Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Songon salju musim milas, atap songon udan musim sabion, sonai do, seng patut hamuliaon bani halak na oto.

² Songon dingis na laho lintun meper-eper, songon hampilis na maporus habang, sonai do bura-bura na so marhala, seng mangonai.

³ Bosik-bosik do talup bani huda, rantei bani halode, sonai do hotang bani gurung ni halak na oto.

⁴ Ulang ma sampang halak na oto domu hubani haotoonni, ase ulang gabe songonsi ho.

⁵ Marbalos ma ho bani halak na oto romban hubani haotoonni, ase ulang iagan na pentar ia.

⁶ Halak na martonah marhitei halak na oto, na manrotap naheini do ia ai anjaha manginum na masambor.

⁷ Songon nahei na so marguna bani halak na repat, sonai do podah bani pamangan ni halak na bodoh.

⁸ Songon halak na mambahen mata intan batu ni umbalang, sonai do halak na mambere hamuliaon bani halak na oto.

⁹ Songon dangkah na marduri na dapot tangan ni halak na mabuk, sonai do hata umpama bani pamangan ni halak na oto.

¹⁰ Songon halak siparsior, na manembaki haganup, sonai do halak na mangupahi halak na oto atap halak sipamolus.

¹¹ Songon baliang na mangulaki utah-utahni, sonai do halak na oto mulak-ulak mangkorjahon haotoonni.

¹² Anggo dong ididah ho halak, na mangagan dirini pentar, bueinan ope pangarapan bani halak na bodoh ase bani.

¹³ Hata ni halak parrayoh, “Adong do begu i darat ai, adong do singa i dalan ai!”

¹⁴ Songon labah na marhusor bani engselni, sonai do halak siparrayoh bani podomanni.

¹⁵ Domma ipohul siparrayoh indahanni, hape rayohan do ia mannahkon hu pamanganni.

¹⁶ Pentaran do halak siparrayoh, ninuhurni, marimbang pitu halak na pandei marsampang.

¹⁷ Halak na ra manampuri paringoran ni halak na legan, doskon halak na manangkap pinggol ni baliang na montas do ia ai.

¹⁸ Songon halak na podouan, na manembakkon panah apuy ampa lingkit na pamatehon,

¹⁹ sonai do halak na manipu hasomanni, anjaha ihatahon ope, “Gurou-guroungku do hansa ai.”

²⁰ Anggo seng dong be soban, miloh do apuy, anggo seng dong sipanukas-nukasi, maronti do paringoran.

²¹ Arang pagajag narnar, soban pagajag apuy, sonai do dalahi sipartinggil pagara paringoran.

²² Hata ni si parhusip-husip mantin do ai, anjaha masuk-masuk hubagas uhur.

²³ Songon pirak na nilampiskon bani hudon, sonai do parbibir na lampot, hape uhurni ibagas jahat do.

²⁴ Halak pardomdom marsipakulah-kulah do parsahapni, tapi gok pangoto-otoion do uhurni ibagas;

²⁵ age pe basar parsahapni, ulang ho porsaya, ai adong do pitu lapis hasamboron ibagas uhurni;

²⁶ age pe irungkub-rungkub domdomni marhitei sipaoto-oto, maningon talar do hajahatonni ai i tongah-tongah ni humpulan.

²⁷ Halak sihurak godung bani na legan, ia sandiri do madabuh hubagas; halak na manggulangkon batu bani na legan, ia sandiri do hona gulangan.

²⁸ Dilah parladung mambahen hasedaon, pamangan na landit parohkon hamagouan.