Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Puari-puari sai jadi majikan! Hagani keti memperlakuko jelma-jelma sai ngebantu niku benor rik adil. Ingokdo bahwa keti pun ngedok sai majikan di surga.

² Hagani keti bedua tekun rik siap siaga, sambil ngucapko syukor jama Allah.

³ Bedua juga untuk sekam in Allah ngeniko jama sekam kesempatan sai helau untuk nyebarko kabar tentang rahasia-Ni Almasih. Mani hal udido maka nyak tano inji wat di delom bui.

⁴ Beduado in nyak dapok ngejelasko rahasia-rahasia udi sejelas-jelasni injuk semestini.

⁵ Di delom hubungan keti jama jelma-jelma sai mak percaya, hagani keti hurik bijaksana rik makai unggal kesempatan sebetik-betikni.

⁶ Hagani hal-hal sai keti ucakko selalu nyenangko rik menarik. Hagani keti pandai injuk repa seharusni keti ngejawab pertanyaan-pertanyaan ulun.

⁷ Tikhikus, puari ram sai kekasih, haga ngeni pandai jama keti sunyin hal tentang nyak. Ia setia beguai jejama sekam untuk Tuhan.

⁸ Nyak ngutus ia jama niku alasanni in keti pandai keadaan sekam rik keti tehibur.

⁹ Onesimus haga mik jejama jama Tikhikus; ia jak kalanganmu. Ia setia rik sekam mengasihini. Ia rik Tikhikus haga ngeni pandai jama niku sunyinni sai tejadi di rangku inji.

¹⁰ Aristarkhus, sai wat delom bui jejama nyak, ngirim salam jama keti. Reno juga Markus, puari sepupu Barnabas. (Keti radu dikirimi kabar untuk nyambut ia kik ia ratong jama niku.)

¹¹ Salam muneh jak Isa sai gelarni Yustus juga. Jak jelma-jelma Yahudi sai radu percaya jama Tuhan Isa, angkah tian telu gaoh sai tano beguai jejama jama nyak untuk ngejalanko tugas jak Allah. Tian temon-temon nulung nyak.

¹² Salam jak Epafras. Ia juga jak kalanganmu. Ia jelma sai ngebantu Isa Almasih, sai selalu bedua tekun untuk keti. Ia ngilu nihan jama Allah in keyakinanmu jadi kuat rik temon-temon dewasa, in keti sempurna taat jama kehaga-Ni Allah.

¹³ Nyak nyaksiko tenggalan bahwa ia radu beguai keras untuk keti rik untuk jelma-jelma sai di Laodikia rik Hierapolis.

¹⁴ Dokter Lukas, sai ram kasihi, rik Demas ngirim salam jama niku.

¹⁵ Sampaikodo salam sekam jama puari-puari jelma Kristen di Laodikia; juga jama Nimfa, rik jama jemaah sai beibadah di lambanni.

¹⁶ Radu jak surat inji dibacako jama niku, usahako in ano dibacako juga jama jemaah sai di Laodikia. Reno muneh keti tenggalan harus ngebaca surat sai haga dikirim jak Laodikia jama niku.

¹⁷ Rik keni pandai Arkhipus, "Selesaikodo tugas sai dikeniko jama niku untuk ngelayani Tuhan."

¹⁸ Salam jak nyak, Paulus. Nyak tenggalan sai nulis bagian inji. Dang lupa bahwa nyak masih di delom bui! Semoga Tuhan ngeberkati keti. Hormat sekam, Paulus

Kolose

Video Kolose 4

Ikuti Kami:

KONTAK | PARTISIPASI | DONASI