Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Keranaq nike side pade harus turut teladan Allah, sẽngaq side pade bije-bije saq tekasihin siq Allah.

² Idupde harus tekuasein siq kasih, maraq Almasih ẽndah ngasihin ite. Ie ngurbanang diriq-Ne umaq ite, jari sopoq persembahan saq sengẽh dait kurban saq nyenengang Allah.

³ Laguq perbuatan-perbuatan saq cabul dait saq ndẽq patut, atao serakah, ndaq gati teraosang lẽq tengaq-tengaq side pade -- mule maraq nike sepatutne dengan-dengan saq tehususang bagi Allah.

⁴ Ndẽqne patut ẽndah side ngucapang raos saq kotor saq ndẽq araq manpaatne dait saq ndẽq pantes. Sebalikne side pade harus ngucapang syukur tipaq Allah.

⁵ Pade perhatiang solah-solah: Dengan saq gawẽq perbuatan saq cabul, atao ndẽq patut, atao serakah (kelakuan maraq nike pade doang maraq nyembah berhale), dengan nike ndẽqne mauq bagian lẽq dalem Kerajaan Almasih dait Allah.

⁶ Ndaq side pade tetipu siq raosan-raosan saq kosong. Sẽngaq hal-hal niki saq datengang murke Allah tipaq dengan-dengan durhake.

⁷ Jari, ndaq gati berubungan kance dengan-dengan maraq nike.

⁸ Laẽq side mẽsaq araq lẽq dalem peteng. Mangkin side pade sampun jari terang lẽq dalem Tuhan. Keranaq nike side pade harus idup sebagẽ bije-bije terang.

⁹ Sẽngaq terang cume ngasilang kesolahan dait keadilan dait kebenaran.

¹⁰ Pade berusahe jari nguji napi saq nyenengang Tuhan.

¹¹ Ndaq gawẽq perbuatan-perbuatan saq ndẽq araq manpaatne saq tegawẽq siq dengan-dengan saq idup lẽq dalem peteng. Sebalikne, side pade harus nyatayang kesalaqan-kesalaqanne.

¹² (Sẽngaq hal-hal saq ie pade laksaneang nyeboq-nyeboq nike, jari teraosang doang sampun merilaq gati.)

¹³ Selapuq hal saq teperhatiang lẽq dalem menah, gen pedas penggitan.

¹⁴ Sẽngaq selapuq saq penggitan nike terang. Keranaq nike tesampẽang maraq niki, "Pade ures, hai side saq tindoq, dait idup lẽman ninggal! Almasih gen becahaye lẽq atasde."

¹⁵ Keranaq nike, pade perhatiang solah-solah berembẽ side idup. Ndaq idup maraq dengan-dengan bodo; pade idup maraq dengan-dengan saq bijaksane.

¹⁶ Manpaatang solah-solah selapuq kesempatan saq araq lẽq side, sẽngaq jaman niki jaman saq jahat.

¹⁷ Ndaq bodo, laguq selidik napi saq tekayunang siq Tuhan.

¹⁸ Ndaq side pade bowos siq anggur, sẽngaq nike gen nyẽdaq side pade. Sebalikne side pade harus tekuasein siq Roh Allah.

¹⁹ Lẽq waktu side pade ngeraos, kadu ucapan-ucapan saq araq lẽq dalem Zabur, nyanyiang pujian bagi Allah dait lagu rohani. Side pade harus memuji Tuhan siq sepenoq angen.

²⁰ Sebilang waktu dait lẽq hal napi juaq side harus besyukur lẽq Allah Bapa, siq pesẽngan Deside Isa Almasih, Junjungante Saq Mulie.

²¹ Jari hormatin Almasih, side harus saling hormatin sopoq kance saq lain.

²² Hai senine, tunduk lẽq semamende, maraq tipaq Tuhan.

²³ Sẽngaq semame nike jari kepale lẽq seninene, pade maraq Almasih ẽndah jari kepale lẽq jemaah dait Ie ẽndah saq nyelametang jemaah saq jari rage-Ne.

²⁴ Pade maraq jemaah ẽndah tunduk lẽq Almasih, maraq nike ẽndah lẽq dalem selapuq hal, senine harus tunduk lẽq semame.

²⁵ Hai semame, kasihin seninende, pade maraq Almasih ngasihin jemaah dait ngurbanang diriq-Ne umaq jemaah nike.

²⁶ Almasih ngelaksaneang nike jari nyuciang jemaah, sesampun Ie persiq siq baptisan dait manik-Ne.

²⁷ Siq care nike Almasih miaq jemaah nike bau nganjeng secare agung dait murni lẽq arepan-Ne, ndẽq araq bedowẽ cacat atao cele.

²⁸ Maraq nike ẽndah semame harus ngasihin seninene maraq ie ngasihin awakne mẽsaq. Dengan saq ngasihin seninene artine ie ngasihin diriqne mẽsaq.

²⁹ (Ndẽq uwah araq dengan saq meriq lẽq awakne mẽsaq. Sebalikne, ie peliharaq dait jagaq, maraq Almasih ẽndah peliharaq jemaah-Ne.

³⁰ Ite nenaoq hal nike, sẽngaq ite anggote-anggote rage Almasih.)

³¹ Lẽq dalem Kitab Suci tetulis, "Keranaq nike sopoq dengan mame gen bilin inaq amaqne dait besopoq kance seninene, dait deduaqne gen jari sopoq."

³² Ayat nike bedowẽ maqne saq dalem. Dait tiang hubungang hal nike antare Almasih kance jemaah.

³³ Laguq ayat nike araq ẽndah hubunganne kance side pade. Sebilang semame harus ngasihin seninene maraq ie ngasihin diriqne mẽsaq dait sebilang senine harus berusahe hormat lẽq semamene.

Efesus

Video Efesus 5

Ikuti Kami:

KONTAK | PARTISIPASI | DONASI