Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ai pe, sitiru Naibata ma nasiam, songon anak na hinaholongan!
2 Anjaha marparlahou ma nasiam ibagas haholongan, songon Kristus na mangkaholongi nasiam, anjaha ibere do diri-Ni mangkopkop hita, gabe siluah ampa galangan bani Naibata, gabe uap na misbou.
3 Tapi parriah-riahon ampa bagei ni habutakon atap uhur haut pe, ulang ma tarsobut bani nasiam, songon na patut bani halak na pansing.
4 Sonai homa sihamelahononkon, hata sumsam, atap huria-huria na so patut, tapi sidearan ma sahap tarima kasih.
5 Ai botoh anjaha ingat nasiam ma, anggo bani harajaon ni Kristus ampa Naibata, seng dong siteanon ni siparriah-riah, barang halak na mabutak, barang paruhur haut, ai sibalosi na so Naibata do in.
6 Ulang ma ra nasiam paoto-otoon ni atap ise pe marhitei hata-hata na lumei, ai halani ai do mangonai ringis ni Naibata bani halak na so mambalosi.
7 Halani ai, ulang ma nasiam ra marhasomankon sidea!
8 Ai golap hinan do nasiam, tapi sonari lihar do nasiam ibagas Tuhan in; marparlahou ma nasiam songon anak haliharon;
9 ai buah-buah ni haliharon ai ma sagala halayakon, hapintoron ampa hasintongan.
10 Paruhurhon nasiam ma, atap aha do harosuh ni Tuhan in!
11 Ulang ma saor nasiam bani horja hagolapon, na so adong buahni, tapi patalar nasiam ma ai rahanan.
12 Ai gari manarsingati na hinorjahon ni sidea ibagas na ponop, hamelaon do ai.
13 Tapi maningon talar do ai haganup, pinatalar ni haliharon in, ai sagala na pinatalar, lihar ma ai.
14 Halani ai, nini do, “Puho ma ho na modom in, anjaha puho ma humbani na matei, gabe sondangan ni Kristus ma ho.”
15 Halani ai paruhurhon ma, sonaha patut parlahou nasiam, ulang ma songon halak na so maruhur, tapi songon halak siparuhur ma,
16 pangkei manggunahon panorang, ai ari hasunsahan do nuan.
17 Halani ai ulang ma maoto nasiam, tapi arusi nasiam ma, atap aha harosuh ni Tuhan in.
18 Anjaha ulang ma mabuk nasiam halani anggur, ai hamagouan do ibagas ai, tapi gok Tonduy ma nasiam!
19 Marsahap ma nasiam samah nasiam marhitei doding Psalm, doding puji-pujian ampa doding partonduyon, dodingkon anjaha puji nasiam ma Tuhan in ibagas uhur nasiam!
20 Tongtong ma nasiam mangkatahon tarima kasih halani haganup bani Naibata Bapa, ibagas goran ni Tuhanta Jesus Kristus!
21 Marsibalosan ma nasiam ibagas biar mangidah Kristus!
22 Nasiam parinangon, balosi nasiam ma paramangon nasiam, songon pambalosi nasiam bani Tuhan in.
23 Ai paramangon in do ulu ni parinangonni, songon Kristus ulu ni kuria in, sipaluah angkula, (kuria in).
24 Songon pambalosi ni kuria in bani Kristus, sonai ma pambalosi ni parinangon bani paramangonni ibagas haganup.
25 Nasiam paramangon, haholongi nasiam ma parinangon nasiam, songon Kristus na mangkaholongi kuria in anjaha ibere diri-Ni mangkopkopsi,
26 ase ipapansing in, marhitei na ipaborsih marhitei na mandidihon bah ibagas Hata in,
27 ase Ia sandiri pasirsir kuria in Bani, sangap, seng martikas, seng marringut barang marhahurangan atap aha pe, tapi ase pansing tene anjaha seng dong sihataon.
28 Sonai do patut haholongan ni paramangon parinangonni bei, songon angkulani sandiri. Na mangkaholongi parinangonni, dirini do hinaholonganni ijai.
29 Seng ongga isogami jolma dagingni, tapi iparmudu-mudu anjaha isarihon do ai, songon pambahen ni Kristus bani kuria in,
30 ai pagori ni angkula-Ni do hita.
31 Halani ai tadingkonon ni halak do bapani ampa inangni, laho mangkasomani parinangonni, anjaha gabe sada daging do sidea na dua ai.
32 Ia rusia on banggal do, tapi bani Kristus ampa kuria in do hulimbagahon in.
33 Ase ganup ma nasiam marsihaholongi parinangonni bei songon dirini sandiri, anjaha parinangon pe ihabiari ma paramangonni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA