Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ngaceku muyuh ineh lun manu inan Allah mawa' do' muyuh nutun maya' ayuNeh.
2 Idi mulun bang awa, mepad kudeng Keristus pana' pangeh mawa netau, idi pangeh nemaré bururNeh ngaceku tau, mangun kuk aceh baré luk do' buen idi aceh luk barén luk inan Allah mawang niat.
3 Ngaceku muyuh ineh lun manu, gayam ratnan pasét, luk melutak, idi lili na miak tetanen arang muyuh.
4 Idi teh na petulu muyuh ngeruat bala luk melutak, bala luk mebacé, idi bala luk na petulu tetanen. Iamo' meluun do' maré ubur.
5 Ngerawé do'-do'! Lemulun luk pasét, lemulun luk melutak, idi lemulun luk melili (ngaceku lili ineh mepad kudeng sembayang inan akang) na ngalap babpat bang Imet Keristus idi Allah ineh.
6 Aleg nima' seburur pana' naluk nemuyuh dengan bala luk mo'-mo', ngaceku ratnan ineh useh Allah macing kuan lemulun luk ngelaba balaNeh.
7 Aleg muyuh perurum nedeh.
8 Atun muyuh pekalai bang dacem, iamo' nekini muyuh luk manu idi mulun bang acang Tuhan, idi petulu muyuh mulun mepad kudeng anak-anak acang.
9 Ngaceku bua'-bua' luk remuat rat bang acang, ieh ineh luk do', luk matu, idi luk mesiri.
10 Do' muyuh nutun sibada' luk petulu maya' pian Tuhan.
11 Aleg muyuh perurum bang kekamen lemulun luk nganau' luk na petulu, iamo' meluun do' ngesala' kekamen ineh.
12 (Ngaceku amung-amung kekamen luk inau'deh dengan lulem ineh, neten neneh pana' migu' teh.)
13 Kareb kekamen ineh uen acang ngegala', idi datdeh megala' peh.
14 Ngaceku anun-anun luk ginala' bang acang, ieh ineh macang. Ini punneh Tuhan pebala, "Kulat, O iko luk rudap, idi tumui rat arang lun naté! Idi Keristus macang luunmu."
15 Ngaceku ineh ngerawé do'-do' ratnan kudeng apeh muyuh mulun. Aleg mulun mepad kudeng lemulun luk mebacé, iamo' do' mepad kudeng lemulun luk mileh,
16 dengan na nala' kareb, ngaceku kareb ini kareb luk dat.
17 Aleg muyuh mebacé, iamo' do' muyuh nakap luk pian Tuhan ruen muyuh.
18 Aleg muyuh mabuk ku arak luk ngusag ulun muyuh, iamo' do' muyuh mepanu' ku Roh.
19 Idi pebala arang muyuh sebuleng dengan nani ubur, idi ubur-ubur, idi nani luk ratnan Roh. Idi do' muyuh menani idi ngitang dengan ubur dengan amung niat muyuh kuan Tuhan.
20 Megéi' maré ubur bang luk anun-anun kuan Allah Taman dengan ngadan Tuhan tau Yésus Keristus.
21 Ngebeneh burur muyuh seburur dengan seburur dengan matot inan Keristus.
22 O decur luk inan awan, do' muyuh mebeneh ratnan deléi muyuh mepad kudeng kuan Tuhan,
23 ngaceku deléi ineh mangun ku rayeh kuan decurneh, mepad kudeng Kerisuts pana' mangun ku rayeh kuan sidang, idi Keristus sebuleng luk nengulun burur ineh.
24 Iamo' mepad kudeng sidang ineh mebeneh ratnan Keristus, kudeng ineh teh decur luk inan awan mebeneh ratnan deléideh bang luk amung-amung.
25 O deléi luk inan awan, mawa inan decur muyuh, mepad kudeng Keristus pana' pangeh mawa inan sidang, idi nemaré bururNeh ngaceku sidang ineh.
26 Ieh nenganau' ineh pelé Ieh miak ngeligan sidang ineh, kareb Ieh pangeh nemaru' neneh ku baru' abpa' ratnan bala Allah,
27 pad Ieh mudut sidang ineh pa kiungNeh sebuleng dengan do' taga, meligan, idi meriput, dengan na pilat, idi urat, idi anun-anun luk na petulu pana'.
28 Do' deléi mawa inan decurdeh, mepad kudeng mawa inan bururdeh sebuleng. Idi lemulun luk mawa inan decurneh, ieh ineh mawa inan bururneh sebuleng.
29 (Na luk idi seburur pana' luk megateh inan bururneh sebuleng. Iamo' ieh matar idi ngasa' neneh, mepad kudeng Keristus pana' matar idi ngasa' sidangNeh ineh,
30 ngaceku tau ini babpat bururNeh.)
31 Maya' kudeng luk inayud, "Ini punneh seburur lemulun sikal necan taman-tinanneh, idi pamung dengan awanneh, idi didueh ineh mangun ku sebuleng uang mo' peh."
32 Bada' luk inalum ini pelaba dalem, iamo' ui ngerawé ini pinginud ratnan rurum arang Keristus dengan sidangNeh.
33 Iamo' do' amung-amung muyuh mawa inan decur muyuh sebuleng mepad kudeng burur muyuh sebuleng; do' decur luk inan awan ineh ngedita' deléineh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA