Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob iputuskon, na maningon marlayar ma hanami hu Italia, gabe iondoskon ma si Paulus ampa deba hasomanni na tartutup hubani sada letnan, na margoran si Julius, humbani pasukan ni Kesar.
2 Masuk ma hanami hubagas sada kapal na hun Adramitium, na laho hu pelabuhan na i Asia; dob ai bingkat ma hanami, ihasomani si Aristarkus, halak Makedonia, na hun Tessalonika ai.
3 Patarni ai mandarat ma hanami i Sidon; basar do si Julius hubani si Paulus, ilopas do ia marayak hasoman, ase itamuei sidea ia.
4 Hunjai marlayar ma hanami manopi-nopi Pulou Kiprus, halani manuhar logou,
5 anjaha dob nabontas laut tontang Silisia ampa Pampilia, das ma hanami hu Mira na i Likia.
6 Ijai jumpah letnan ai ma sada kapal Aleksandria, na sihol marlayar hu Italia, gabe hujai ma hanami ipamasuk.
7 Piga-piga ari nanget do parlayaronnami, anjaha mahol do hanami das hu Knidus. Anjaha, torus do manuhar logou bannami; i laut ni Salmone marlayar ma hanami manopi-nopi Pulou Kreta.
8 Anjaha dob marhasunsahan hanami na manopi-nopi ai das ma hanami bani sada ianan, na margoran Palabuhan Na Majenges, dohorhon Huta Lasea.
9 Domma buei bois panorang parlayaron ai anjaha domma homa salpu panorang puasa, halani ai marmara ma manoruskon parlayaron ai, gabe ipaingat si Paulus ma sidea, nini ma,
10 “Nasiam hasoman, ia parlayaronta on huidah marhasunsahan anjaha marharugian banggal do, seng pitah bani muatan ampa kapal on tumang, tapi dihut do pakon bani hosahta.”
11 Tapi porsayaan do letnan ai bani jurumudi ai ampa bani simada kapal ai, ase bani hata ni si Paulus.
12 Halani hurang dear do palabuhan ai ianan pasalpuhon musim borgoh, sihol marlayar ma sidea hunjai ninuhur ni sidea buenan, andohar boi sidea das i Penike pasalpuhon musim borgoh, ai ma sada palabuhan i Kreta, na buha dompak nariti ampa manabia.
13 Anjaha, sanggah jenges parombus ni logou hun dangsina gabe tarpasaud ma sura-sura ai ninuhur ni sidea, jadi iangkat sidea ma sauh, anjaha marlayar ma sidea manopi-nopi Pulou Kreta.
14 Tapi seng pala piga dokah roh ma hun pulou ai habahaba bolon, na margoran haba-haba Irisanna.
15 Iluahon ma kapal ai; halani seng tardompakkonsi logou ai gabe ipaturut hanami mando, lanjar iboan ma hanami mumbang-umbang.
16 Sanggah mayub-ayub hanami i topi ni sada pulou na etek, na margoran Klauda, ikuasai hanami ma sikosi ai, tongon marhasonam buei hasunsahan.
17 Anjaha dob iangkat sikosi ai hu atas kapal, iusahahon sidea ma manlilit kapal ai bani tali. Anjaha halani mabiar sidea tardempar hu Sirtis, ipaturun mando layar, jadi sonai mando hanami mumbang-umbang.
18 Halani sosak tumang hanami ibahen habahaba ai, patarni ai ibuang ma muatan ni kapal ai,
19 anjaha bani ari patoluhon iambukkon sidea ma homa parugas-parugas ni kapal ai marhitei tangan ni sidea sandiri.
20 Anjaha halani domma piga-piga ari seng taridah mata ni ari barang bintang pe, anjaha torus do homa gogoh habahaba, putus ma arapannami boi hanami maluah.
21 Anjaha halani dokah ma sidea lang mangan, jongjong ma si Paulus i tongah-tongah ni sidea, nini ma, “Nasiam hasoman, ambit ma namin itangihon nasiam ahu, ulang laho hun Kreta, lang pala manaron hasunsahan ampa harugian on hita!
22 Ai pe, huojur ma nasiam marhinsah ni uhur, ai sahalak pe lang hun banta on na mahua, pitah kapal on do hansa.
23 Ai na jongjong do na borngin i lambungku malekat ni Naibata, simada ahu anjaha na hubalosi,
24 nini, ʻUlang ho mabiar, ale Paulus, ai maningon jongjong do ho i lobei ni Kesar, anjaha domma iondoskon Naibata bam haganup hasomanmu na sakapal in.ʼ
25 Halani ai, tenger ma uhur nasiam hasoman, ai porsaya do ahu bani Naibata, maningon saud do na hinatahonni ai bangku.
26 Tapi maningon tardempar do hita bani sada pulou.”
27 Pasapuluh-ompat-bornginkon na mumbang-umbang ai hanami i Laut Adria, hira-hira tongah borngin, iahap uhur ni parkapal ai ma dohor daratan.
28 Jadi idabuh sidea ma tali panibar, gabe dapot ma dua puluh holag bagasni; dob maju otik hunjai iulakkon ma use isibar, gabe dapot ma sapuluh lima holag.
29 Halani mabiar tombom holi hanami bani batu karang, gabe idabuh ma ompat sauh hampit pudi-pudi ni kapal ai, paima siang ari.
30 Dob ai sihol lintun ma anak kapal ai hun kapal ai, ipatoruh ma sikosi ai hu laut, iparsidalian sihol mandabuh sauh hun lobei-lobei ni kapal ai.
31 Jadi ihatahon si Paulus ma hubani letnan ai ampa hubani tentara ai, “Anggo seng soh sidea i kapal on, seng tarbahen nasiam maluah.”
32 Jadi irotap tentara ai ma tali ni sikosi ai, lanjar ipaturut mayub.
33 Tapi marayak siang ari, iojur si Paulus ma sidea mangan, nini ma, “Pasapuluhompatarihon ma sadari on, nasiam paima-imahon, seng mangan, aha pe lang idai nasiam.
34 Halani ai huojur ma ase mangan nasiam, ai panumpak do in bani haluahon nasiam, ai sada jambulan pe lang marurus humbani ulu nasiam bei.”
35 Ase dob ihatahon sonai, ibuat ma ruti ai, ihatahon ma tarima kasih bani Naibata i lobei ni sidea ganup, iponggoli ma ai, lanjar ipungkah ma mangankon.
36 Jadi hinsah ma uhur ni sidea lanjar mangan bei ma.
37 Ia bueinami i kapal ai, dua ratus pitu puluh onom halak do.
38 Dob bosur sidea idabuh ma gandum ai hu laut laho pahampung parau ai.
39 Dob torang ari, ididah sidea ma daratan, tapi lang itanda sidea. Ididah sidea ma sada teluk na marpasir, gabe hujai ma isura sidea padason kapal ai, anggo tarbahen.
40 Jadi irotap sidea ma tali-tali ni sauh ai, ipaturut i laut ai, anjaha itanggali ma homa tali ni amudi ai; ipasang ma layar lobei-lobei dompak logou, ase iboan sidea hu pasir ai.
41 Jadi tarlanggar ma kapal ai bani sada gosong, lanjar ipaturut tardempar ijai. Longkot ma lobei-lobei ni kapal ai ijai, seng miut be, anjaha pudi-pudi ni kapal ai maseda ibahen gilumbang.
42 Sihol do tentara ai mambunuh sagala halak tahanan, ase ulang lintun sidea marhitei na marlanguy,
43 tapi ilang-langi letnan ai do sura-sura ni sidea ai, halani sihol do pagoluhonni si Paulus. Iparentahkon ma na pandei marlanguy manlumpat hu laut, ase parlobei hu darat,
44 anjaha na legan ai hun pudi martilampung papan-papan ampa ponggol-ponggol ni kapal ai. Sonai ma boi sidea ganup maluah hu darat.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA