Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Turu'i to sipa'-Na Puang Allataala, nasaba' kamu'mo anak napakamoja'.

² La sikamasean kamu' susi Almaseh ngkamaseiki', iamo na mpangkaroban kalena la mpasalama'ki'. Ia joo kamatean-Na susi karoba bunangngu' to napumasannang Puang Allataala.

³ Jagai sangammi, danggi' naden tau mpaui kumua manggauk sala kamu', madoang kamu' nnassang sininna apa iarika mpugauk kamu' panggaukan tangsipato' laenna. Te'da nasipato' joo, nasaba' umma'-Na kamu' Puang Allataala.

⁴ Tangsipato' too kamu' mangkada carepa, mangkada tangkebattuan sola nnamboh bang kada. Apa la mangkurru sumanga'ra kamu' lako Puang Allataala.

⁵ Nasaba' miissen kumua te'da nawa'ding menjaji umma'-Na Almaseh sola Puang Allataala lan kaparentan-Na to tomanggauk sala, tomangkedo tangsipato'na, ba'tu tomadoang bang nnassang sininna apa, nasaba' ia to tomangngassang dipapadai tossompa dewata.

⁶ Danggi' mieloranni to tau susi joo mpalao sala kamu' mpake kada-kada mala'bih apa sitonganna te'da natongan. Nasaba' mabirih Puang Allataala lako to tocia' nturu' parenta-Na.

⁷ Danggi' lalo misiama' tosusi joo.

⁸ Ia tonna jolona ia to sipa'mi susi sipa'na to tote'da naissen Puang, apa ia tee too nnissenmo kamu' Puang. Iamo joo ia to panggaukanmi la susi unamo panggaukanna umma'-Na Puang.

⁹ Panggaukan melo, maruruh na tongan pole jio ngasan mai Puang.

¹⁰ Pengkulle-kulleii nnissenni apara nakabudai Puang ammipugaukki.

¹¹ Danggi' mipugaukki susi to napugauk to tote'da naissen pakkaeloran-Na Puang, nasaba' te'da lalo napumelona tau joo apa napugauk. Apa la mipaissennii kumua tangmelo joo.

¹² Ia to napugauk buni, mesirisan mpaui.

¹³ Apa la pajan kumua gaja' to panggaukanna, ke naissenmi to pakkaeloran-Na Puang.

¹⁴ Nasaba' ia to pakkaeloran-Na mpaissennii joo tau. Iamo joo naden dipau kumua, "Ee, iko to mamma'na, mi'cikmoko, ammutuo pole' jio mai kamatean, anna la napamanassanko Almaseh to pakkaeloran-Na Puang!"

¹⁵ Iamo joo mangngingaran melo kamu', danggi' mimessipa' susi tobango', apa la messipa' susira kamu' tomasaranian.

¹⁶ La mipake to wattummi mpugaukki to dipumelona, nasaba' gaja' sipa'na to tau tee wattu.

¹⁷ Danggi' messipa' susi tobango', apa la miissen to pakkaeloran-Na Puang.

¹⁸ Danggi' mimalango nasaba' ia mpaden panggaukan gaja', apa eloranni to Roh Allataala ngkuasai kamu'.

¹⁹ La sipamasumanga' kamu' makkelong Zabur sola kelong pangpujian, mimakkelong situru' canning atimmi ke sitammu kamu' mpakala'bih Puang.

²⁰ La mangkurru sumanga' tarruh kamu' lako Ambe'ta' Puang Allataala mpau sangan-Na Puangta' Puang Isa Almaseh, nasaba' sininna to mangka napugauk lako kamu'.

²¹ La mangpasituru' kamu' mesa' sola mesa'. Iamo buttinna kumua mikasiri' to Almaseh.

²² Ee, kamu' baine! La menturu' kamu' lako muanemi susi lako Puang.

²³ Nasaba' muane ngkapalai baine, susi Almaseh ngkapalai jamaa. Na Ia toomo mpasalama' tomatappa' to dipasangrapang batang kale-Na.

²⁴ Susi tomatappa' menturu' lako Almaseh, susi todami to baine la tuli menturu' lako muanena.

²⁵ Ee, kamu' muane! Pakamoja'i to bainemi susi Almaseh mangpakamoja' napangkaroban kalena ssulle tomatappa'.

²⁶ Susimi joo napatorro leko' kamu' Almaseh ammimenjaji tau mesan-Na. Nadampangan kamu' mpake wai pangjioran sola pangngajah-Na.

²⁷ Napugaukki susi joo anna te'da salana, kakuranganna, ba'tu cacca laenna to tomatappa', apa melo, mala'bih na sipato' ke'deh jio sa'dena Almaseh susi tobotting baine ke'deh jio sa'dena tobotting muane.

²⁸ Susimi joo ia to pangpakamoja'na muane lako bainena la pada pangpakamoja'na lako kalena. Nasaba' ia to mpakamoja' bainena, pada ke mpakamoja'i kalena.

²⁹ Te'da ia mesa' tau ngkaba'ci batang kalena, apa naparakairi ia. Susi too Almaseh mparakai tomatappa',

³⁰ nasaba' ia to tomatappa' dipasangrapangngi batang kale-Na.

³¹ Den diuki' lan Sura' Allataala kumua, "Iamo joo na ia to muane la messarakki jio mai tomatuanna, namale memmesa' sola bainena, nasangkale sola dua."

³² Liwa' mandalanna battuananna tee kada. Ia to kusanga iamo to kasiumputanna Almaseh na tomatappa'.

³³ Jaji, ia to pangpakamoja'na muane lako bainena la pada pangpakamoja'na lako kalena, na ia to baine la ngkasiri' muanena.

Efesus

Video Efesus 5

Ikuti Kami:

KONTAK | PARTISIPASI | DONASI