Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Festus wi wange sa'angeka woboano ma ngale wopareta ma daeraaka ge'ena, de woma'aiki 'o Kaisareaka so wosikaie 'o Yerusalemude.

² Ge'enaka daku de 'o 'imam ma sae-saeke de 'o Yahudioka manga balusu 'o Paulus wikalaki 'unaka. 'Ona kayobajau yomariwo 'o Festusika

³ la bari de 'awi singina ma sure 'onaka, wakisuloko 'o Paulus wi'asa 'o Yerusalemude; sababu 'ona yomasikagarokau 'o ngekomoka wito'oma.

⁴ Ma 'o Festus wosango, "'O Paulus dau witahanuku 'o Kaisareaka de ngoi mita koito'ingowa de toliou daukuku.

⁵ So niosibalu-balusu ne'enaka gee niaino la pomatuonou 'o Kaisareaku, la kadau 'asa de winikalaki, nako ma gou-goungu naga 'o kianikia wasalakau."

⁶ 'O Festus poilia wi wange tuangere bolo mogiookosi kia, 'asa de wolio 'o Kaisareaku. Ma bibinoka de wa'urusu ma parakara ge'ena de wosuloko la 'o Paulus wotaari.

⁷ Gee 'o Paulus woboa, de 'o Yahudioka gee yoboa-boakou 'o Yerusalemuku yomakoki'oko wisibululunino, de yokurue wikalaki de manga galaki gee posironga wisitubusoka. Ma 'ona koyodamakewa 'awi sala ma nyo-nyata.

⁸ 'O Paulus womariwo de kawongosekau, "Ngoi kokiawa tasala ma Jo'oungu ma Dutu 'awi besesongika gee 'o Musa wositota-totara bolo ma Jou wi Woaka bolo 'o Kaisarika."

⁹ Duga 'o Festus 'o singina wo'ese 'o Yahudi ma nyawaka so wosano 'o Paulusika, "Nomodeke? notagi 'o Yerusalemude la kadaku 'ai bionoka ni'urusu 'okia naga nika-kalakika gee?"

¹⁰ 'O Paulus wosango, "Ngoi ne'ena 'o Romaka ma hakimi ma bionoka; de ne'enakau salingou 'i'urusu. 'Aba, ngona nanakokau ngoi kokiawa tasala 'o Yahudi ma nyawaka.

¹¹ Nako ngoi taparenokau 'o 'atorangi de todiai 'o kianikia gee yadaene nihukumu niso-songene, ngoi katomodeke. Ma nako la manga galaki ge'ena ko ma gounguwa ge'ena ka moi ma koidadiwa 'i'asa 'onaka. Ngoi toga'asoko 'i'urusu ma Koana ma Amokoka ge'ena la ma Kaisar!"

¹² 'O Festus de godagee wido-dongose 'unaka yomasikadibangioka, de kawongosekau, "Ngona noga'asoko ni'urusu ma Kaisaroka, so salingou notaari 'unaka."

¹³ Ge'enaka koito'ingokawa de ma Koana 'o Agripa de ngo Bernike yoboa 'o Kaisareano ma ngale 'o Festus wihoromati de wisimorene.

¹⁴ Manga wange muruo naga ge'enaka, de 'o Festus wosijarita 'o Paulus wi hali ge'ena ma Koana 'o Agripaka. 'O Festus kawongosekau 'unaka, "'O bui ma nyawa wimoi ne'enaka naga 'o Feliks wimadaku.

¹⁵ Ma 'orasi ngoi 'o Yerusalemuoka, de ma 'imam ma sae-saeke de 'o Yahudioka manga balusu wikalaki 'o nyawa gu'una de yoga'asoko la towihukumu.

¹⁶ Ma ngoi tosango 'ato 'o Roma ma nyawa gee yakika-kalaki koidadiwa kapakisisarakaniou ma ngale pakihukumu, nako koyakisikataariwasi de yoka-kalaki de 'o 'orasi koyakikulawasi yomariwo.

¹⁷ So gee yoboano, de kotato-to'ingowa. Ka ma bibinie de ta'urusokau de tosuloko la 'o Paulus mita wisitaarino.

¹⁸ Gee yoka-kalaki yoma'oko yosidemo manga galaki, ka ma eta ma koyangosewa wi di-diai 'ito-torou gee ngoi tomangano-nganono dua yangose.

¹⁹ Ka ma cara duga manga di-dibangi 'imakaregu ma ngale to 'ona manga 'agama de wimoi wi ronga 'o Yesus. 'O nyawa gu'una wosongenokau, ma 'o Paulus wosigou-goungu 'ato wowangokali.

²⁰ Sababu ngoi kotosikanakowau ma ngale kokia la 'idadi tamake 'iwaiti ma hali ge'ena, so ma rai 'o Paulus towisano 'ato womodeke wotagi 'o Yerusalemude la kadaku 'asa wi hali ge'ena ya'urusu.

²¹ Ma 'o Paulus woga'asoko wosidoa wi hali ge'ena; woga'asko la 'una ka 'o buioka sigado wi hali ge'ena ma Kaisar waputusoka. Sababu ge'ena tosuloko la witahanuku sigado 'ai 'orasi de ma 'ena ma ngale towisidingoto ma Kaisarika."

²² Ge'enaka de 'o Agripa kawongosekau 'o Festusika, "Ngoi mita tomau tosigisenosi 'o nyawa gu'una wi demo." 'O Festus wosango, "Ngorumika 'idadi nosigisene."

²³ Ma wangede 'o Agripa de ngo Bernike yoboa yomasinoaku 'o koana ma pakeangi de yakisiduono de yakisirame. 'Ona yowosanga yo'uru-'urusu ma ngiika yomatuono de 'o solodado ma kapita de 'o nyawa yola-laagomo ma kotaka ge'ena. 'O Festus wosuloko, so 'o Paulus wi'asa wisingosama.

²⁴ Ge'enaka de 'o Festus wongose, "'Aba ma Koana Agripa, de ngini, 'Esa moi, nioboa-boano gee! 'O nyawa nu'una ge'ena 'o Yahudioka yoodumu wikalakiokau ngoino. 'O Yahudioka gee 'o Yerusalemuoka yomanoa-noa de ne'enaka, 'ona yogegoto de yosigaso-gasoko 'ato 'una koyadaenuwa powisimadaka wowangode.

²⁵ Ma 'okia naga wadiaiokau gee, ka moi ma kotodamakewa wi sala gee 'idadi powihukumu powiso-songene. De sababu 'una ma sirete woga'asokokau 'awi hali ge'ena ya'urusu ma Kaisaroka, so ngoi taputusokau dua towisidingoto 'unaka 'o Romaka.

²⁶ Duga 'o nyawa nu'una ngoi ka moi ma koidadiwasi tosiwaiti de 'o surati ma Kaisarika. Ge'enau so towisitaari nginika Dea-dea nioodumu, ma foloi gee ngona 'Aba ma Koana Agripa! Ngoi tomau winipirikisaa 'iduangino 'ena de ma 'ena 'idadi talefo.

²⁷ Sababu ngoi tamaoku ka ma eta ma koyadaenuwa 'o bui ma nyawa moi pakisidingoto ma Kaisarika de koposiwaituwa 'okia wasala so wikalaki."

Kisah Para Rasul

Video Kisah Para Rasul 25

Ikuti Kami:

KONTAK | PARTISIPASI | DONASI