono 'isoka 'ona ma sirete yomasibosono, de 'o weka-wekata salingou yakihoromati manga rokatika.

Efesus

Video Efesus 5

Ikuti Kami:

KONTAK | PARTISIPASI | DONASI