Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mereken pujin man kalak lenge la kap bas inganna, bali kap e ras udan tupung perlego ntah salju tupung las.

² Bali ras perik kabang mentas saja arah awang-awang, bage pe la banci kalak kena sumpah adi la ia ersalah.

³ Desken sangam man kalde, dingen cambuk man kuda, bage me kalak bodoh i doni enda.

⁴ Kalak si njabap penungkunen si motu, seri kap ia longorna ras kalak motu e.

⁵ Penungkunen si motu arus ijabap alu jabap si motu ka, gelah iangka si nungkun e, maka labo ia pentar bagi si isangkana.

⁶ Nuruh kalak motu nehken berita seri kap ras menggelken nahe gelah cilaka.

⁷ Bali ras mate serapen njingkangken nahena, bage me kalak bodoh adi mereken ajar.

⁸ Mereken pujin man kalak lenge, bali kap e ras ngerakuti batu bas kalimbawang.

⁹ Bali ras kalak bodoh niwet duri i bas tanna, bage me adi kalak lenge mereken ajar.

¹⁰ Si mereken pendahin man kalak lenge dingen perkisat, erbahanca nterem saja kalak rugi.

¹¹ Desken biang mulih ku bas utahna, bage me kalak bodoh si ngulihi kebodohenna.

¹² Kalak si seh kal bodohna, ulin kap e asangken kalak si beluh akapna bana.

¹³ Kalak perkisat madin akapna ngada-ngada i rumah, alu alasen mbiar ia ijerngem singa i tengah dalan.

¹⁴ Bali ras engsel pintu si erpusing bage me si perkisat erguling-guling i bas ingan medemna.

¹⁵ Lit kalak si lanai tanggung malasna, nama nakan kubabahna pe la diatena.

¹⁶ Kalak malas beluhen iakapna ia, asangken pitu kalak beluh mereken jabapen si payo.

¹⁷ Kalak si ncampuri perubaten kalak si labo urusenna, bali kap ras si nangkap cuping biang adon.

¹⁸ Kalak si nipu aminna pe atena guro-guro saja, bali kap ia ras kalak mehado ngguro-ngguroken perkakas si bahaya.

¹⁹ (Ams 26:18)

²⁰ Adi ranting nggo keri, nimpet me api, adi kalak si pet ngerana lanai lit, perjengilen pe nggo ngadi.

²¹ Desken arang ntah ranting erbahan gara api, bage me kalak si merincuh pegara perubaten.

²² Kata cekurak seh kal tabehna emaka ntabeh ka nge siakap mendutca.

²³ Desken kudin taneh isepuh alu pirak, bage me kalak percakap manis, tapi jahat ukurna.

²⁴ Kalak perelem-elem, ibunikenna tipu i bas cakapna si medate.

²⁵ Aminna pe mehuli rananna, ula teki, sabap pusuhna dem alu elem-elem.

²⁶ Kune ibunikenna pe elem-elemna, kerina nge kalak ngidah kejahatenna.

²⁷ Kalak si engkuruk lubang man kalak si deban, ia jine nge gedap ku bas. Kalak si nggulingken batu, ia me si itindihina.

²⁸ Muali kalak seri nge ernembeh ate man bana, cakap manis labo lit gunana seakatan mereken cilaka.